'පරිසර යුක්ති කේන්ද්‍රය' විසින් මෙම පෙත්සම ඉදිරිපත් කර තිබිණ.
අගවිනිසුරු ප්‍රීති පද්මන් සූරසේන, අචල වෙංගප්පුලි සහ සම්පත් විජේරත්න යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම සලකා බැලුණි.
එහිදී පෙත්සම්කාර පාර්ශ්වය වෙනුවෙන් පෙනී සිටි නීතීඥ ආචාර්ය රවින්ද්‍රනාත් දාබරේ ඉදිරිපත් කළ කරුණු සලකා බැලූ ත්‍රිපුද්ගල විනිසුරු මඩුල්ල, මෙම පෙත්සම කරුණු තහවුරු කිරීම (Confirmation of facts) සඳහා 2026 නොවැම්බර් මස 03 වැනිදා කැඳවීමට නියම කළේය.
පෙත්සම්කාර සංවිධානය කියා සිටින්නේ පාරිසරික සංරක්ෂණ බදු පනතට අනුව සුපිරි වෙළඳසැල් ඇතුළු වෙළඳ ආයතනවලින් පාරිභෝගිකයින්ට අලෙවිකරණ ෂොපින් මලු සඳහා අය කරනු ලබන බදු මුදල් රජයේ නිශ්චිත පාරිසරික සංරක්ෂක අරමුදලකට බැර විය යුතු බවයි.
නමුත් වර්තමානයේ එවැන්නක් සිදු නොවන බව පෙන්වා දෙන පෙත්සම්කරුවන් එය නීතියට පටහැනි බව කියා සිටියි.
ඒ අනුව අදාළ බදු මුදල් රජය විසින් ස්ථාපිත කර තිබෙන පාරිසරික සංරක්ෂණ අරමුදලකට බැර විය යුතු බවට නියෝගයක් නිකුත් කරන ලෙසත් පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබේ.
පෙත්සමෙහි අන්තර්ගත ප්‍රධාන කරුණු
නීතිමය ප්‍රතිපාදන:
'පාරිසරික සංරක්ෂණ බදු පනත' (Environmental Conservation Levy Act) අනුව, පාරිභෝගිකයින්ගෙන් ෂොපින් බෑග් සඳහා අය කරන මුදල් රජයේ නිශ්චිත පරිසර අරමුදලකට බැර විය යුතුය.
වත්මන් ගැටලුව:
2025 නොවැම්බර් 01 දින සිට ක්‍රියාත්මක වන පරිදි වෙළෙඳසැල්වලින් ෂොපින් බෑග් නොමිලේ ලබාදීම තහනම් කර, ඒ සඳහා රුපියල් 3ක් හෝ 5ක් වැනි මුදලක් අය කිරීම අනිවාර්ය කෙරුණි. නමුත්, දැනට එම මුදල් රජයේ අරමුදලකට බැර නොවන අතර, ඒවා සෘජුවම වෙළෙඳසැල් හිමියන්ගේ පෞද්ගලික ආදායම් (Private Income) බවට පත්වන බව පෙත්සම්කරුවන් පෙන්වා දෙයි.
නීති විරෝධී බව:
දිනකට මෙලෙස එකතු වන මිලියන සංඛ්‍යාත ජනතා මුදල් පරිසර සංරක්ෂණයට යෙදවීම වෙනුවට පෞද්ගලික අංශය සතු වීම නීතියට පටහැනි මෙන්ම පොදු මහජන අයිතිය උල්ලංඝනය කිරීමක් බව පරිසරවේදීන් තර්ක කරයි.
පරිසරයට සිදුවන හානිය අවම කිරීමට සහ මෙම බදු මුදල් විනිවිදභාවයකින් යුතුව පරිසර පද්ධති රැකගැනීම සඳහා යෙදවීමට විධිමත් පාලන යාන්ත්‍රණයක් සකස් කරන ලෙස මෙමඟින් රජයට නියෝග කෙරෙනු ඇතැයි අපේක්ෂා කෙරේ.
