බංග්ලාදේශයේ ධකා අගනුවර පැවැත්වෙන මේ තරගාවලියේ සමාරම්භක තරගයේ පළමු භාගයේදී සුහායිල් අහමඩ් භාට් වාර්තා කළ ගෝල ද්විත්වය ඉන්දියාව ට ජයග්‍රහණයේ මාවත විවර කළා. ඉන්දියාව තරගයේ නියමිත කාලය අවසන් වන විට ගෝල 3-0කින් ඉදිරියෙන් සිටියත් තරගය නතර වීමට ආසන්න කාලයේ පාකිස්තානය ගෝල් දෙකක් ලබා ගනිමින් තරගය තියුණු අවසානයක් කරා ගෙන ගියා.
කෙසේ වෙතත්, වඩා වැදගත් වන්නේ ඉන්දියාව ඔවුන්ගේ සාෆ් කිරුළ රැක ගැනීමේ මෙහෙයුම ජයග්‍රහණයකින් ආරම්භ කිරීමයි. සිය සංචිතයේ ක්‍රීඩකයින් බොහෝ දෙනෙක් දැන් පැවැත්වෙන ඉන්දියා සුපර් ලීගයේ ක්‍රීඩා කරන අතර පළමු කණ්ඩායම ජාත්‍යන්තර තරග සමයේ නවසිලන්තය සමග තරග කිරීමට බැඳී සිටින හෙයින් ඉන්දියාව මේ තරගාවලියට ඉදිරිපත් කර තිබෙන්නේ දෙවැනි පෙළ කණ්ඩායමක්.
21 හැවිරිදි භාට් ගෝල දෙක ලබා ගත්තේ මිනිත්තු හයක් ඇතුළත වීම විශේෂත්වයක්. 13 වැනි මිනිත්තුවේදී පළමු ගෝලය ලබා ගත් ඔහු ඊට මිනිත්තු හයකට පසුව තවත් ගෝලයක් ලබා ගනිමින් ඉන්දියාවේ වාසිය දෙගුණ කළා. පාකිස්තානය පෙනල්ටියක් එල්ල කිරීමට අසමත් වීමට පෙර කිප්ගන් ඉන්දියාව ට තෙවැනි ගෝලය ලබා දුන්නා.
පාකිස්තානය තරගයේ අවසන් කාලයේ මිනිත්තු තුනක් ඇතුළත ගෝල දෙකක් ලබා ගැනීමට සමත් වුණා. 90 වැනි මිනිත්තුවේදී නජීබ් උල්ලා හිසෙන් පන්දුව දැලේ පිටුපසට එල්ල කරමින් පළමු ගෝලය ලබා ගත් අතර 93 වැනි මිනිත්තුවේදී පළපුරුදු ක්‍රීඩක ඝාසි පාකිස්තානයේ අනෙක් ගෝලය වාර්තා කළා.
(සටහන: වර්නන් ගුණසේකර)