ඔස්ට්රේලියානු පුරාවෘත්ත පිතිකරු ඩොන් බ්රැඩ්මන් ඉන්දියාව ට එරෙහි 1947-48 ක්රිකට් තරගාවලියේ පැළඳ සිටි කොළපාට
‘බැගී’ කැප් තොප්පිය ඔස්ට්රේලියාවේ ගෝල්ඩ් කෝස්ට් නගරයේ පැවති වෙන්දේසියකදී ඩොලර් 460,000කට අලෙවි වී තිබෙනවා.
මෙය මේ ශ්රේෂ්ඨ ඔස්ට්රේලියානු පිතිකරුවා විසින් පළඳිනු ලැබූ කැප් තොප්පියකට ලැබුණු ඉහළම මිල බව වාර්තා වනවා.
බ්රැඩ්මන් මේ කැප් තොප්පිය ඉන්දියානු ක්රිකට් ක්රීඩක ශ්රීරංග වාසුදේව් සොහොනි (Sriranga Wasudev Sohoni) ට ත්යාග කර තිබෙන අතර ඔහුගේ පවුල එය වසර 75ක් තිස්සේ ආරක්ෂා කර තිබෙනවා.
“එයින් කියන්නේ මේ කැප් තොප්පිය පරම්පරා තුනක් යතුරු දමා සුරක්ෂිතව තබාගෙන සිටි බවයි. පවුලේ සාමාජිකයෙකුට එය දකින්න ඉඩ ලැබුනේ වයස අවුරුදු 16 වූ විටයි. ඒකත් මිනිත්තු පහකට පමණයි” ලොයිඩ් වෙන්දේසිකරුවන් හා තක්සේරුකරුවන්ගේ ආයතනයේ ප්රධාන මෙහෙයුම් නිලධාරී ලී හේම්ස් ප්රකාශ කරනවා.
නිර්නාමික ලංසු තබන්නෙකුට මේ කැප් තොප්පිය අලෙවි කර තිබෙන අතර එය දැන් ඔස්ට්රේලියානු කෞතුකාගාරයක ප්රදර්ශනය පිණිස තබා ඇතැයි දේශීය මාධ්ය වාර්තා කරනවා. D.G. Bradman සහ S.W. Sohoni යන නම් සඳහන්ව තිබෙන මේ කැප් තොප්පිය හොඳ තත්ත්වයක තිබෙන බව පැවසෙනවා.
බ්රැඩ්මන් පැළඳූ තවත් කැප් තොප්පියක් 2024 වසරේ පැවති වෙන්දේසියකදී ඩොලර් 311,000කට අලෙවි වන විට එය හිරු එළියෙන් මැකී ගොස් කෘමීන් විසින් හානිකර තිබුණා.
ක්රිකට් ඉතිහාසයේ ශ්රේෂ්ඨතම පිතිකරුවා ලෙස බොහෝ දෙනාගේ ගෞරවයට පාත්රව සිටින ඩොන් බ්රැඩ්මන් ටෙස්ට් තරග 52කට ක්රීඩා කළේ 99.94ක පිතිකරණ සාමාන්යක් සටහන් කරමින්. මෙය වෙනත් ඔ්නෑම ක්රීඩකයෙකුට වඩා ලකුණු 40කට ආසන්න ප්රමාණයකින් ඉහළින් සිටීමක්.
(සටහන : වර්නන් ගුණසේකර)
ජ්යෙෂ්ඨ මාධ්යවේදී
