පාකිස්තාන රුපියල් ලක්ෂ පනහ (ඩොලර් 18,000) බැගින් වන දඩයකට ලක්ව සිටින 2026 විස්සයි20 ලෝක කුසලාන තරගාවලියට සහභාගි වූ පාකිස්තාන ක්රිකට් ක්රීඩකයින් අතර එම තරගාවලියේ වැඩිම ලකුණුලාභියා වන සහිබ්සාඩා ෆර්හාන් ද සිටීම ක්රිකට් ලෝකයේ කතාබහට ලක්ව තිබෙනවා.
මේ පාකිස්තාන ආරම්භක පිතිකරුවා මෙවර තරගාවලියේදී ලකුණු 383ක් වාර්තා කළේ T20 ලෝක කුසලාන තරගාවලියක මෙතෙක් සටහන්ව තිබූ වැඩිම පෞද්ගලික ලකුණු සංඛ්යාව වූ ඉන්දියාවේ විරාට් කෝලිගේ ලකුණු 319 වාර්තාව බිඳ දමමින්. මීට අමතරව ෆර්හාන්, විස්සයි20 ලෝක කුසලාන තනි තරගාවලියක ශතක දෙකක් ලබා ගත් එකම ක්රීඩකයා බවට ද පත්ව සිටින්නේ ශ්රී ලංකාව ට එරෙහිව ලකුණු 100ක් සහ නැමීබියාව ට එරෙහිව නොදැවී ලකුණු 100ක් රැස් කරමින්. දඩයට ලක්ව සිටින ක්රීඩකයින්ගෙන් කෙනෙකු වන ෆකාර් සමාන් ක්රීඩා කළේ තරග දෙකකට පමණයි.
2009 ශූරයින් වන පාකිස්තානයේ මෙවර ලෝක කුසලාන ගමන ‘සුපිරි අට’ වටයෙන් අවසන් වුනේ ශ්රී ලංකාව ට එරෙහිව විශාල ජයග්රහණයක් අත්කර ගැනීමට අසමත් වීමෙන්. පාකිස්තානය ට ජාත්යන්තර ක්රිකට් කවුන්සලයේ පිරිමි තරගාවලියක අවසන් පූර්ව වටයක් මෙවර මඟහැරුනේ අඛණ්ඩව සිවු වැනි වරට.
පාකිස්තාන ක්රිකට් ක්රීඩකයින්ට මුදල්මය වශයෙන් දඬුවම් කිරීමට පාකිස්තාන ක්රිකට් මණ්ඩලය (PCB) තීරණය කළේ තරගාවලියේ මූලික වටය යටතේ පෙබරවාරි 15 වැනිදා පැවති ඉන්දියාව ට එරෙහි තරගයේ ලැබූ ලකුණු 61ක පරාජයෙන් පසුව. පාකිස්තානය අවසන් පූර්ව වටයට පිවිසියා නම් එම දඬුවම අහෝසි කිරීමට නියමිතව තිබුණා. එහෙත් ශ්රී ලංකාව ට එරෙහි ලකුණු පහක ජයග්රහණයට පෙර නවසිලන්තය සමග තරගය වැස්සට සේදී යමින් සහ එංගලන්තය සමග තරගය පරාජය වීමෙන් පසුව ඔවුන්ට ශුද්ධ ලකුණු ලබා ගැනීමේ වේගයට අනුව අවසන් හතර දෙනා අතරට පිවිසීමට නොහැකි වෙමින් නවසිලන්තය අවසන් පූර්ව වටයට සුදුසුකම් ලැබුවා.
(සටහන : වර්නන් ගුණසේකර)
ජ්යෙෂ්ඨ මාධ්යවේදී
