පලස්තීන ජනයා දකුණු ගාසා තීරයේ විශාල කඳවුරකට ගාල් කිරීමට ඊශ්රායලය සැරසේ.
ඒ පිණිස එහි බිම් කඩක් දැනටමත් එළි පෙහෙළි කර ඇතැයි, එම හමුදා උපදේශකයෙක් වන විශ්රාමික ජෙනරාල්වරයකු උපුටා දක්වමින් රොයිටර්ස් පුවත් සේවය පවසයි. නව කඳවුර මුහුණු හැඳිනීමේ තාක්ෂණය වැනි නවීන අවේක්ෂණ පද්ධතීන්ගෙන් සමන්විතව ඉදි කිරීමට යෝජිත බව ද වාර්තා වේ. විශ්රාමික ඊශ්රායල හමුදා නිලධාරියකු වන බ්රිගේඩියර් - ජෙනරාල් අමීර් අවිව් විසින් මෙම තතු අනාවරණය කර තිබේ.
රෆා කලාපයේ හමාස් සංවිධානය විසින් ඉදි කළ උමං පද්ධති පැවති භූමියක, එම බාධක ඉවත් කර කඳවුරු භූමිය ඉදි කෙරේ. ඊට ඇතුළුවීම සහ ඉන් පිටවීම ඊශ්රායල කාර්ය මණ්ඩල විසින් නිරීක්ෂණය කෙරෙනු ඇත.
අවිව්, ඊශ්රායල ආරක්ෂක සංසදයේ නිර්මාතෘවරයා ද වේ. එම සංසදය දහස් සංඛ්යාත ඊශ්රායල භට සාමාජිකත්වයකින් සමන්විත ය. ගාසා තීරය අතහැර ඊජිප්තුවට සංක්රමණය වීමේ සූදානමින් පසුවන පලස්තීනුවන් මෙන්ම තව දුරටත් නිජ බිම රැඳී සිටීමට අපේක්ෂා කරන පලස්තීනුවන්ට ද නව කඳවුරේ ලැගුම් හිමි වේ.
ගාසා තීරය සහ ඊජිප්තුව හරහා වැටී ඇති රෆා දේශ සීමා කොරිඩෝව සීමිත කාලසීමාවකට යළි විවෘත කිරීමට ඊශ්රායලය සූදානමින් සිටී. ඒ ඔස්සේ, පලස්තීනුවන් බලහත්කාරයෙන් ඊජිප්තුව වෙත පිටමං කිරීමට සැලසුම් කෙරෙන බවට වන චෝදනා ඊශ්රායලය ප්රතික්ෂේප කරයි. 2025 ඔක්තෝබරයේ සිට ඇරඹි සටන් විරාමයෙන් පසුව රෆා කලාපය මුළුමනින්ම ඊශ්රායල හමුදා පාලනයට නතුව පවතී. එහි කිසිදු ගාසා වාසියකු නැතැයි, අවිව් කියා සිටී.
ගාසා ජනගහනය ගාල් කිරීමට රෆා හි කඳවුරක් ඉදි කරන ලෙස හමුදාවන්ට නියෝග කළ බව, ඉකුත් ජුලි මස ඊශ්රායල ආරක්ෂක අමාත්ය, ඉශ්රයෙල් කැට්ස් කියා සිටියේය.
හමාස් සංවිධානය අවි අත් නොහරින්නේ නම්, ඊට එරෙහි නව ඊශ්රායල හමුදා ක්රියාන්විතයක් දියත් කිරීමේ සූදානමක් පවතින බව ද අවිව් පැවසීය. එවන් මොහොතක ගාසා තීරයෙන් පලා එන පලස්තීනුවන් ගාල් කිරීම පිණිස ද නව කඳවුර භාවිතා කෙරෙනු ඇත.
"සියලු සැලසුම් සකස් කර අවසන්. ප්රහාර පිණිස කැබිනට් අනුමැතියෙන් රාජ්ය නියෝග ලැබෙන තෙක් ඊශ්රායල හමුදා සන්නද්ධ සූදානමේ," අවිව් කීය.
(සටහන |Reuters ඇසුරින්; හර්ෂ උදයකාන්ත පීරිස්)
මුලාශ්රය :
Israel plans large camp for Palestinians in southern Gaza, retired general says
