මේ ග්රීෂ්ම සෘතුවේ පැරිසියේ පැවැත්වීමට නියමිත ඔලිම්පික් හා පැරාලිම්පික් ක්රීඩා උළෙලට තවත් මාසයක කාලයක් පමණක් ඉතිරිව තිබියදී
දේශගුණයේ උෂ්ණත්වය අතිශයින් ඉහළ යාමේ අවදානම් තත්ත්වය පිළිබඳව අවධානය යොමුව තිබෙනවා.
යුරෝපයේ සමහර තැන්වල දැනටමත් සෙන්ටිග්රේඩ් අංශක 40 ට වැඩි උෂ්ණත්වයක් වාර්තා වී තිබෙන අතර යුරෝපයේ අනෙකුත් ප්රදේශවල ද ඉදිරි මාසවලදී අධි උෂ්ණ කාලගුණයක් තිබීමට ඉඩ තිබෙනවා.
දේශගුණයේ වෙනස්වීම ක්රීඩාවට පවතින තර්ජනයක් ලෙස අවධානයෙන් සිටිය යුතු බව ලෝක මලල ක්රීඩා සම්මේලනය දන්වා තිබෙනවා.
අධික උෂ්ණත්වය තරගවලට, තරගකරුවන්ට, නරඹන්නන්ට හා නිලධාරීන්ට දැඩිව බලපානු ඇතැයි ඔවුන් අනතුරු අඟවනවා.
ඔලිම්පික් කාලය තුළ පැරිසියේ කාලගුණය කෙබඳු වේවිද යන්න තවමත් නොදන්නා කරුණක් වූව ද ප්රංශයේ ජාතික කාලගුණ සේවාව වන Metro France ප්රකාශ කර තිබෙන්නේ එළඹෙන ග්රීෂ්ම සෘතුව සාමාන්ය කාලගුණික තත්ත්වයන්ට වඩා උණුසුම් වනු ඇති බව.
ප්රංශය අතීතයේදී මාරක ග්රීෂ්ම අධි උෂ්ණත්ව කාලගුණයන් අත්විඳ තිබෙනවා.
2019 වසරේ ජූලි මස අවසානයේ පැරිසියේ ඉහළ ම උෂ්ණත්වය සෙන්ටිග්රේඩ් අංශක 42.6ක් ලෙස සටහන්ව තිබුනා.
ඊට පසුව මෑතකදී, එනම් 2022දී, අධික තාපයෙන් යුත් කාලගුණයක් තිබූ දිගු කාලය තුළ වැඩිම උෂ්ණත්වය වී තිබුනේ සෙන්ටිග්රේඩ් අංශක 36ක්.
ඒ වසරේදී ප්රංශයේ සංඛ්යා ලේඛන හා ආර්ථික පර්යේෂණ ආයතනය ග්රීෂ්ම සෘතුව තුළ අධික උෂ්ණත්වය නිසා මරණ 11,000ක් සිදුවූ බවට ඇස්තමේන්තු කර තිබුනා.
2021 වසරේ ටෝකියෝ නුවර පැවති පසුගිය ඔලිම්පික් ක්රීඩා උළෙලේදී පරිසරයේ තිබූ අතිශයෙන් වැඩි උෂ්ණත්වය ක්රීඩක ක්රීඩිකාවන්ට හා ස්වේච්ඡා සේවකයන්ට ඉතාමත් වේදනාකාරී වුනා.
බොහෝ ඩහදිය ඇතිකරන සෙන්ටිග්රේඩ් අංශක 34ක උෂ්ණත්වයක් සහ සියයට 70ක තෙතමනයක් නිසා සෙන්ට්රිග්රේඩ් අංශක 47ක උෂ්ණත්වයක් දැනුනු එම ක්රීඩා උළෙල මෙතෙක් වාර්තා වී තිබෙන වැඩිම උෂ්ණාධික ඔලිම්පික් ක්රීඩා උළෙල යි.
තරගය පැවති අතරතුර තිබූ උෂ්ණත්වය නිසා තරග පිටියේ මිය යාමට ඉඩ තිබුනු බව
ටෙනිස් ක්රීඩක Daniel Medvedev එදා පවසා තිබුනා.
මලල ක්රීඩා තරගකරුවන් අධික උෂ්ණත්වය හේතුවෙන් අවසාන රේඛාවේදී වමනය දමමින් ක්ලාන්තව ඇද වැටුනා.
1924 වසරේ සිට ජූලි හා අගෝස්තු මාසවල පැරිසියේ වැඩිම උෂ්ණත්වය සෙන්ටිග්රේඩ් අංශක 2.2ක සාමාන්යකින් වැඩියෙන් උණුසුම් වී තිබෙන බව වාර්තා වනවා.
රාත්රී කාලයේ උෂ්ණත්වය ද වැඩි අගයක පවතිනු ඇතැයි අපේක්ෂා කෙරෙනවා. 1924 සිට පැරිසියේ අවම උෂ්ණත්වය සෙන්ටිග්රේඩ් අංශක 3කට ආසන්න ප්රමාණයකින් ඉහළ ගොස් තිබෙනවා.
ටෝකියෝ ඔලිම්පික් ක්රීඩා උළෙලේදී අධික උෂ්ණත්වයේ අත්දැකීම් ලත් ක්රීඩකයන්ගෙන් ද ලබා ගත් වාර්තාවකින් මීට විසඳුම් කිහිපයක් යෝජනා කර තිබෙනවා. සිසිල් කාලගුණයක් තිබෙන කාලය තුළ එළිමහන් තරග පැවැත්වීම, ප්රමාණවත් විවේකයන් ලබා දී ක්රීඩකයන් ආරක්ෂිතව තබා ගැනීම හා ඔවුන් අධික උෂ්ණත්වයට නිරාවරණය වීම අවම කිරීම මෙහි ප්රධාන තැනක් ගන්නවා.
උෂ්ණත්වය අතිශයෙන් වැඩි වුවහොත් ජලය පානය කිරීම සඳහා වැඩි වේලාවක විරාමයන් ලබා දීම හෝ තරග නතර කිරීමට පවා ඉඩ තිබෙනවා.
උෂ්ණත්ව දර්ශකය සෙන්ටිග්රේඩ් අංශක 32.2 ට වැඩි වුවහොත් තුන් ප්රයාම ඉසව්ව කල්දැමෙනු ඇති අතර ජලයේ උෂ්ණත්වය සෙන්ටිග්රේඩ් අංශක 33 ට වඩා වැඩි වුනොත් එම ඉසව්වේ පිහිනුම් අදියර අහෝසි කෙරෙනු ඇතැයි පැවසෙනවා.
කාලගුණ වාර්තාව ගැන දැඩි විමසිල්ලෙන් සිට ඒ අනුව තමන්ගේ කටයුතු සංවිධානය කර ගන්නා ලෙසට නරඹන්නන්ට අවවාද කර තිබෙනවා.
සටහන :
(වර්නන් ගුණසේකර)
ජ්යෙෂ්ඨ මාධ්යවේදී
