අප්‍රිකානු ප්‍රතිවාදියෙකුට එරෙහි භූතානයේ පළමු පාපන්දු තරගය ඔවුන්ට සුභදායී එකක් නොවූයේ මධ්‍යම අප්‍රිකානු සමූහාණ්ඩුව සමග ඊයේ කොළඹ
තුරඟ තරග පිටියේ පැවැති FIFA Series 2024 තරගමාලාවේ ශ්‍රී ලංකා අදියරේ ආරම්භක තරගයෙන් භූතාන පාපන්දු කණ්ඩායම ගෝල් 6-0ක දැවැන්ත පරාජයක් ලැබීම නිසා.
මෙය මධ්‍යම අප්‍රිකානු සමූහාණ්ඩු පාපන්දු කණ්ඩායම ලැබූ වාර්තාගත ජයග්‍රහණයක් ලෙස ඉතිහාස ගතවනු ඇත්තේ ඔවුන් එදා මෙදා තුර වාර්තා කළ විශාලතම ජයග්‍රහණය මෙය වන බැවින්.
මේ පහසු ජයග්‍රහණය මගින් මධ්‍යම අප්‍රිකානු සමූහාණ්ඩුව අනතුරු ඇඟවීමක් නිකුත් කළේ ඔවුන්ගේ ලෝක කුසලාන පාපන්දු අප්‍රිකානු සුදුසුකම් ලබා ගැනීමේ තරගාවලියේ ප්‍රබල ප්‍රතිවාදීන් වන ඝානා කණ්ඩායමට.
ඊයේ තරගයේ ජයග්‍රාහී කණ්ඩායම වෙනුවෙන් ගෝල් ලබා ගත්තේ Tresor Toropite (17 වැනි මිනිත්තුවේදී), Venuste Baboula (48 හා 93 වැනි මිනිත්තුවලදී), Karl Namnganda (49 හා 64 වැනි මිනිත්තුවලදී) සහ Hamissou Mamadou Dangabo (56 වැනි මිනිත්තුවේදී).
භූතානයේ මීළඟ තරගය සඳුදා පැවැත්වෙන්නේ ශ්‍රී ලංකාව ට එරෙහිව.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
