මෙහු දැඩි ලෙස මත්ද්‍රව්‍ය සඳහා ඇබ්බැහි වූවෙකු බවද පොලීසිය පවසයි.
මෙම සැකකරු දුම්රිය මාර්ගයේ ගලවන ලද ඇණ කිසියම් ස්ථානයකට ප්‍රවාහනය කළ පුද්ගලයා බවට පොලීසිය සිදුකළ මූලික විමර්ශනවලදී අනාවරණය වී ඇත.
සිද්ධියට සම්බන්ධ තවත් සැකකරුවෙකු අත්අඩංගුවට ගැනීම සඳහා පොලීසිය විමර්ශන ආරම්භ කර ඇත.
අද (16) අලුයම පොල්ගහවෙල සිට දකුණු කළුතර බලා ධාවනය වූ මන්දගාමී දුම්රියක් වනවාසල සහ හුණුපිටිය දුම්රිය ස්ථාන අතරතුරදී පීලි පැනීමකට ලක් විය.
මෙම අනතුරෙන් දුම්රිය මැදිරියක් පෙරළී ගිය අතර, මගීන් 12 දෙනෙකු තුවාල ලබා රෝහල්ගත කෙරිණි.
මෙම කඩාකප්පල්කාරී ක්‍රියාවට සම්බන්ධ තවත් පුද්ගලයෙකු අත්අඩංගුවට ගැනීම සඳහා පෑලියගොඩ පොලිසිය විමර්ශන සිදු කරයි.
අනතුර හේතුවෙන් ප්‍රධාන දුම්රිය මාර්ගයේ පහළ මාර්ගය අවහිර වී ඇති අතර, ඉහළ සහ තෙවන මාර්ග ඔස්සේ ප්‍රමාදයන් සහිතව දුම්රිය ධාවනය කෙරේ. මේ වනවිට මාර්ගය යථා තත්ත්වයට පත් කිරීමේ කටයුතු දුම්රිය දෙපාර්තමේන්තුව විසින් ආරම්භ කර ඇත.
