සති කිහිපයක් තුළ හෙළිවූ අති දැවැන්ත කොකේන් සහ ගංජා ජාවාරම් ජාලය.
සංවිධානාත්මක අපරාධ කල්ලි ඉලක්ක කර ගනිමින් බ්රිතාන්ය දේශසීමා බළකාය සිදුකරන මෙහෙයුම් වේගවත් වෙයි.
සවුත්හැම්ප්ටන් වරාය කේන්ද්ර කරගනිමින් සිදුවන මත්ද්රව්ය ජාවාරම් මැඩලීමේ අරමුණින් බ්රිතාන්ය දේශසීමා බළකාය සිදුකළ විශේෂ මෙහෙයුම්වලදී පවුම් මිලියන 160කට අධික වටිනාකමකින් යුත් මත්ද්රව්ය තොගයක් අත්අඩංගුවට ගැනීමට සමත්ව තිබේ. පසුගිය මාසය ඇතුළත පමණක් වාර්තා වූ මෙම සිදුවීම් මාලාව, බ්රිතාන්යයේ මත්ද්රව්ය ජාවාරම් මැඩලීමේ මෙහෙයුම්වල නවතම හැරවුම් ලක්ෂ්යයක් ලෙස පෙන්වා දිය හැකිය.
අත්අඩංගුවට ගත් මත්ද්රව්ය තොගයේ ස්වභාවය
ලබාගත හැකි වාර්තාවන්ට අනුව, ජුනි 28 වැනි දින සවුත්හැම්ප්ටන් වරායේ තිබූ බහාලුමක් තුළ අසුරා තිබූ කෙසෙල් තොගයක සඟවා තිබියදී කිලෝග්රෑම් 77ක කොකේන් තොගයක් සොයාගෙන ඇත. මෙහි ඇස්තමේන්තුගත වීථි වටිනාකම පවුම් මිලියන 38කි. එදිනම සිදුකළ තවත් සෝදිසියකදී, තවත් බහාලුමකින් පවුම් මිලියන 47ක වටිනාකමකින් යුත් තවත් කොකේන් කිලෝග්රෑම් 530ක් සොයා ගැනීමට ද නිලධාරීන් සමත්විය.
මෙම සිදුවීම් මාලාව එතැනින් නොනැවතුණි. ජූලි මස 10 වැනි දින පවුම් මිලියන 76ක් වටිනා කිලෝග්රෑම් 960ක දැවැන්ත කොකේන් තොගයක් අත්අඩංගුවට ගත් අතර, අනතුරුව දැවමය තට්ටු (hardwood flooring) තොගයක සඟවා තිබූ පවුම් මිලියන 1.2ක් වටිනා ගංජා කිලෝග්රෑම් 290ක් සොයා ගැනුණි. මෙම සිදුවීම් පෙළින් ගම්ය වන්නේ මත්ද්රව්ය ජාවාරම්කරුවන් විසින් නීති විරෝධී භාණ්ඩ ප්රවාහනය සඳහා විවිධ සැඟවුණු මාර්ග භාවිතා කරන බවයි.
දෙරටේම නීතිය ක්රියාත්මක කරන ආයතන අතර සහයෝගීතාව
බ්රිතාන්ය ස්වදේශ කටයුතු අමාත්යාංශයේ අමාත්ය ජෝ වයිට්
මෙම වැටලීම් සම්බන්ධයෙන් අදහස් දක්වමින් බ්රිතාන්ය ස්වදේශ කටයුතු අමාත්යාංශයේ අමාත්ය ජෝ වයිට් (Jo White) සඳහන් කළේ, අපරාධ කල්ලිවල සැපයුම් දාමයන්ට දැඩි පහරක් එල්ල කිරීමට තම බළකාය සමත් වී ඇති බවයි. "අප මෙම අපරාධ ජාලයන්ට වඩා එක් පියවරක් ඉදිරියෙන් සිටිනවා. මෙම මත්ද්රව්ය ජාවාරම් සමාජයට හානි පමුණුවන අතර අපගේ ප්රජාවන් තුළ අරාජිකත්වයක් ඇති කිරීමට දායක වෙනවා. එම සැපයුම් දාමයන් කපා හැරීමට අප ගන්නා උත්සාහය අඛණ්ඩව ක්රියාත්මකයි," යනුවෙන් ඇය ප්රකාශ කළාය.
බ්රිතාන්ය දේශසීමා බළකායේ දකුණු කලාපයේ ප්රධානී ලින් සාරි (Lyn Sari) පෙන්වා දුන්නේ, මෙම වැටලීම් සංවිධානාත්මක අපරාධ කල්ලිවලට විශාල පසුබෑමක් බවයි. ඇය වැඩිදුරටත් සඳහන් කළේ, දේශීය මෙන්ම ජාත්යන්තර නීතිය ක්රියාත්මක කරන ආයතන සමඟ පවතින සම්බන්ධතාවය මීට ප්රධාන සාධකයක් වූ බවයි.
පසුගිය වසරේ මාර්තු මාසය වන විට වාර්තා වූ දත්තවලට අනුව, බ්රිතාන්ය දේශසීමා බළකාය මගින් අත්අඩංගුවට ගත් නීති විරෝධී මත්ද්රව්ය ප්රමාණය ටොන් 150කි. එහි වීථි වටිනාකම පවුම් බිලියන 2.6ක් වන අතර, එය පෙර වසරට සාපේක්ෂව සියයට 40ක වැඩිවීමකි. මෙය වාර්තාගත සංඛ්යාවක් ලෙස සැලකෙන අතර, බ්රිතාන්යයේ දේශසීමා ආරක්ෂක පද්ධතියේ ක්රියාකාරීත්වය සහ බුද්ධි අංශවල සම්බන්ධීකරණය කෙරෙහි මේ වන විටත් ජාත්යන්තර අවධානය යොමුව තිබේ.
මුලාශ්රය :
Drugs worth more than £160m seized at British port
