නව ගුවන් කලාප සැලසුම හමුවේ සිඩ්නි ගුවන් ගමනාගමන පාලකයන්ගෙන් අනතුරු ඇඟවීමක්

බටහිර සිඩ්නි නව ගුවන් තොටුපළ ව්‍යාපෘතිය වෙනුවෙන් ගෙන ආ වෙනස්කම් හදිසි වැඩි බවට පැමිණිල්ලක්.

පුහුණුව හා මෙහෙයුම් සුරක්ෂිතතාව පිළිබඳ බලධාරීන්ගෙන් සහතිකයක්.

ඔස්ට්‍රේලියාවේ කාර්යබහුලම ගුවන් තොටුපළ වන සිඩ්නි ගුවන්තොටුපළ කේන්ද්‍ර කරගනිමින් පසුගිය මාසයේදී ක්‍රියාත්මක කරන ලද නව ගුවන් කලාප රීති හේතුවෙන් ගුවන් යානා අනතුරු අවදානමක් මතුවිය හැකි බවට එරට ගුවන් ගමනාගමන පාලකයන් ෆෙඩරල් ආරක්ෂක නියාමන ආයතන වෙත දැනුම් දී තිබේ.

ඔස්ට්‍රේලියානු ප්‍රවාහන ආරක්ෂණ කාර්යාංශය (ATSB) වෙත ඉදිරිපත් කර ඇති රහසිගත පැමිණිල්ලකට අනුව, ඉදිකෙරෙමින් පවතින බටහිර සිඩ්නි ජාත්‍යන්තර ගුවන්තොටුපළේ (Western Sydney International Airport) මෙහෙයුම් සඳහා ඉඩ සැලසීමට සිදුකළ ගුවන් අවකාශ ප්‍රතිසංස්කරණ ක්‍රියාවලිය ප්‍රමාණවත් කාලරාමුවකින් තොරව කඩිනම් කර ඇති බව සඳහන් වේ. මෙම තත්ත්වය හමුවේ පාලකයන්ට නව රීති පිළිබඳව හදාරන්නට පිටු 1,000කට අධික පුහුණු ද්‍රව්‍ය ප්‍රමාණයක් ලැබී ඇති නමුත්, ඊට අදාළ ප්‍රායෝගික පුහුණුව නිසි පරිදි සම්පූර්ණ කිරීමට ප්‍රමාණවත් කාලයක් නොලැබුණු බව එම පැමිණිල්ල මගින් පෙන්වා දී ඇත.

මෑතකාලීන මෙහෙයුම් සිදුවීම් සහ කාර්ය මණ්ඩල පීඩනය

ජූලි 09 වැනිදා සිට ක්‍රියාත්මක වූ මෙම නව රීති පද්ධතියත් සමඟ, සාමාන්‍ය ගුවන් ගමන් තදබදය පවතින අවස්ථාවලදී පවා නව ක්‍රියාපටිපාටිය කළමනාකරණය කිරීමට පාලකයන් තුළ ඇත්තේ අවම විශ්වාසයක් බව එම වාර්තාවේ දැක්වේ. පවතින කාර්ය මණ්ඩල හිඟය සහ මෙහෙයුම් පළපුරුද්දේ මට්ටම් හේතුවෙන් වත්මන් පද්ධතිය දැඩි පීඩනයකට ලක්ව ඇති බවට ද එහි අනතුරු අඟවා තිබේ.

මෙම අනතුරු ඇඟවීම් මතු වන්නේ සිඩ්නි ගුවන්තොටුපළේ මෙහෙයුම් ආරක්ෂාව සම්බන්ධයෙන් සිදුවීම් කිහිපයක් වාර්තා වූ පසුබිමකය. පසුගිය සතියේ ක්වාන්ටාස් (Qantas) ගුවන් යානයක් ධාවන පථය හරහා ගමන් කිරීමට උත්සාහ කිරීම නිසා වර්ජින් (Virgin) ගුවන් යානයකට ගුවන්ගත වීම අතරමග නැවැත්වීමට සිදුවූ අතර, ඊට පැය කිහිපයකට පෙර ජෙට්ස්ටාර් (Jetstar) සහ කටාර් එයාර්වේස් (Qatar Airways) යානා දෙකක් අතර ද ධාවන පථයේදී මෙහෙයුම් අවදානම් තත්ත්වයක් වාර්තා විය. මෙම සිදුවීම් මගින් ගුවන් ගමනාගමන පාලක හිඟය සහ ගුවන් ගමන් ප්‍රමාදයන් කෙරෙහි කර්මාන්ත ක්ෂේත්‍රයේ දැඩි අවධානයක් යොමුව තිබේ.

නියාමන ආයතන සහ රජයේ ස්ථාවරය

කෙසේ වෙතත්, ඉදිරිපත් වූ චෝදනා සම්බන්ධයෙන් කරුණු දක්වන සිඩ්නි පර්යන්ත පාලන ඒකකය (Sydney Terminal Control Unit) සඳහන් කරන්නේ, අදාළ වෙනස්කම්වලට අදාළ සියලුම නව පුහුණු අත්පොත් සහ මෙහෙයුම් ක්‍රමවේද නිසි පරිදි සකස් කර අනුමත කර ඇති බවයි. එමෙන්ම නව ක්‍රමවේද ක්‍රියාත්මක කිරීමේදී පාලකයන්ගේ මෙහෙයුම් අධීක්ෂණය සඳහා අමතර නිලධාරීන් යොදවා ඇති අතර, නවක පාලකයන් සේවයේ යෙදවීම සම්බන්ධයෙන් විශේෂ සීමාවන් සහ නියාමනයන් පනවා ඇති බවද ඔවුන් පෙන්වා දෙයි.

සිවිල් ගුවන් සේවා ආරක්ෂණ අධිකාරිය (CASA) ප්‍රකාශ කර ඇත්තේ, මෙම වෙනස්කම් සඳහා අවශ්‍ය පුහුණුව සහ මෙහෙයුම් සහාය විෂය ප්‍රවීණයන්ගේ සහ ප්‍රමිති නිලධාරීන්ගේ පූර්ණ සමාලෝචනයකින් පසුව සකස් කර ඇති බවත්, මෙහෙයුම් ආරක්ෂාව තහවුරු කිරීමට අවශ්‍ය අධීක්ෂණ කටයුතු ක්‍රියාත්මක වන බවත්ය.

මේ අතර, ෆෙඩරල් ප්‍රවාහන අමාත්‍ය කැත්රින් කිං ගේ ප්‍රකාශකයෙකු සඳහන් කර ඇත්තේ ATSB වාර්තාවට අදාළව නියාමන අධිකාරිය අවශ්‍ය පියවර ගෙන ඇති බවයි. ගුවන් ගමනාගමන පාලන ධාරිතාව පුළුල් කිරීම වෙනුවෙන් ලබන සැප්තැම්බර් මාසයේ සිට නව සේවා මුර ක්‍රමවේදයක් හඳුන්වා දීමටත්, පුහුණු කටයුතු වේගවත් කිරීම සඳහා නව අනුකරණ යන්ත්‍රයක් (Simulator) ස්ථාපනය කිරීමටත් පියවර ගෙන ඇති අතර, නව පාලකයන් බඳවා ගැනීමේ වැඩසටහන් ද අඛණ්ඩව ක්‍රියාත්මක වේ.

මුලාශ්‍රය :

Sydney air traffic controllers have ‘grave concerns’ about collision risk after airspace redesign