හිටපු ශ්‍රී ලංකා රග්බි ක්‍රීඩිකාවක වන චාරනි ලියනගේ ශ්‍රී ලංකාවේ පාසල් ‘ඒ’ කොටසේ රග්බි තරගාවලියේ ප්‍රථම තරග විනිසුරුවරිය බවට පත්වීමට නියමිතව සිටිනවා.

‘ඒ’ කොටසේ පාසල් රග්බි තරගයක් පාලනය කරමින් ඇය පළමු පාසල් රග්බි තරග විනිසුරුවරිය ලෙස ඉතිහාසගත වනු ඇත්තේ තර්ස්ටන් හා වෙස්ලි විදුහල් අතර සෙනසුරාදා (22) රත්මලාන ගුවන් හමුදා රග්බි ක්‍රීඩාංගණයේ පැවැත්වීමට නියමිත තරගයෙන්.

කොලොන්නාවෙන් එන තරුණ ක්‍රීඩිකාවක වන චාරනි දෙමටගොඩ සාන්ත අන්තෝනි බාලිකා විදුහලෙන් අපොස උසස් පෙල සම්පූර්ණ කිරීමෙන් පසුව 2009 වසරේදී ශ්‍රී ලංකා යුද හමුදාවට බැඳුනා. එහිදී අන්තර්-රෙජිමේන්තු රග්බි ක්‍රීඩා කළ ඇය 2016 වසරේදී ප්‍රථම වතාවට ශ්‍රී ලංකාව නියෝජනය කළා. එතැන් සිට ඇය ජාතික කාන්තා රග්බි කණ්ඩායමේ ස්ථිර ක්‍රීඩිකාවක් ලෙස ඇගේ ස්ථානය රැක ගැනීමට සමත් වුනා.

රග්බි ක්‍රීඩාවේ තිබෙන සිය උනන්දුව ව්‍යාප්ත කිරීමට තීරණය කළ චාරනි ලියනගේ 2022 වසරේදී ශ්‍රී ලංකා රග්බි විනිසුරුවන්ගේ සංගමයේ සාමාජිකාවක් බවට පත්වුනා. එහිදී ඇය සංගමයේ විනිසුරු පුහුණුව හා සංවර්ධන වැඩසටහන්වලට සහභාගි වුනේ ඉතාමත් කැපවීමකින්, ආශාවකින් හා ආත්ම විශ්වාසයකින් යුතුව.
 
 
image cce8102bcc චාරනි ලියනගේ හා අයේෂා පෙරේරා 

වැඩි කල් නොගොස් චාරනි දිවයිනේ සැලකිය යුතු රග්බි නිලධාරිනියක ලෙස ස්ථාපිත වූයේ 2023-2024 ක්‍රීඩා වාරයේදී ප්‍රථම වතාවට අයේෂා පෙරේරා සමග අන්තර් සමාජ ‘ඒ’ කොටසේ සහාය විනිසුරුවරියක ලෙස කටයුතු කරමින්.

තර්ස්ටන් - වෙස්ලි පාසල් රග්බි තරගය විනිශ්චය කිරීම පිණිස චාරනි ලියනගේ පත්කිරීම පිළිබඳව ශ්‍රී ලංකා රග්බි විනිසුරුවන්ගේ සංගමයේ සභාපති ඩින්ක පීරිස් මෙසේ ප්‍රකාශ කරනවා.

 
“මෙය ශ්‍රී ලංකා රග්බි ක්‍රීඩාවට ඉතාමත් ආඩම්බර දවසක්. රග්බි තරග විනිසුරුවරියන් වීම සඳහා තව බොහෝ දෙනෙකුට මං විවර කිරීමට චාරනි මගපෙන්වන්නියක වනු ඇතැයි අපි ප්‍රාර්ථනා කරනවා. රටේ සෑම පලාතකින්ම කාන්තාවන් රග්බි විනිශ්චය සඳහා උනන්දු කරවීමට අපි අදහස් කරනවා. චාරනි මෙන්ම රග්බි විනිසුරුවරියන් ලෙස කටයුතු කරන අනෙක් අයටත් අපි සුභ පතනවා!”


සටහන :
warnan Gunasekara
(වර්නන් ගුණසේකර)
ජ්‍යෙෂ්ඨ මාධ්‍යවේදී
This email address is being protected from spambots. You need JavaScript enabled to view it.
 

worky sin

Follow Us

Image
Image
Image
Image
Image
Image

නවතම පුවත්