එංගලන්තයේ බොක්සිං ක්රීඩකයෙක් ඔහු සහභාගි වූ පළමු වෘත්තීය තරගයේදී ම හිසට එල්ල වූ පහරකින් මිය ගියා.
ලන්ඩනයේ Harrow Leisure මධ්යස්ථානයේ පසුගියදා පැවති තරගයේදී මෙසේ ඛේදජනක අයුරින් මිය ගොස් තිබෙන්නේ ෂෙරීෆ් ලවල් (Sherif Lawal) නමැති 29 හැවිරිදි මිඩ්ල්වේට් අංශයේ බොක්සිං ක්රීඩකයෙක්.
තරගය අතරතුර එල්ල කළ පහරක් නිසා හිසේ ඇතිවූ තුවාලයකින් ඔහු මිය ගිය බව තරගයේ ප්රවර්ධකයන් වන Warren බොක්සිං කළමනාකාරිත්වය නිවේදනය කළා.
ෂෙරීෆ් ලවල් මිය ගියේ පෘතුගාලයේ 33 හැවිරිදි මලෑම් වරිලා (Malam Varela) වෙතින් පහර කා බොක්සිං වළල්ලේ බිම ඇද වැටීමෙන් පසුව.
තරග විනිසුරුවරයා පහරින් බිම හෙළීමේ ගණන් කිරීම ආරම්භ කළ ද කැන්වසය මත වැටී සිටින ෂෙරීෆ්ගේ තත්ත්වයේ බරපතළකම වටහා ගත් සැණින් ඔහු තරගය අවසන් බවට තීරණය කළා.
අසල රෝහලට ගෙන යාමට පෙර ෂෙරීෆ් ට වෛද්යවරු බොක්සිං වළල්ල තුළම ප්රතිකාර ලබා දුන්නා. එහෙත් ඒ වෛද්ය උත්සාහයන් මධ්යයේත් ඔහු මිය ගිය බව නිවේදනය කෙරුනා.
වෛද්යවරුන් වහාම පැමිණ ෂෙරීෆ් ට බොක්සිං වළල්ල තුළ මිනිත්තු විස්සක් පමණ ප්රතිකාර කළ ද ඔහුගේ ජීවිතය බේරා ගැනිමට නොහැකි වුනා. මෙය සිදුවුනේ සෙනඟ පිරුනු ශාලාවක බැවින් සියළු දෙනාම ගල්ගැසී බලා සිටියා.
තරගයේ තෙවැනි වටය අවසන් වන විටත් ෂෙරීෆ් තුවාල ලබා සිටියා. එහෙත් තරගයේ සිවුවන හා අවසන් වටය සඳහා නැවත පිවිසි ඔහුගේ හිසට මාරාන්තික පහර එල්ල වුනේ ප්රතිවාදී ක්රීඩකයාගේ දකුණු අතින්.
ෂෙරීෆ්ගේ සිද්ධියත් සමග එදිනට නියමිතව තිබූ අනෙකුත් තරග සියල්ල කල් තැබුනා.
මේ බොක්සිං සටන්කරුවාගේ පවුල වෙනුවෙන් ක්රීඩා ලෝලීන් දහස් ගණනින් මුදල් එකතු කර ගත්තා.
මේ හදිසි මරණයෙන් පසුව ඔහුගේ සොයුරිය වන කෑතරින් (Katherine) ඇගේ සොහොයුරාගේ අවමඟුලට වියදම් කිරීමට උපකාර ලබා ගැනීමේ අරමුණෙන් GoFundMe පිටුවක් නිර්මාණය කළා.
ඇය එහි මෙසේ ලියා තිබුනා: “ෂෙරීෆ්ඩීන් ඔහු ආදරය කළ සහ ඔහුගේ මුළු ජීවිතය ම කැප කළ ක්රීඩාව කරමින් සිටියදී මිය ගියා.”
“මානසික සෞඛ්ය රෝගීන්ට සාත්තු කරන්නෙක් බවට පත්වීමට කටයුතු කරමින් සිටින අතරතුර ඔහු මානසික සෞඛ්යයේ කැපවුනු ආධාරකරුවකු ද වී සිටියා.”
“මේ අරමුදල් රැස්කිරීමේ අරමුණ වන්නේ ඔහුගේ අවමංගල්යයට යන වියදම සොයා ගැනීම යි. ලබා දෙන ඔ්නෑම සහයෝගයක් ඉතාමත් අගය කොට සළකනවා” යනුවෙන් එම පිටුවේ ඇය සඳහන් කර තිබුනා.
පවුම් 15,000ක් ඉලක්ක කරමින් පිහිටුවූ මේ අරමුදලට දින තුනක් යාමට පෙර පවුම් 10,000කට වැඩි මුදලක් එකතු වී තිබුනා.
ෂෙරීෆ් ලවල්ගේ ලන්ඩනයේ St Pancras බොක්සිං සමාජය අභියස ක්රීඩා ලෝලීන් මල් වඩම් දමා ගොස් තිබුනු අතර ෂෙරීෆ්ගේ පුහුණුකරු වන ක්ලේයා විලියම්ස් (Claire Williams) වෙනම GoFundMe පිටුවක් මගින් තමාගේ මිය ගිය බොක්සිං තරගකරුවාගේ පවුල වෙනුවෙන් පවුම් 2,600ක් රැස්කර ගෙන තිබුනා.
ෂෙරීෆ් මිය යන විට උතුරු මිඩ්ල්සෙක්ස් සරසවියේ සාත්තු සේවය පිළිබඳව හදාරමින් සිටියා.
එංගලන්ත බොක්සිං ක්රීඩකයන් හා බොක්සිං බළධාරීන් ඇතුළු විශාල පිරිසක් ෂෙරීෆ්ගේ මරණය පිළිබඳව ශෝක පණිවුඩ එවා තිබුනා.
ෂෙරීෆ් ලවල් බොක්සිං ක්රීඩා කළේ 2018 වසරේ සිට. ඔහු සිය ආධුනික බොක්සිං ක්රීඩා දිවිය අකුලා ගෙන තමා වෘත්තීය බොක්සිං ක්රීඩාවට පිවිසෙන බව ප්රකාශ කළේ මේ වසර මුලදී.
ඒ වන විට ඔහුගේ පුහුණුකරුව සිටියේ ටයිසන් ෆියුරිගේ 2009 ප්රතිවාදියා වූ ජෝන් මැක්ඩමොට්ගේ ද පුහුණුකරු වූ CJ Hussein. වෘත්තීය බොක්සිං තරග බිම ෂෙරීෆ් ට වඩා හොඳින් ගැලපෙනු ඇතැයි තමා සිතන බවත් විශිෂ්ට මිඩ්ල්වේට් ක්රීඩකයෙක් බවට පත්වීමට අවශ්ය සියළු සහජ දක්ෂතාවන් ඔහු සතුව තිබෙන බවත් එම පුහුණුකරු එදා ප්රකාශ කර තිබුනා.
සටහන :
(වර්නන් ගුණසේකර)
ජ්යෙෂ්ඨ මාධ්යවේදී
