ශ්රී ලංකාවේ ආර්ථික පුනර්ජීවනය සහ මෙරට තුළ යළි ගොඩනැගී ඇති ආයෝජක විශ්වාසය ජාත්යන්තර අවධානයට යොමු කරමින්, 'Invest in Sri Lanka 2026' ආයෝජන සමුළුව පැවැත්වීමට සියලු කටයුතු සූදානම් කර ඇත.
ශ්රී ලංකා ආයෝජන මණ්ඩලය (BOI) විසින් යුරෝපා සංගමය, ආසියානු සංවර්ධන බැංකුව සහ එක්සත් ජාතීන්ගේ ESCAP ආයතනය සමඟ එක්ව සංවිධානය කරනු ලබන මෙම සුවිශේෂී සමුළුව මෙම 30 වන දින සිනමන් ලයිෆ් (Cinnamon Life) පරිශ්රයේදී පැවැත්වීමට නියමිත බව ආයෝජන මණ්ඩලයේ අධ්යක්ෂ ජනරාල් රේණුකා එම්. වීරකෝන් පැවසුවාය.
ආයෝජන මණ්ඩලයේ අධ්යක්ෂ ජනරාල් රේණුකා එම්. වීරකෝන්
'ශ්රී ලංකාවේ හරිත සහ සබඳතා සපිරි අනාගතයක් වෙනුවෙන් ආයෝජනය' (Investing in Sri Lanka's Green and Connected Future) යන තේමාව යටතේ පැවැත්වෙන මෙම සමුළුවේ මූලික අරමුණ වන්නේ ශ්රී ලංකාව තිරසාර සහ තාක්ෂණය පදනම් කරගත් සංවර්ධන මධ්යස්ථානයක් ලෙස ලොවට හඳුන්වා දීමයි.
ගෝලීය ආයෝජකයින්, බහුජාතික සමාගම් සහ හෙජ් අරමුදල් කළමනාකරුවන් හට මෙරට නව ආර්ථික දැක්ම සමඟ අත්වැල් බැඳ ගැනීමට මෙහිදී අවස්ථාව සැලසේ.
ශ්රී ලංකාව මේ වන විට ප්රබල සාර්ව ආර්ථික ස්ථාවරත්වයක් අත්කර ගනිමින් සිටින බව නවතම දත්ත පෙන්වා දෙයි. 2025 වසරේ පළමු මාස නවය තුළ මෙරට දළ දේශීය නිෂ්පාදිතය (GDP) 5.0% ක වර්ධනයක් වාර්තා කළ අතර, එහිදී කාර්මික අංශය 8.1% ක කැපී පෙනෙන වර්ධනයක් පෙන්නුම් කළේය.
එමෙන්ම, 2025 වසර තුළ පමණක් ඇමරිකානු ඩොලර් බිලියනයකට වඩා වැඩි විදේශ සෘජු ආයෝජන (FDI) ප්රමාණයක් ආකර්ෂණය කර ගැනීමට ශ්රී ලංකාව සමත් වී ඇති අතර, ඉහළ වටිනාකමකින් යුතු නව ආයෝජන ව්යාපෘති 24ක් ආරම්භ කර ඇත.
ශ්රී ලංකාව සතු උපායමාර්ගික පිහිටීම සහ පුනර්ජනනීය බලශක්ති විභවය ආයෝජකයින්ගේ විශේෂ අවධානයට ලක්ව තිබේ. විශේෂයෙන්ම '2025-2030 ජාතික බලශක්ති ප්රතිපත්තිය' යටතේ 2030 වන විට විදුලි උත්පාදනයෙන් 70% ක් පුනර්ජනනීය බලශක්තියෙන් ලබා ගැනීමට අපේක්ෂිතය. මීට අමතරව ඖෂධ නිෂ්පාදනය, සැපයුම් දාම කළමනාකරණය, තාක්ෂණික උද්යාන සහ වෙරළාසන්න සංචාරක ව්යාපෘති වැනි ක්ෂේත්ර රැසක නව ආයෝජන අවස්ථා විවෘත වී පවතී.
මේ පිළිබඳව අදහස් දක්වමින් ආයෝජන මණ්ඩලයේ අධ්යක්ෂ ජනරාල් රේණුකා එම්. වීරකෝන් ප්රකාශ කළේ, ශ්රී ලංකාව සතු උපායමාර්ගික වාසිය සහ තිරසාර වර්ධනය පිළිබඳ විශ්වාසය තබමින් අප සමඟ අත්වැල් බැඳගන්නා ලෙස ගෝලීය ආයෝජන ප්රජාවට ආරාධනා කරන බවයි. සෑම ආයෝජකයෙකුටම කාර්යක්ෂම සහ විනිවිදභාවයෙන් යුතු සේවාවක් සැපයීමට ආයෝජන මණ්ඩලය කැපවී සිටින බව ද ඇය වැඩිදුරටත් අවධාරණය කළාය.
මෙම සමුළුව පිළිබඳ වැඩි විස්තර දැනගැනීමට සහ ලියාපදිංචි වීම සඳහා srilankainvestmentforum.com වෙබ් අඩවිය වෙත පිවිසිය හැකිය.
(සටහන | ජේ.මුණසිංහ)
