*‘නරිබෑණා’ වේදිකාව දශක හතරක් හැඩකළ, විරිඳු කලාවේ පුරෝගාමී හඬ නිහඬ වේ
*පරම්පරා ගණනාවකට උඩරට නැටුම් ශිල්පය දායාද කළ විශිෂ්ට නර්තනාචාරිණියගේ අවසන් කටයුතු කොහුවලදී
ශ්රී ලාංකේය පාරම්පරික ජන සංගීතය, විරිඳු සහ සාම්ප්රදායික නර්තන කලාව සංරක්ෂණය කරමින් අනාගත පරපුර වෙත දායාද කිරීමෙහිලා පුරෝගාමී මෙහෙවරක් ඉටුකළ ජ්යෙෂ්ඨතම කලාශිල්පිනියක වූ දයා නෙල්ලම්පිටිය මහත්මිය අභාවප්රාප්ත විය. කළුබෝවිල පිහිටි සිය නිවසේදී ඇය අභාවප්රාප්ත වන විට 91 වන වියෙහි පසුවූවාය.
දශක හතරක වේදිකා සහ විරිඳු චාරිකාව
දයා නෙල්ලම්පිටිය මෙරට සංස්කෘතික ඉතිහාසය තුළ සුවිශේෂී සලකුණක් තැබුවේ මෙරට ජනප්රියතම විරිඳු ගායන ශිල්පියෙකු වූ සේන ෆොන්සේකා මහතා සමගිනි. අතීතයේ මෙරට පැවැති ප්රමුඛ පෙළේ වෙසක් තොරණ මෙන්ම ජාතික උත්සව වේදිකා හැඩගැන්වූ මෙම කලා යුවළ, ගැමි සංස්කෘතිය සහ බෞද්ධ සාහිත්යය ජනතාව අතරට සමීප කරවීමට මූලික විය. ජී. එස්. බී. රාණි පෙරේරා සංගීතවත් කළ, ප්රේමකීර්ති ද අල්විස් සූරීන්ගේ පද රචනයක් වූ “ගිනි කුකුළයි ගිනි කිකිළියි අන්දර අත්තේ...” ගීතය ඇතුළු නිර්මාණ රැසක් ඇගේ ගායන ප්රතිභාව මැනවින් සනිටුහන් කළ අවස්ථා ලෙස සැලකේ.
ශ්රී ලංකා ගුවන් විදුලි සංස්ථාවේ විශිෂ්ට ශ්රේණියේ ජන ගී ගායිකාවක වූ ඇය, මහාචාර්ය එදිරිවීර සරච්චන්ද්රයන්ගේ ‘නරි බෑණා’ නාට්යයේ වසර 40කට අධික කාලයක් අඛණ්ඩව පසුබිම් ගායනයෙන් එක්වෙමින් වාර්තාවක් ද තබා තිබේ. ඊට අමතරව ‘ගජමන් පුවත’, ‘පද්මාවතී’ සහ ‘ජසයා සහ ලෙංචිනා’ වැනි සම්භාව්ය නාට්ය රැසක ගීත ගායනයට ද ඇය සක්රීයව දායක විය.
පරම්පරා තැනූ නර්තන ආචාරිණිය
ගායනයට පමණක් සීමා නොවූ ඇය, දිවයිනේ ප්රමුඛ පෙළේ පාසල් රැසක නර්තන ආචාරිණියක ලෙස සේවය කරමින් පාරම්පරික උඩරට නර්තන කලාව දහස් සංඛ්යාත ශිෂ්ය පරපුරකට ශික්ෂණය කළාය. වත්මන් ශ්රී ලාංකේය කලා ක්ෂේත්රයේ ප්රමුඛ පෙළේ නමක් දිනා සිටින ප්රවීණ නර්තන සහ ගායන ශිල්පීන් රැසකගේම මූලික ගුරුහරුකම් සැපයූ ගුරුවරිය ලෙස ද ඇය සම්භාවනාවට පාත්ර වේ.
නූතන සමාජ වෙනස්කම් හමුවේ පාරම්පරික ජනශ්රැති කලාවන් ක්රමයෙන් වියැකී යන මොහොතක, ඇය විසින් තබන ලද ශාස්ත්රීය හා ප්රායෝගික පදනම මෙරට ජන සංස්කෘතික උරුමයේ තීරණාත්මක සන්ධිස්ථානයක් ලෙස විචාරකයෝ පෙන්වා දෙති.
අවසන් ගෞරව දැක්වීම සඳහා දයා නෙල්ලම්පිටිය මහත්මියගේ දේහය අද (14) ඇය පදිංචිව සිටි කලුබෝවිල නිවසේ තැම්පත් කෙරෙන අතර, අවසන් කටයුතු සැප්තැම්බර් 16 වන දින සවස 6 ට කොහුවල සුසාන භූමියේදී සිදු කෙරෙන බව පවුලේ ඥාතීන් සඳහන් කරයි.
