මාලදිවයිනේ ඩොලර් අර්බුදය හමුවේ විදේශ විනිමය නීති දැඩි වෙයි

සංචාරක හෝටල්වල ඩොලර් ආදායමෙන් සියයට 40ක් බැංකුවලට මාරු කිරීම අනිවාර්යයි.

විදේශ විනිමය කළුකඩ ගනුදෙනු හා දැන්වීම්වලට ලක්ෂ ගණනින් දඩ.

මෑතකදී මාලදිවයිනේ භාවිත කළ හැකි විදේශ විනිමය සංචිත ප්‍රමාණය අඩුවීයාම හේතුවෙන්, එරට රජය සහ මාලදිවයින් මූල්‍ය අධිකාරිය (MMA) විසින් විදේශ විනිමය රෙගුලාසිවල දැඩි සංශෝධන රැසක් හඳුන්වා දී තිබේ. ඩොලර් සංචිත ස්ථාවර කරගැනීම සහ දේශීය වෙළඳපොළ තුළ පවතින ඩොලර් හිඟයට පිළියම් යෙදීම මෙම නව නීතිවල මූලික අරමුණ වී ඇත.

සංචිතවල මෑතකාලීන තත්ත්වය සහ ඩොලර් හිඟයට හේතු

මාලදිවයින් මූල්‍ය අධිකාරිය (MMA) විසින් නිකුත් කර ඇති නවතම සංඛ්‍යාලේඛනවලට අනුව, මාලදිවයිනේ මුළු නිල විදේශ සංචිතය අගෝස්තු මාසයේදී සියයට 0.9 කින් ඉහළ ගොස් ඇමරිකානු ඩොලර් මිලියන 643.8 දක්වා වර්ධනය වී තිබේ. කෙසේ වෙතත්, ආහාර, ඉන්ධන සහ බෙහෙත් වර්ග වැනි අත්‍යවශ්‍ය ආනයන සඳහා සෘජුවම භාවිත කළ හැකි "භාවිත කළ හැකි සංචිත ප්‍රමාණය" (usable reserves) සියයට 9.6 කින් පහත වැටී ඇත. ඒ අනුව, ජූලි මස ඩොලර් මිලියන 221.9 ක් ලෙස සටහන් වූ එම අගය අගෝස්තු මාසයේදී ඩොලර් මිලියන 200.6 දක්වා අඩුවී තිබේ.

මෙම අඩුවීමට ප්‍රධානම හේතුව වී ඇත්තේ, වෙළඳපොළේ පවතින ඩොලර් හිඟය පාලනය කිරීම සඳහා මාලදිවයින් මූල්‍ය අධිකාරිය විසින් වාණිජ බැංකු වෙත අලෙවි කළ විදේශ විනිමය ප්‍රමාණය ජූලි මාසයට සාපේක්ෂව අගෝස්තු මාසයේදී සියයට 13.4 කින් ඉහළ යාමයි. එමෙන්ම, දේශීය ආදායම් එකතු කිරීමේ ආයතනය (MIRA) හරහා රජයට ලැබුණු විදේශ විනිමය ආදායම ද සියයට 14.3 කින් පහත වැටීම මෙයට බලපා ඇත.

නව රෙගුලාසි යටතේ ගෙන ඇති ප්‍රධාන පියවර

රටේ මූල්‍ය ස්ථාවරත්වය තහවුරු කිරීමේ අරමුණින්, ජනාධිපති ආචාර්ය මොහොමඩ් මුයිස්සුගේ රජය විසින් හඳුන්වා දී ඇති මෙම නව සංශෝධන යටතේ ප්‍රධාන නීති කිහිපයක් ක්‍රියාත්මක වේ.

සංචාරක ක්ෂේත්‍රය සඳහා:
'A කාණ්ඩයට' අයත් රිසෝට්, ඒකාබද්ධ සංචාරක නිකේතන සහ පෞද්ගලික දූපත් වෙත ලැබෙන මාසික විදේශ විනිමය ඉපැයීම්වලින් සියයට 40 ක් බැංකු හරහා මාරු කිරීම අනිවාර්ය කර ඇත. මීට පෙර එය පැවතියේ සියයට 20 ක් ලෙසිනි.

වෙනත් ව්‍යාපාරික අංශ:
සංචාරක නොවන ක්ෂේත්‍රවල ඉහළ ආදායම් ලබන ව්‍යාපාර සඳහා මීට පෙර ඩොලර් මිලියන 15 ක් ලෙස පැවති සීමාව, ඩොලර් මිලියන 25 දක්වා ඉහළ නංවා තිබේ. ඒ අනුව විදේශීය ආයෝජන හිමි එවැනි ආයතන ද තම ආදායමෙන් සියයට 40 ක් මාරු කළ යුතු අතර, සම්පූර්ණයෙන්ම මාලදිවයින් වැසියන්ට හිමි ව්‍යාපාර සඳහා මෙම ප්‍රතිශතය සියයට 7 ක් ලෙස ලිහිල් කර ඇත.

නවාතැන්පළවල් සහ හෝටල්: 
B කාණ්ඩයට' අයත් හෝටල්, සංචාරක නවාතැන් සහ සෆාරි යාත්‍රා සඳහා එක් සංචාරකයෙකුට ඩොලර් 25 බැගින් හෝ ඔවුන්ගේ මුළු මාසික ආදායමෙන් සියයට 20 ක් දේශීය බැංකු පද්ධතිය හරහා හුවමාරු කිරීමට නියම කර ඇත.

කළුකඩ වෙළඳපොළට එරෙහි දැඩි දඩ මුදල්

විදේශ විනිමය කළුකඩ වෙළඳපොළ පාලනය කිරීමේ දැඩි පියවරක් ලෙස, නිල විදේශ විනිමය අනුපාතයට වඩා වැඩි මිල ගණන් යටතේ මුදල් හුවමාරු කිරීම් ප්‍රචාරය කිරීම හෝ කළුකඩ අනුපාත ප්‍රසිද්ධ කිරීම සම්පූර්ණයෙන්ම තහනම් කර ඇත. මෙම නීති කඩ කරන පුද්ගලයන්ට මාලදිවයින රුපියා 500,000 දක්වා ද, ව්‍යාපාරික ආයතන වෙත රුපියා 5,000,000 (මිලියන පහක්) දක්වා ද විශාල දඩ මුදල් නියම කිරීමට නීතිමය ප්‍රතිපාදන සකසා තිබේ.

මෙම පුළුල් ආර්ථික ප්‍රතිසංස්කරණ හරහා රට තුළට ගලා එන ඩොලර් ප්‍රමාණය ඉහළ නංවා, රාජ්‍ය සංචිතය යළි නගාසිටුවිය හැකි බව මූල්‍ය විශ්ලේෂකයෝ අපේක්ෂා කරති.


වැඩිදුර කියවීම සඳහා:
Raajje MV - Government implements major changes to foreign exchange regulations as usable reserves decline