රුසියානු සිර භාරයට ගත් ඇමෙරිකානු මාධ්‍යවේදියකුට එරෙහි නඩු විභාගය ඇරඹේ

රුසියාවේදී අත්අඩංගුවට පත් එක්සත් ජනපද මාධ්‍යවේදියකුට එරෙහි නඩු විභාගය ඇරඹේ.

වෝල් ස්ට්‍රීට් ජර්නල් වාර්තාකරුවකු වන ඉවාන් ගර්ෂ්කොවිච් (Evan Gershkovich) ඔත්තු බැලීමේ චෝදනාව මත ඉකුත් වසරේ මාර්තු 23 වන දින රුසියානු  අත්අඩංගුවට  පත්විය.

32 හැවිරිදි මාධ්‍යවේදියාට එරෙහි නඩු විභාගය අද (26), රුසියාවේදී ආරම්භ වූ අතර, කෙටි වෙලාවකට පුවත්පත් වාර්තාකරුවන් ඇතුළු මාධ්‍යවේදීන්ට අධිකරණ ශාලාවට ඇතුළු වීමට අවසර ලබා දී තිබිණි. රුසියාවේ, එක්සත් ජනපද තානාපති කාර්යාල නිලධාරීන් දෙදෙනෙක්ද ඒ අතර වුහ.  

ඔහුට විරුද්ධ මීළඟ නඩු විභාගය අගෝස්තු 13 වන දා ට කල් තැබිණි.

අත්අඩංගුවට පත් එක්සත් ජනපද මාධ්‍යවේදියා, එරට පිළිගත් මාධ්‍යවේදියකු බවද වාර්තා වේ. ඔහු පශ්චාත් සෝවියට් රුසියාවේදී අත්අඩංගුවට පත් ප්‍රථම බටහිර මාධ්‍යවේදියා ද වෙයි.  

රුසියානු ඌරල් කඳුකර ප්‍රදේශයේ වාර්තාකරණයේ යෙදී සිටියදී ඔහු අත්අඩංගුවට පත්විය.  

එම ප්‍රදේශයේ පවත්වාගෙන යන රුසියානු යුද උපකරණ සහ යුද ටැංකි නිෂ්පාදන හා අලුත්වැඩියා මධ්‍යස්ථානයක් පිලිබඳ තොරතුරු ඔහු විසින්, ඇමෙරිකානු සී.අයි.ඒ. ඔත්තු සේවාව වෙත ලබා දුන් බව රුසියාව චෝදනා කරයි. එක්සත් ජනපදය එම චෝදනා ප්‍රතික්ෂේප කරන අතර ඔහුව වහා නිදහස් කරන ලෙස රුසියානු බලධාරීන්ට දන්වා තිබේ.

චෝදනා ඔප්පු වීමෙන් පසු ගර්ෂ්කොවිච් හට වසර 20ක් දක්වා සිර දඬුවම් හිමි වනු ඇතැයි රුසියානු බලධාරීහු ප්‍රකාශ කරති.

රුසියාවට එරෙහිව ඔත්තු සැපයීම බරපතල අපරාධයක් ලෙස සැලකේ.

රට තුළ ප්‍රකාශිත පුවත්, විදේශිකයින් හා හුවමාරු කර ගැනීමද දඬුවම් ලැබියහැකි තත්වයකි.

මේ හමුවේ, විදෙස් මාධ්‍යවේදීන් රැසක් මේ වනවිටත් රුසියාවෙන් පිටව ගොස් තිබේ.

2018 දී රුසියාව විසින් ඔත්තු බැලීමේ චෝදනා මත එරට දී අත්අඩංගුවට ගත් එක්සත් ජනපද ආයතනික ආරක්ෂක විධායකු වූ පෝල් වෙලාන් (Paul Whelan) නම් පුදගලයකු මේවන විට රුසියානු අධිකරණයක් මගින් වසර 16 ක සිර දඬුවම් ක්‍රියාත්මක කර තිබේ.

(සටහන: හර්ෂ  උදයකාන්ත)
[AP ඇසුරිණි]

මූලාශ්‍රය :    

A US journalist goes on trial in Russia on espionage charges that he and his employer deny