ශ්‍රී ලයන්ස් ජාත්‍යන්තර ආරාධිත නෙට්බෝල් ලීග් තරගාවලියේ ශූරියන් වීමට රාජ්‍ය සේවා නෙට්බෝල්
සංගමය සමත් වුනා. අනුශූරියන් වූයේ ශ්‍රී ලයන්ස් ජාත්‍යන්තර නෙට්බෝල් කණ්ඩායම යි.
ශ්‍රී ලංකාවේ ප්‍රථම වතාවට පැවති මේ නෙට්බෝල් ලීග් තරගාවලිය - Sri Lions International Invitational Netball League 2024 - සංවිධානය කර තිබුනේ ‘ශ්‍රී ලයන්ස්’ සංවිධානය යි. සෙනසුරාදා හා ඉරිදා කොළඹ සාන්ත ජෝසප් විද්‍යාලයීය ගෘහස්ථ ක්‍රීඩාංගණයේදී මේ තරගාවලිය ඉතාමත් සාර්ථකව පැවැත්වුනා.
කණ්ඩායම් හයක් සහභාගි වූ මේ ලීග් තරගාවලියේ තියුණු මුහුණුවරක් ගත් අවසාන මහා තරගයේදී රාජ්‍ය සේවා කණ්ඩායම විසින් ශ්‍රී ලයන්ස් කණ්ඩායම පරාජය කරනු ලැබුවේ එක ලකුණකින්. තරගය අවසන් වූයේ 44 – 43ක ලකුණු තත්ත්වයකින්.
මාල දිවයිනේ ‘මැට්රික්ස්’ කණ්ඩායම තරගාවලියේ තෙවැනි ස්ථානයට පත්වුනා. මේ කණ්ඩායම හමුවේ ලකුණු 43 – 24කින් පරාජය වුනේ KDU ක්‍රීඩිකාවන්.
තරගාවලියේ දක්ෂතම ක්‍රීඩිකාව ලෙස කිරුළු පැළඳුවේ රාජ්‍ය සේවා කණ්ඩායමේ නායිකා චතුරංගි ජයසූරිය. හිටපු ශ්‍රී ලංකා නෙට්බෝල් නායිකාවක වන ඇයට ‘තිලකා ජිනදාස අභියෝග කුසලානය’ හිමි වුනා. අවසාන මහා තරගයේ වීරවරිය වූයේ ද රාජ්‍ය සේවා කණ්ඩායමේ ම තිලිණි වත්තේගෙදර. ඇය ශ්‍රී ලංකා කණ්ඩායමේ ක්‍රීඩිකාවක්.
තරගාවලියේ හොඳම ‘සෙන්ට කෝට්’ ක්‍රීඩිකාව වශයෙන් ශ්‍රී ලයන්ස් කණ්ඩායමේ තරුෂි පෙරේරා ද, හොඳම ආරක්ෂක ක්‍රීඩිකාව ලෙස ශ්‍රී ලයන්ස් කණ්ඩායමේ අකිලා නිමිනි ජයවර්ධන ද, හොඳම විදින්නිය ලෙස රාජ්‍ය සේවා කණ්ඩායමේ දුලංගා දනන්ජි ද නම් කෙරුනා.
අනුශූරියන් වූ ශ්‍රී ලයන්ස් ජාත්‍යන්තර කණ්ඩායම මෙහෙයවනු ලැබුවේ හිටපු ශ්‍රී ලංකා ක්‍රීඩිකාවක වන අකිලා ජයවර්ධන විසින්.
තිළිණ ප්‍රදානෝත්සවය පැවැත්වුනේ ගේට්වේ ජාත්‍යන්තර පාසලේ ප්‍රධානී වෛද්‍ය හර්ෂ අලස් මහතාගේ ප්‍රධානත්වයෙන්. ක්‍රීඩා අමාත්‍යංශයේ අධ්‍යක්ෂ ජෙනරල් මහාචාර්ය රියල් අද්මිරාල් ෂෙමාල් ප්‍රනාන්දු මහතා ප්‍රධාන ආරාධිත අමුත්තා වුනා. ‘ශ්‍රී ලයන්ස්’ නිර්මාතෘ ආචාර්ය කැළුම් සුජිත්, ලුම්බිණි විදුහලේ විදුහල්පති සරත් ගුණරත්න යන මහත්වරු සහ හිටපු ශ්‍රී ලංකා නෙට්බෝල් සභාපතිනි හා ආසියානු නෙට්බෝල් සභාපතිනි තමාරා ධර්මකීර්ති හේරත් මහත්මිය ද මේ අවස්ථාවට එක්වුනා.
සබැඳි ලිපි :
Sri Lions ජාත්‍යන්තර ආරාධිත නෙට්බෝල් ලීග් තරගාවලිය : මාර්තු 23 – 24
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
