ආසියානු සාගර කලාපයේ වූ තවත් ඉරාන නැව් තුනක් හරවා යැවේ 

ඉරාන ධජය යටතේ ආසියානු සාගර කලාපයේ යාත්‍රා කරමින් පැවති තවත්  ඉන්ධන නෞකා තුනක් වෙත ඊයේ (22) එක්සත් ජනපද හමුදා බාධා කළහ.

ඒ අනුව,  ඉන්දියාව, මැලේසියාව සහ ශ්‍රී ලංකාව ආසන්නයේ යාත්‍රා කරමින් තිබූ එම නෞකා යළි හරවා යැවීමට කටයුතු කර ඇතැයි, නෞකා සහ ආරක්ෂක මූලාශ්‍ර උපුටා දක්වන රොයිටර්ස් පුවත් සේවය පවසයි.

 

ඉරානයට සම්බන්ධ බහලු නෞකාවක් සහ ඉන්ධන ප්‍රවාහන නෞකාවක් ද  මේ වන විට එක්සත් ජනපද අත්අඩංගුවේ පවතී. යුද්ධයේ ප්‍රථම වරට ඉරානයද හෝර්මුස් සමුද්‍ර සන්ධිය පසු කර ගල්ෆ් කලාපයෙන්  පිට වීමට තැත් කළ විදෙස් නෞකා දෙකක් සිය භාරයට ගත්තේය.

 

එක්සත් ජනපද හමුදා විසින් යළි හරවා යැවුණු එක් යාත්‍රාවක් වන්නේ ඉරාන ධජය යටතේ මැලේසියාව ආසන්නයේ බොර තෙල් තොගයක් රැගෙන යාත්‍රා කරමින් පැවති  සුපිරි ඉන්ධන නෞකාවකි.

බොර තෙල් බැරල මිලියනයක ධාරිතාවකින් යුත්, එම  පූර්ණ ධාරිතාවෙන් 65%ක ඉන්ධන තොගයක් රැගෙන ඉරාන ධජය යටතේ යාත්‍රා කරමින් පැවති  තවත් කුඩා ඉන්ධන ප්‍රවාහන නෞකාවක් ද හරවා යැවීමට එක්සත් ජනපද හමුදා පියවර ගත්හ.

ඉරාන ධජය යටතේ යාත්‍රා කරමින් තිබූ ඩොරෙනා නම් තවත් සුපිරි ඉන්ධන ප්‍රවාහන නෞකාවක් ද එක්සත් ජනපද හමුදා මැදිහත්වීමෙන්  යළි හරවා යැවීමට කටයුතු කෙරිණි.

 

මීට තෙදිනකට පෙර ඉන්දියාවට ආසන්න සාගර කලාපයේ අවසන් වරට දුටු එම නෞකාව එම අවස්ථාවේ  බොරතෙල් බැරල මිලියන 2ක පූර්ණ ධාරිතාවේ පැවති  බව ද වාර්තා වේ. තහනම නොතකා යාත්‍රා කිරීමට තැත් කළ එම නෞකාව ඉන්දියානු සාගරයේ  එක්සත් ජනපද නාවුක හමුදා  ප්‍රහාරක යාත්‍රාවක අධීක්ෂණය යටතේ ඉවත් කළ බව එක්සත් ජනපද මධ්‍යම විධානය දැන්වීය.

 

ඉරාන සමුද්‍රීය වෙළඳාම තහනම්  කළ දා සිට මෙතෙක්,  එක්සත් ජනපද හමුදා විසින් ඉරානයට සම්බන්ධ නෞකා 29ක් යළි  හරවා යැවීමට හෝ මුල් වරාය වෙත යොමු කිරීමට කටයුතු කර තිබේ.

(සටහන |Reuters ඇසුරින්; හර්ෂ උදයකාන්ත පීරිස්)

මුලාශ්‍රය :

Exclusive: US intercepts three Iranian oil tankers in Asian waters, sources say