‘කෙටි කවිය’ නමැති කාව්‍ය ප්‍රවර්ගය මේ වන විට සිංහල කාව්‍ය ක්ෂේත්‍රය තුළ බහුල ලෙස සාකච්ඡාවට බඳුන් වෙමින් පැවතිය ද තවත් පසෙකින් කෙටි කවිය අවප්‍රමාණයට ලක් වන තත්ත්වයක් ද දක්නට හැකි ය.
ඒ, කෙටි කවිය යනු කුමක්දැයි නිශ්චිතව වටහා නොගත් ඇතැම් කවි ලියන්නෝ සහ ලියන්නියෝ ‘කෙටි කවි’ නමින් හර සුන් පද්‍ය රචනා සමාජ ගත කරන බැවිනි; එසේ සමාජ ගත කළ ‘කෙටි කවි නොවන කවි’ මුද්‍රණද්වාරයෙන් නිකුත් කරන බැවිනි. එබඳු තත්ත්වයක් තුළ ‘කෙටි කවිය’ නිවැරැදිව හඳුනාගෙන කාව්‍යකරණයේ යෙදුණ සහ යෙදෙන කවි කිවිඳියෝ ද සිංහල කාව්‍ය ක්ෂේ ත්‍රය තුළ දකිත හැකි ය. අද අපේ කතා නායකයා වන්නේ ද ‘කෙටි කවිය’ නිවැරැදිව හඳුනාගෙන, එහි ගුණ රුව රැකෙන පරිදි සිය නවතම කාව්‍ය සංග්‍රහය සමාජ ගත කර ඇති කවියෙකි. ඔහු නමින් සුමින්ද කේ. ගුණරත්න හෙවත් සුමින්ද කිත්සිරි ගුණරත්න ය.
සුමින්ද කේ. ගුණරත්න හෙවත් සුමින්ද කිත්සිරි ගුණරත්න යනු 1996 වසරේ දී ‘චක්කරං කොටුව’ නමැති සිය කුලුඳුල් කාව්‍ය සංග්‍රහය පළ කර මේ වන විට හයවන කාව්‍ය සංග්‍රහය ද පාඨක ප්‍රජාව වෙත සමීප කර ඇති කවියෙකි.
මෙම කවියාගේ විශේෂත්වය වන්නේ ඔහු සිය කවි මගෙහි පියවර තබන විට කවියේ විවිධ මාන ස්පර්ශ කිරීමට සමත් වීම ය. එනම් නිසදැස් මෙන් ම සදැස් කවිය ද සිය කාව්‍ය මාර්ගය කරගත් හෙතෙම විසි වසරකට ආසන්න කාලයක් තුළ දී අගනා ආඛයාන කාව්‍යයක් මෙන් ම කෙටි කවි සංග්‍රහයක් ද නිකුත් කිරීමට සමත්ව තිබීම හේතුවෙනි.
ඔහුගේ නවතම කාව්‍ය සංග්‍රහය නම් කර ඇත්තේ ‘ප්‍රිස්ම’ යන මැයෙනි. එහි විශේෂත්වය වන්නේ කවියා සිය කවි නම් කර තිබෙන්නේ ‘සංකිත කවි’ ලෙසින් වීම ය.
මතු පළ වන්නේ සුමින්ද කේ. ගුණරත්න හෙවත් සුමින්ද කිත්සිරි ගුණරත්නගේ ‘ප්‍රිස්ම’ කාව්‍ය සංග්‍රහය නිමිති කරගනිමින් The Leader TV ඉදිරිපත් කරන ‘‘සරග’’ සාහිත්‍ය කලා වින්දනීය අඩ හෝරාව සමග ඔහු කළ සම්මුඛ සාකච්ඡාව ය. එම සාකච්ඡාව තුළ දී ඔහු සිය නවතම කාව්‍ය සංග්‍රහය ‘සංකිත කවි’ යනුවෙන් හැඳින්වූයේ ඇයි ද යන කරුණ ද පැහැදිලි කරයි.
