රටේ රාළ අද වීඩියෝව : සජිත් යමුද පොඩි ගමනක්

ගෝල්ෆේස් අරගලය පාවාදීමත් එක්ක විපක්ෂයට නියමිත දේශපාලන භූමිකාවේ තවත් එක වැප්ටර් එකක් අවසන් වෙමින් තියනවා .විපක්ෂ දේශපාලන භූමිකාවකට සාපේක්ෂව දැන් අපේ රටේ විපක්ෂයේ උත්පාත කාලය

අවසන් වෙමින් අවපාත කාලයට ළගා වෙමින් තියනවා.

දැන් සියලු රැලි අවසානයි. මේ වෙනකොට සජබයවත්, ජාජබයවත් එහෙමත් නැත්තං වෙන පොදු බලවේගයක්වත් ස්ථාවර විපක්ෂයක් විදිහට මතුවේලා නෑ. අර කවුද කිව්වා වගේ රැල්ල ඇවිත් සියල්ල වැල්ලට ගොඩගහලා යන්න ගිහින්.

මේ විපක්ෂ ඛේදවාචකයේ පළවෙනි ගොඳුර බවට පත් වෙන්නේ සජබයයි. ජාතික ජන බලවේගයටත් ඒ කටුක අද්දැකීම ඇවෑමෙන් එන්න නියමිතයි. ඒත් ජාජබයට ඉස්සෙල්ලා සජබය ඇඳවැටෙනවා.

අපි ඉස්සෙල්ලාම බලමු සජබයේ මේ ඇඳ වැටීමේ වරද කොතනද කියලා.

ඔයාලා දන්නවා කාලයක් තිස්සේ එජාප නායකත්වය වෙනුවෙන් රනිල් සජිත් අතර ගැටුමක් තිබුණා. ඒ ගැටුම විසින් එජාප ගමන සෑහෙන දුරට අඩපන කළා. සජිත් එජාප ජනාධිපති අපේක්ෂකයා වෙන්කොට එජාපයට තිබුණේ පරාජිත මානසිකත්වයක් නෙවෙයි. සජිත් සහ එජාපය බලවේගයත් හිටියේ ජයග්‍රහී මානසිකත්වයක.

සජිත් ජනාධිපතිවරණ අපේක්ෂකයාවීම විසින්ම එජාපය ජයග්‍රහී මනසකට තල්ලු කළා. මොකද සජිත්ලා ඒ වෙනකොටත් රනිල් ගැන හදලා තිබුන මතය එජාප පහල බලවේගයට කාන්දුවෙලා තිබුණා.

 

 සජිත්ලා කිව්වේ රනිල්ට කවදාවත් බලය ගන්න බෑ, රනිල්ගේ කොන්ද පණ නෑ. නායකත්වය බලෙන් තියාගෙන ඉන්නේ, රනිල් ඉන්නකං එජාපයට අනාගතයක් නෑ. රනිල්ගේ නායකත්වය දුර්වලයි කියලයි. ඒක නිසා එජාප බලවේගය සජිත් ජනාධිපතිවරණයට පැමිණීම දැක්කේ සකලාංග සම්පුර්ණ, ආරොහ පරිමාහ දේහධාරී මහා යුග පුරුෂයෙක් ලැබුනා කියලයි. මහා ප්‍රාඥයෙක් ලැබුනා කියලයි.

 

  අන්තිමට සජිත් ආසන 54 ක් දිනාගෙන ඇවිත් විපක්ෂ නායකයා වුනා. එජාපයට එක මන්ත්‍රී ධුරක් දිනා ගන්න බැරි වුනා. හම්බ වෙච්චි ජාතික ලයිස්තු මන්ත්‍රීධුරයට එජාපය රනිල්ව පත් කළා. රනිල් පාර්ලිමේන්තු ඇවිත් දැන් රටේ ජනාධිපතිත්වෙලා. සජිත්ට පාර්ලිමේන්තු මන්ත්‍රීලා 54 ක් එක්ක හිතන්නවත් බැරි වැඩක් දැන් රනිල් කරලා ඉවරයි.එතනදී සජිත්ට කටඋත්තර නැති වෙන්නේ ඒ අවස්ථාව රනිල්ට කලින් සජිත්ට ඇවිත් ඒකට බයේ සජිත් හැංගුන හින්දයි.

 

 එජාප දේශපාලන මතය ලිබරල්වාදය. රනිල් සහ සජිත් දෙන්නම ලිබරල්වාදය පිලිගන්නවා. හැබැයි මෙතන ලොකු වෙනසක් තියනවා. රනිල් කියන්නේ ඇත්ත ලිබරල්වාදියෙක්. ජේආර්. ලලිත්, ගාමිණී, චන්ද්‍රිකා, කරූ, මංගලලාත් එක්ක එකට තියන්න පුළුවන් ලිබරල්වාදියෙක්. හැබයි සජිත් ලිබරල්වාදය පිලිගත්තට ඒ පේලියේ තියන්න බෑ. සජිත් තියන්න පුළුවන් රණසිංහ ප්‍රේමදාස, මහින්ද රාජපක්ෂ, බැසිල් රාජපක්ෂලා ඉන්න පේලියේ. ඒ කියන්නේ පෙනුමෙන් ලිබරල් උනාට මනසින් වැඩවසම් පේලියේ.