ශ්‍රී ලංකා උත්තේජක මර්දන නියෝජ්‍යායතනයේ (SLADA) සභාපති ලෙස වසර 13ක් සේවය කළ මහාචාර්ය අර්ජුන ද සිල්වා එම තනතුරෙන්
ඉල්ලා අස්වෙයි.
මෙයට සති ගණනාවකට පෙර ගත් එම තීරණය පෙරේදා (18) පැවති මාධ්‍ය හමුවකදී ඔහු නිල වශයෙන් ප්‍රකාශ කළේය.
මහාචාර්ය අර්ජුන ද සිල්වා කැළණිය විශ්ව විද්‍යාලයේ වෛද්‍ය පීඨයේ වෛද්‍ය අංශයේ ප්‍රධානියා ලෙසත් උතුරු කොළඹ ශීක්ෂණ රෝහලේ උපදේශක වෛද්‍යවරයකු ලෙසත් දැනට කටයුතු කරයි.
තවත් ක්‍ෂ්ත්‍රයේ පළපුරුදු අයෙකුට කටයුතු කිරීමේ අවස්ථාව සලසාදීමට තමන් ඉල්ලා අස්වූ බව ඔහු මෙම මාධ්‍ය හමුවේදී පැවසීය.
එහිදී තවදුරටත් අදහස් දැක්වූ මහාචාර්ය අර්ජුන ද සිල්වා, වසර 2011 සිට එම ආයතනයට සේවය ලබාදීමේදී ජනාධිපතිවරුන් තිදෙනකු හා ක්‍රීඩා ඇමැතිවරුන් අට දෙනකු යටතේ තමන් කටයුතු කළ බවත් එයින් තමා ඉවත්ව යන්නේ ආසියානු රටවල ක්‍රියාකාරී තහනම් උත්තේජක (ජාතික) මර්දන ආයතන අතර ශ්‍රේණිගත කිරීම්හි ශ්‍රී ලංකාව හය වැනි ස්ථානයට පත් කරමින් බවත් පැවැසීය.
වසර 2010 දී ශ්‍රී ලංකා බොක්සිං ක්‍රීඩක මංජු වන්නිආරච්චි දිනාගත් පොදු රාජ්‍ය මණ්ඩලයීය රන් පදක්කම ඔහු තහනම් උත්තේජක පාවිච්චි කර තරග වැදුණු බවට තහවුරුවීමෙන් අවලංගු කෙරුණි.
එයින් පසුව මෙරට ක්‍රීඩා ක්ෂේත්‍රයෙන් තහනම් උත්තේජක පිටු දැකීම හා පාලනය කිරීම සදහා 2011 දී ස්ථාපිත කළ ක්‍රීඩා වෛද්‍ය හා තහනම් උත්තේජක මර්දන අංශයේ අධ්‍යක්ෂ ජනරාල් ලෙස පළමු පත්වීම ලබමින් සිල්වා මෙම ක්ෂේත්‍රයට අවතීර්ණ විය.
වසර 2013දී තහනම් උත්තේජක මර්දන පනත පාර්ලිමේන්තුවේ සම්මත වූ අතර, එය ජාත්‍යන්තර ප්‍රජාවගේ පැසසුමට ලක්විය.
2016 සිට 2019 දක්වා අර්ජුන ද සිල්වා දකුණු ආසියා තහනම් උත්තේජක මර්දන සභාපතිවරයා ලෙස ද කටයුතු කළේය.
තහනම් උත්තේජක මර්දන නියෝජ්‍යාතනයට අංග සම්පූර්ණ නව ආයතන පරිශ්‍රයක් ඉදි කිරීම, නිතිවිරෝධි තහනම් උත්තේජක ද්‍රව්‍ය විකිණීමේ ජාවාරම මැඩ පැවැත්වීම, එම අනතුර හමුවේ ආහාර පාන හා ඖෂධ පිළිබඳව මෙරට ක්‍රීඩක ක්‍රීඩිකාවන්ට පුළුල් දැනුමක් පළමු වතාවට දැනුවත් කිරීම, ආසියානු හා ශාන්තිකර අමාත්‍ය මණ්ඩල 15 වැනි හා 18 වැනි රැස්වීම් සදහා ශ්‍රී ලංකාවේ සත්කාරය ලබාදීම, අති නවීනතම විද්‍යාගාරයක් ආයතන පරිශ්‍රයේ ස්ථාපිත කිරීම සිය සේවා කාලය තුළදී ඉටුවූ ප්‍රධාන සේවාවන් බව මහාචාර්ය අර්ජුන මාධ්‍ය හමුවේදී පැවැසීය.
උත්තේජක මර්දන නියෝජ්‍යායතනය ලෙස ශ්‍රී ලංකාව ලබා ඇති ප්‍රගතිය හේතුවෙන් ජාත්‍යන්තර ක්‍රිකට් කවුන්සිලය (අයිසීසී) යටතේ පවතින තරගාවලිවල තහනම් උත්තේජන පරීක්ෂා ලබාදීමට එකඟවී ඇතැයි ද ඔහු එම මාධ්‍ය හමුවේදී පැවසීය. එයින් ඉදිරියේදී ශ්‍රී ලංකාවට විශාල ඩොලර් ආදායමක් ලබාගත හැකි බව මහාචාර්යවරයා පෙන්වා දුන්නේය.
“ගෙවී ගිය කාලය තුළ අප ලැබූ ප්‍රගතිය විශාලයි. ඒ නිසාම කිසිදු ජාත්‍යන්තර තරගයකදී අපේ ක්‍රීඩකයකුට තහනම් උත්තේජක චෝදනා එල්ල වෙලා නෑ. දෙක තුනක් ශ්‍රී ලංකාවේ පැවති තරගවලදී වාර්තා වුණා. අපි කඩා පැනලා පරීක්ෂණ කරනවාට වඩා තහනම් උත්තේජක භාවිතයෙන් සිදු වන විපාක සම්බන්ධයෙන් අධ්‍යාපන වැඩසටහන් කරනවා. හරි වේලාවට තනතුරු අත්හල යුතුයි. තවත් කෙනෙකුට අවස්ථාව දීලා තනතුරෙන් ඉවත්වීමට තීරණය කළා” මහාචාර්ය අර්ජුන ද සිල්වා වැඩිදුරටත් කියා සිටියේය.
මේ මාධ්‍ය හමුවට ශ්‍රී ලංකා උත්තේජක මර්දන නියෝජ්‍යායතනයේ අධ්‍යක්ෂ ජනරාල් වෛද්‍ය ශිරෝමි පිලපිටිය හා වෛද්‍ය ධම්මික සේනානායක ඇතුළු විශාල පිරිසක් එක්ව සිටියහ.
හිස්වූ ධූරයට වෛද්‍ය ශිරෝමි පිලපිටිය නිර්දේශ වනු ඇතැයිද වාර්තාවේ.
