මේ මස අග ඇරඹෙන කාන්තා එක්දින ලෝක කුසලාන ක්රිකට් තරගාවලියේ සියලු තරග විනිශ්චය කරන්නේ කාන්තාවන් පමණයි.
ඉන්දියාව හා ශ්රී ලංකාවේදී සැප්තැම්බර් 30 සිට නොවැම්බර් 2 දක්වා පැවැත්වෙන තරගාවලියේ නිලධාරිනියන් ලෙස රටවල් නවයකින් පත්කර තිබෙන තරග අධීක්ෂණ විනිසුරුවරියන් සිවු දෙනෙක් සහ පිටිය හා රූපවාහිනී තරග විනිසුරුවරියන් 14 දෙනෙකුගේ නම් ජාත්යන්තර ක්රිකට් කවුන්සලය ඊයේ නිවේදනය කළා.
ශ්රී ලාංකිකයන් දෙදෙනෙකු ද මීට ඇතුළත්. එක් අධීක්ෂණ විනිසුරුවරියක ලෙස මිචල් පෙරෙයිරා ද, පිටියේ හා රූපවාහිනියේ එක් තරග විනිසුරුවරියක ලෙස නිමාලි පෙරේරා ද තරගාවලියේ විනිසුරු මඬුල්ලට ඇතුළත්ව සිටිනවා.
සිවු දෙනෙකුගෙන් සමන්විත තරග අධීක්ෂණ විනිසුරු මඬුල්ලේ සිටින අනෙක් තිදෙනා නවසිලන්තය, දකුණු අප්රිකාව හා ඉන්දියාවෙන්. පිටිය හා රූපවාහිනී සෙසු විනිසුරුවරියන් ලෙස ඉන්දියාවෙන් තිදෙනෙකු ද ඔස්ට්රේලියාව, බටහිර ඉන්දීය කොදෙව් හා දකුණු අප්රිකාවෙන් දෙදෙනෙකු බැගින් ද එංගලන්තය, නවසිලන්තය, සිම්බාබ්වේ හා බංග්ලාදේශය යන රටවලින් එක් කෙනෙකු බැගින් ද පත්කර තිබෙනවා.
මේ අය අතරින් ඔස්ට්රේලියාවේ ක්ලෙයා පොලොසැක්, බටහිර ඉන්දීය කොදෙව් හි ජැකලින් විලියම්ස් සහ එංගලන්තයේ සූ රෙඩ්ෆර්න් මෙවර සහභාගි වන්නේ ඔවුන්ගේ තෙවැනි කාන්තා එක්දින ලෝක කුසලාන තරගාවලියට. දකුණු අප්රිකාවේ ලෝරන් එජන්බෑග් සහ නවසිලන්තයේ කිම් කොට්න් ලෝක කුසලානයේ තරග විනිශ්චයේ යෙදෙන්නේ දෙවැනි වතාවට.
එංගලන්තයේ බර්මිංහැම් හි පැවති 2022 පොදුරාජ්ය මණ්ඩල ක්රීඩා උළෙල සහ මීට පෙර වඩාත්ම ආසන්නයේ පැවති කාන්තා විස්සයි20 ලෝක කුසලාන තරගාවලියන් දෙකේදීත් දක්නට ලැබුනේ කාන්තාවන්ගෙන් පමණක් සමන්විත වූ තරග නිලධාරී හා විනිසුරු මඬුලු.
13 වැනි කාන්තා එක්දින ලෝක කුසලාන ක්රිකට් තරගාවලිය ආරම්භ වන්නේ සත්කාරක රටවල් දෙක වන ඉන්දියාව හා ශ්රී ලංකාව අතර සැප්තැම්බර් 30 වැනි දින පැවැත්වෙන තරගයෙන්. තරග පැවැත්වෙන්නේ ගුවහාටි, ඉන්දෝර්, විසාඛාපට්නම්, නවි මුම්බායි හා කොළඹ යන නගරවල.
(වර්නන් ගුණසේකර)
ජ්යෙෂ්ඨ මාධ්යවේදී
