ටයිසන් ෆියුරි ජගත් හෙවිවේට් බොක්සිං වළල්ලට ඔහුගේ ආගමනය ඇර්සලාන්බෙක් මහ්ක්මූඩොෆ් ට එරෙහි වැඩි ලකුණු ජයග්රහණයකින් සලකුණු කළ වහාම ඊළඟ සටනට එන ලෙසට ඔහුගේ දීර්ඝ කාලීන ප්රතිවාදියා වන ඇන්තනි ජොෂුවා ට අභියෝග කළා.
මාස 15ක තමන්ගේ ආසන්නතම විශ්රාමයෙන් පසුව යළි තරගයකට පිවිසි 37 හැවිරිදි බ්රිතාන්ය ජාතිකයා වැඩි වශයෙන් ඒකපාක්ෂික වූ වට 12 තරගය ජය ගත්තේ ලකුණු 120-108, 120-108 හා 119-109ක පුළුල් තීරණයකින්.
එහෙත් තරගයේ ප්රතිඵලය නිවේදනය කිරීමටත් පෙර ෆියුරි, බොක්සිං වළල්ලට පැමිණෙන ලෙසට ජොෂුවා ට ආරාධනය කළ ද ඔහු එය ප්රතික්ෂේප කළා.
“ඇන්තනි ජොෂුවා, මම නුඹට අභියෝග කරනවා ඊළඟට මාත් එක්ක සටනට එන්න කියලා. නුඹ ඒක පිළිගන්නවා ද?” යනුවෙන් ෆියුරි පැවසුවේ ජොෂුවා බොක්සිං වළල්ලට ගෙන්වා ගැනීමට දැරූ බොහෝ උත්සාහයන් ව්යර්ථ වීමෙන් පසුව.
සෙනසුරාදා රාත්රියේ පැවති මේ තරගයේ වැඩි කොටසක් බොක්සිං වළල්ලට යාබද අසුනක සිට රූ ගත කරමින් සිටි ජොෂුවා වාදයක පැටලීමට මුලින් අකැමැති වීමෙන් පසුව, “මම උඹට ගැහුවේ අපි පොඩි ළමයි කාලේයි. උඹට ආපහු ගහන එක මට ලොකු දෙයක් නෙවෙයි” යනුවෙන් කියා සිටියා.
“මම කළ යුත්තේ කුමක්ද කියලා මට කියාදෙන්න උඹට බැහැ. මම උඹව ලුහුබඳින්නේ අවුරුදු 10ක සිටයි. මමයි බොස්. උඹ වැඩ කරන්නේ මටයි. උඹේ අයිතිකාරයා මමයි. උඹයි මට සේවය කරන්නේ” ජොෂුවා පවසා සිටියා.
ෆියුරි ඊට මෙසේ ප්රතිචාර දැක්වූවා: “උඹ (ඇන්තනි ජොෂුවා) තමයි ඊළඟට මගෙන් ගුටිකන්නේ. මම උඹට වැටෙන්න ගහනවා. ඒක විශ්වාස කරපන්!”
මේ තරගකරුවන් දෙදෙනාගේ ම ක්රීඩා ජීවිත උච්චතම අවධියේ තිබියදී සිදුවිය යුතුව තිබූ තරගයක් යථාර්ථයක් වන ලකුණු දැන් පහළ වී තිබෙනවා.
ලෝක හෙවිවේට් බොක්සිං කිරුළු ගණනාවක හිමිකරුව සිටින ඔලෙක්සැන්ඩ ඌසික් ට 2024 වසරේදී පිට පිට දෙවතාවක් ලැබූ පරාජයන්ගෙන් පසුව සහභාගි වූ මේ පළමු තරගයෙන් පසුව ෆියුරි දැන් ජයග්රහණ 35ක්, පරාජ 2ක් හා ජය පැරදුමින් තොර විසඳුම් 1ක් වාර්තා කර තිබෙනවා.
දෙවතාවක් ලෝක ශූරයින් වූ ෆියුරි හා ජොෂුවා යන දෙදෙනාම දශකයකටත් වැඩි කාලයක් බ්රිතාන්ය බොක්සිං ක්රීඩාව ගෝලීය වේදිකාවේ රැගෙන ගොස් තිබුන ද, වසර ගණනාවක් තිස්සේ කෙරුනු සාකච්ඡා හා ව්යාජ දැනුම්දීම් මධ්යයේත් මේ තරගකරුවන් දෙදෙනා අතර තරගයක් කිසිදිනෙක පැවැත්වුනේ නැහැ.
(සටහන : වර්නන් ගුණසේකර)'ද ලීඩර්' ක්රීඩා වාර්තාකරු
