මහා බ්රිතාන්යයේ වඩාත්ම ජනප්රිය හා ලොව විශාලතම අර්ධ මැරතන් තරගය වන නිවුකාසල් නගරයේ Great North Run
ධාවනයේ සංවිධායකයන්ට හාස්ය දනවන වැරැද්දක් සිදුව තිබෙන්නේ ඔවුන්ගේ නිල පදක්කම්වල වැරදි නගරයක හා ගංගාවක සිතියම සටහන් කිරීමෙන්. මේ වැරැද්දට ඔවුන් තරගයට සහභාගි වූ 60,000ක් දෙනාගෙන් සමාව ඉල්ලා තිබෙනවා.
නිවුකාසල් නගරය හරහා ගලා යන ටයින් (Tyne) ගඟ වෙනුවට එම පදක්කමේ දිස්වන්නේ යාබද සන්ඩලන්ඩ් නගරයේ වෙය (Wear) ගංගාව. තරගය පැවති දිනයේ තරගය අවසන් කළ සෑම කෙනෙකුටම පිරිනමන ලද පදක්කම්වල මේ වැරැද්ද තිබුනා.
මේ වැරදීම සමාජ මාධ්යයේ වේගයෙන් පැතිර ගිය අතර සිදුවූ භූගෝලීය මිශ්ර වීම සම්බන්ධයෙන් තරග සංවිධායකයින් ඔවුන්ගේ පසුතැවීම ප්රකාශ කරමින් නිවේදනයක් පෝස්ට් කිරීමට වහාම පියවර ගත්තා.
මේ අර්ධ මැරතන් තරගයේ නිර්මාතෘවරයා වන්නේ 1976 ඔලිම්පික් පදක්කම්ලාභියෙකු වන සර් බ්රෙන්ඩන් ෆොස්ට. තමා ට ද මේ වැරැද්ද ඇස නොගැසුනු බව ඔහු පිළිගත්තා.
“පදක්කමේ මෝස්තරය ගැන මවිත වෙමින් මම දවස් ගණනාවක් ගත කළත් කවදාවත් මේ වැරැද්ද මට අහුවුනේ නැහැ” ඔහු කියා සිටියා.
මේ වසරේ Great North Run තරගයේ ශූරයා වුනේ 2024 ලන්ඩන් මැරතන් තරගය ජයග්රහණය කළ ඇලෙක්සැන්ඩ මුටිසො.
නිව්යෝක් මැරතන් තරගයේ ශූරිය වූ ෂීලා චෙප්කිරුයි කාන්තා තරගයේ ජයග්රාහිකාව වුනා.
සිදුවූ මේ වැරැද්දෙන් පසුව තමන් ඊසානදිග එංගලන්තයේ භූගෝලය පිළිබඳව ඉතා හොඳන් අධ්යයනය කරන බවට තරග සංවිධායකයින් පොරොන්දු වී තිබෙනවා.
(සටහන | වර්නන් ගුණසේකර)
ජ්යෙෂ්ඨ මාධ්යවේදී
