ආසියානු කුසලාන ක්රිකට් තරගාවලියේ තවදුරටත් ක්රීඩා කරනවා ද යන්න පිළිබඳව අවසන් තීරණයක් ගැනීම සඳහා පාකිස්තාන ක්රිකට් මණ්ඩලය (PCB) ඊයේ රාත්රියේ හදිසි රැස්වීමක් කැඳවූ බව Cricbuzz වාර්තා කරනවා. පාකිස්තාන කණ්ඩායම ඔවුන්ගේ මුලික වටයේ අවසාන තරගය අද (බදාදා) රාත්රියේ එක්සත් අරාබි එමීර් රාජ්යය කණ්ඩායම සමග ක්රීඩා කිරීමට නියමිතයි.
ඉන්දියාව සමග පැවති තරගයේදී ඇතිවූ දෙපිලේ ක්රීඩකයන්ගේ අතට අත දීමේ මතභේදාත්මක සිද්ධියෙන් පසුව ඇන්ඩි පයික්රොෆ්ට් තරගාවලියේ තරග තීරක මඬුල්ලෙන් ඉවත් කරන ලෙසට PCBය කළ ඉල්ලීම ජාත්යන්තර ක්රිකට් කවුන්සලය (ICC) විසින් ප්රතික්ෂේප කිරීමෙන් පසුව පාකිස්තාන ක්රිකට් බලධාරීන් පරස්පර සංඥා නිකුත් කර තිබෙනවා.
ඩුබායි දේශයේ අධික උෂ්ණත්වය යටතේ පාකිස්තාන සංචිතයේ ක්රීඩකයින් 15 දෙනාම ඊයේ දැඩි වෙහෙසකාරී පුහුණුවීම්වල නිරතව සිටිය ද, පිටියෙන් පිටතදී ඔවුන් ලාහෝරයේ පාකිස්තාන ක්රිකට් පාලක මණ්ඩලයෙන් උපදෙස් ලැබෙන තුරු බලා සිටි බව එම වාර්තාව සඳහන් කරනවා.
PCB ප්රධානී මෝසින් නක්වි
PCB ප්රධානී මෝසින් නක්වි ඉස්ලාමාබාද් නුවර සිට ලාහෝර නගරයට පැමිණීමෙන් පසුව රාත්රී සාකච්ඡාවක් පැවැත්වූ බවත් එහිදී ඔහු පාකිස්තාන කණ්ඩායම ආසියානු තරගාවලියේ තවදුරටත් රැඳී සිටීම සම්බන්ධයෙන් පාකිස්තාන රජයෙන් උපදෙස් ඉල්ලා ඇති බවත් එම වාර්තාවෙන් ප්රකාශ වනවා.
පාකිස්තානය ට එරෙහිව ඉරිදා ලැබූ කඩුලු හතක ජයග්රහණයෙන් පසුව තම කණ්ඩායමේ ක්රියා පිළිවෙත අනුමත කරමින් කතා කළ ඉන්දියා ක්රිකට් නායක සූර්යකුමාර් යාදව්, ඔවුන් පාකිස්තාන ක්රීඩකයින් සමග අතට අත නොදීමේ ක්රියාවෙන් ප්රදර්ශනය කළේ පාකිස්තානයේ සහාය ලබන ත්රස්තවාදීන් විසින් පුද්ගලයන් 26 දෙනෙකුට මරු කැඳවමින් සිදුකළ පහල්ගම් ප්රහාරයෙන් ජීවිත අහිමි වූ පුද්ගලයන්ගේ පවුල් සමග තම කණ්ඩායමේ තිබෙන සහයෝගිතාව බව පෙන්වා දුන්නා.
ඉන්දියා කණ්ඩායම මෙසේ හැසිරුනේ සිය පරම ප්රතිවාදීන් වන පාකිස්තානය සමග තවදුරටත් ක්රිකට් ක්රීඩා කිරීම සම්බන්ධයෙන් ඉන්දියා ජනතාවගෙන් එල්ල වී තිබෙන විරෝධතාවලින් පසුව.
(සටහන | වර්නන් ගුණසේකර)
ජ්යෙෂ්ඨ මාධ්යවේදී
