මත්ද්‍රව්‍ය හා පාතාල ක්‍රියාකාරකම් මැඩ පැවැත්වීමට සකස් කළ වැඩපිළිවෙල ක්‍රියාත්මක කිරිමට දේශබන්දු තෙන්නකෝන් වැඩ බලන පොලිස්පතිවරයා

ලෙස පත් කළ බව පොලිසිය බාර ඇමැතිවරයා ප්‍රකාශ කළේය.

විපක්ෂයේ මන්ත්‍රීවරයකුව සිටි තමා, මහජන ආරක්ෂක අමාත්‍ය ධූරය බාර ගත්තේ රට ගිනි ඇවිලි තිබු මොහොතක බවද ඔහු සඳහන් කළේය.

ඔහු එබව කියා සිටියේ, යුක්තිය මෙහෙයුම පිළිබඳ ප්‍රජා පොලිස් කමිටු දැනුවත් කිරීම සඳහා පානදුර පොලිස් ප්‍රදේශයේ පැවැති විශේෂ වැඩමුළුවකදීය.

“අපට පැවැති විශාලම අභියෝගය වූයේ රටේ සියලු ප්‍රදේශ ගිලගනිමින් පැවති මත්ද්‍රව්‍ය උවදුර සහ පාතාල ක්‍රියාකාරකම් මැඩ පැවැත්වීමයි. වත්මන් වැඩ බලන පොලිස්පතිතුමා ඇතුළු විශේෂ කමිටුවක්‌ පත්කර මේ තත්ත්වය පිළිබඳ විශේෂ අධ්‍යයනයක් මාස කීපයක් තිස්සේ සිදුකිරීමෙන් අනතුරුව ඒ සඳහා වන වැඩපිළිවෙලක් අප සකස් කළා. එම වැඩපිළිවෙළ ක්‍රියාත්මක කිරීම සඳහා වත්මන් වැඩ බලන පොලිස්පතිවරයා එම තනතුරට පත් කරන ලෙස මා ජනාධිපතිතුමාගෙන් ඉල්ලීමක් සිදු කළා.”

මීට පෙර සිදු ආකාරයට අත්අඩංගුවට ගන්නා අපරාධකරුවන් විවිධ පුද්ගලයින්ගේ බලපෑම්වලට යටත් වී නිදහස් කිරීමේ සම්ප්‍රදායට තිත තිත තැබූ බව කී මහජන ආරක්ෂක අමාත්‍ය ටිරාන් අලස්, තමා විෂය භාර අමාත්‍යවරයා ලෙස සෘජුව කටයුතු කරන බවයි පවසන්නේ.

යුක්තිය මෙහෙයුම දරු පරපුර බේරා ගන්න


රටේ අනාගත දරු පරපුර බේරා ගන්නා මෙහෙයුමක් ලෙස යුක්තිය මෙහෙයුම හැඳින්වු ඇමැතිවරයා ආරම්භයේදී ඉලක්ක කල පරිදිම මේ වන විටත් රට තුළ විශාල වෙනසක් සිදුවී ඇති බව පැවසීය.

“පක්ෂ පාට ආගම් භේදයකින් තොරව ක්‍රියාත්මක කරන මේ මෙහෙයුමටද දේශපාලනය ගාවා ගැනීමට ඇතැම් දේශපාලනඥයින් උත්සාහ කරනවා. අපට අවශ්‍ය සෑම දෙනාගේම සහයෝගයෙන් මේ මෙහෙයුම සාර්ථක කර ගැනීමටයි.” ටිරාන් අලස් ඇමැතිවරයා පවසයි.


ඔන්ලයින් පනත ගැටලුවක් වෙන්නේ කාටද?


සමාජ මාධ්‍ය භාවිතා කරමින් එකිනෙකාට අපහාස කිරීමට කටයුතු කරන පුද්ගලයකු ලක්ෂ හතරකට අධික මුදලක් ද සමග පසුගියදා පොලිස් අත්අඩංගුවට පත් වු බවත් ඩොලර් වලින් එම මුදල් ලබා දුන්නේ දේශපාලනඥයකු බව ඔහු පොලිසියට කී බව ඇමැතිවරයා සඳහන් කළේය.

මාර්ගගත ක්‍රමවල සුරක්ෂිතභාවය පිළිබඳ පනත ඉදිරිපත් කරන ලද්දේ සමාජ මාධ්‍ය වැරදි ආකාරයෙන් භාවිතා කරන පුද්ගලයන් පාලනයට බවත් ජාත්‍යන්තරයේ ඇතැම් පුද්ගලයින්ට අවශ්‍ය දේ අවශ්‍ය ආකාරයට මෙහෙයවන්නේ සමාජ මාධ්‍ය හරහා බවයි අමාත්‍යවරයා පවසන්නේ.

“රජයක් පෙරළීම සඳහා වුවත් සමාජමාධ්‍ය භාවිතා කළ හැකියි. ඔවුන්ට අවශ්‍ය මත්ද්‍රව්‍ය රට තුළ ව්‍යාප්ත වී, පාතාල ක්‍රියාකාරකම් වර්ධනය වී, රට කඩා වැටීමයි. එම අරමුණින් කටයුතු කරන පිරිස් මේ පනතට විරුද්ධව විවිධ ප්‍රකාශ සිදු කරනවා. මේ පනත ගැටලුවක් වන්නේ සමාජ මාධ්‍ය වැරදි ආකාරයෙන් හසුරුවන පිරිසට පමණයි." ටිරාන් අලස් ඇමැතිවරයා තවදුරටත් කියා සිටියේය.

පානදුර පොලිස් බල ප්‍රදේශයේ පැවැති මෙම විශේෂ වැඩමුළුවට මහජන ආරක්ෂක අමාත්‍ය ටිරාන් අලස් මෙන්ම මහජන ආරක්ෂක අමාත්‍යාංශ ලේකම් වියානි ගුණතිලක, වැඩ බලන පොලිස්පති දේශබන්දු තෙන්නකෝන්, ජ්‍යෙෂ්ඨ නියෝජ්‍ය පොලිස්පතිවරුන්, නියෝජ්‍ය පොලිස්පතිවරුන් ඇතුළු පොලිස් දෙපාර්තමේන්තුවේ ඉහළ නිලධාරීන්, ප්‍රජා පොලිස් කමිටු සාමාජිකයින් ඇතුළු විශාල පිරිසක් එක්ව සිටියහ.

(චතුරංග මේදිස්)


worky

worky 3

Follow Us

Image
Image
Image
Image
Image
Image