මංගල ටෙස්ට් ක්රිකට් තරගයක අංක 9 පිතිකරුවා ලෙස ක්රීඩා කරමින් ලකුණු 80කට වැඩියෙන් ලබා ගත් ටෙස්ට් ක්රිකට් ඉතිහාසයේ
පළමු ක්රීඩකයා බවට දකුණු අප්රිකානු කණ්ඩායමේ තුන් ඉරියව් ක්රීඩක කෝර්බන් බාෂ් (Corbin Bosch) පත්ව සිටිනවා. මීට අමතරව, මංගල ටෙස්ට් තරගයේ අංක 8 හෝ ඊට පහළින් පිතිකරණයේ නියැලෙමින් වැඩිම ලකුණු රැස්කළ දකුණු අප්රිකානු පිතිකරුවෙකුගේ වසර 122ක් පැරණි වාර්තාව ද බාෂ් බිඳ දමා තිබෙනවා.
කෝර්බන් බාෂ් ඉතිහාසයේ නව පිටුවක් පෙරලමින් මේ අද්විතීය හපන්කම ප්රදර්ශනය කළේ සෙන්චූරියන් හි දී තමාගේ පළමු ටෙස්ට් ක්රිකට් තරගයට ක්රීඩා කරමින්. පාකිස්තානය ට එරෙහි පළමු ටෙස්ට් ගැටුමේ පළමු ඉනිමේදී කඩුලු 4ක් ලබා ගැනීමට අමතරව ලකුණු 81ක් ද රැස් කළේ අංක 9 පිතිකරු ලෙස පන්දුවට පහර දෙමින්.
මේ අනුව බාෂ්, මංගල ටෙස්ට් තරගයේ ක්රීඩා කරමින් අර්ධ ශතකයක් හා කඩුලු හතරක් ලබා ගත් එදා මෙදා තුර පළමු දකුණු අප්රිකානු ක්රීඩකයා බවට පත්වීමට ද සමත් වුනා.
වේග පන්දු යවන්නෙකු වන කෝර්බන් බාෂ් අංක 9 පිතිකරු ස්ථානයේ ක්රීඩා කරමින් නොදැවී ලකුණු 81ක් රැස් කළේ ආක්රමණශීලී පිතිහරඹයක යෙදෙමින්. පන්දු 93ක ඔහුගේ නොදැවුනු ඉනිමට හතරේ පහර 15ක් ඇතුළත්ව තිබුනා. ඊට පෙර ඔහු ලකුණු 63කට කඩුලු 4ක් ලබා ගත්තා.
මංගල ටෙස්ට් තරගයක අංක 9 ස්ථානයේ පිතිකරණයේ යෙදෙමින් නමක් තැබූ කීර්තිමත් ක්රීඩකයින්ගේ ලැයිස්තුවක කෝර්බන් බාෂ් ඉහළටම පිවිසියේ මෙතෙක් එම ලැයිස්තුවේ පෙරමුණේ සිටි ශ්රී ලංකාවේ මිලාන් රත්නායක අභිබවමින්.
මංගල ටෙස්ට් ක්රිකට් තරගයක අංක 9 පිතිකරුවෙකුගෙන් වාර්තා වූ වැඩිම ලකුණු
නොදැවී 81 - කෝර්බන් බාෂ් (දකුණු අප්රිකාව) 2024 සෙන්චූරියන්, පාකිස්තානය ට එරෙහිව
72 - මිලාන් රත්නායක (ශ්රී ලංකාව) 2024 ඔ්ල්ඩ් ට්රැෆර්ඩ්, එංගලන්තය ට එරෙහිව
71 - බාල්වින්ඩර් සන්ධු (ඉන්දියාව) 1983 හයිද්රාබාද්, පාකිස්තානය ට එරෙහිව
65 - ඩැරන් ගෝ (එංගලන්තය) 1994 ඔ්ල්ඩ් ට්රැෆර්ඩ්, නවසිලන්තය ට එරෙහිව
59 - මොන්ඩී සොන්ඩෙකි (දකුණු අප්රිකාව) 2003 හෙඩිංලි, එංගලන්තය ට එරෙහිව
(සටහන | වර්නන් ගුණසේකර)
ජ්යෙෂ්ඨ මාධ්යවේදී
