දෙමළ ජනයා කෘෂිකාර්මික කටයුතු සදහා යොදා ගන්නා නැගෙනහිර පළාතේ භුමියක් පුරා විද්‍යා දෙපාර්තමේන්තුවට පවරා ගැනීමට දැරූ උත්සාහයක් ප්‍රදේශවාසී ජනතාවගේ විරෝධය හමුවේ වැළකී ගොස් තිබේ.
ප්‍රදේශයේ ජනතාව වන්දනා මාන කරන ගණ දෙවි කෝවිලක්ද සහිත කුඹුරු අක්කර 16 ක භුමියක් මැන පුරා විද්‍යා දෙපාර්තමේන්තුවට පවරා ගැනීම සදහා එම නිලධාරීන් පිරිස මඩකලපුව, වන්දාරමුලෙයිහි පිහිටි එම ස්ථානයට පැමිණ ඇත්තේ ඔක්තෝබර් 29 වැනිදාය.
පළාත් බද වාර්තාකරුවන් පවසන්නේ තමන් විසින් වසර ගණනාවක් භාවිතයට ගන්නා භුමියක් පුරා විද්‍යා දෙපාර්තමේන්තුවට පවරා ගැනීමට එරෙහිව ජනතාව දැක්වු විරෝධය හමුවේ පුරා විද්‍යා දෙපාරතමේන්තුවේ නිලධාරීන් මැනිමේ කටයුතු සිදු නොකරම ආපසු ගිය බවයි.
එම අවස්ථාවට දෙමළ ජාතික සන්ධානයේ හිටපු පාර්ලිමේන්තු මන්ත්‍රීවරුන් වන වී. ශ්‍රීනේෂන් සහ එස්. යෝගෙෂ්වරන්ද එක්ව සිටි බව පළාත් බද වාර්තාකරුවෝ වැඩි දුරටත් පවසති.
දෙමළ ජනයාට අයත් නැගෙනහිර පළාතේ ඉඩම් බලහත්කාරයෙන් අත්පත්කරගැනීමට උත්සාහ දරන බවට රජයට පසුගිය සමයේ දිගින් දිගටම චෝදනා එල්ල වී තිබුනි.
නැගෙනහිර පළාතේ දෙමළ ජනයාගේ ඉඩම් අත්පත් කරගැනීමට රජය උත්සාහ දරන බවට ශ්‍රී ලංකාවේ ආණ්ඩුවේ මානව හිමිකම් චර්යාව යුරෝපයට භාණ්ඩ අපනයනය සඳහා තව දුරටත් බදු සහන සලසා දීමට ගැලපෙන්නේදැයි විමර්ශනය කිරීම සඳහා පසුගිය සැප්තැම්බර් මාසයේ මෙරටට පැමිණ සිටි ඉහල පෙලේ විදේශීය දූත මණ්ඩලය හමුවේ පාර්ලිමේන්තු මන්ත්‍රී ජනාධිපති නීතිඥ එම්.ඒ සුමන්තිරන් ද අවධාරණය කර තිබුනි.
THE LEADER TV
කෙරවලපිටියෙන් කෙළවෙන තැනට ? | මොණරවිලගේ ලියමන
එක රටට, නීතියට අලි වලි ? | අද ගොසිප් එක
