2023 වසරේදී හිටපු ජනාධිපති රනිල් වික්රමසිංහ බ්රිතාන්යයේ සිදු කළ සංචාරයක් වෙනුවෙන් රුපියල් ලක්ෂ 166කට අධික මුදල් වැය කිරීම තුළින් රාජ්ය මුදල් සාවද්ය පරිහරණයක් කර ඇතැයි චෝදනා කරමින් අපරාධ පරීක්ෂණ දෙපාර්තමේන්තුව විසින් ගොනුකර ඇති නඩුවක් විභාග වෙමින් තිබියදී
රනිල් වික්රමසිංහ ගේ උපායමාර්ගික කණ්ඩායම දැන් මුළු නඩුවම සම්පූර්ණයෙන්ම වෙනස් මාවතකට යොමු කළ හැකි අලුත්ම සැලසුමක් ක්රියාත්මක කිරීමේ සුදානමක් පවතින බවට කනින් කොනින් වාර්තාවේ.
එම ආරංචි අනුව, මේ සියල්ලේම කේන්ද්රස්ථානය බවට පත්ව තිබෙන්නේ "ස්කයිවින්ග්ස් ට්රැවල්ස්" (Skywings Travel) නමැති ආයතනයයි.
ඒ අනුව රනිල් වික්රමසිංහ හිටපු ජනාධිපතිවරටගේ උපදේශකයන් දැන් බ්රිතාන්යයේ "2010 අල්ලස් පනත" (UK Bribery Act 2010) ගැන දැඩි අවධානයක් යොමු කර තිබෙනවා.
මෙය බ්රිතාන්යය තුළ දූෂණයට එරෙහිව නීතිය ක්රියාත්මක කරන ආකාරය සම්පූර්ණයෙන්ම වෙනස් කළ ඉතා බලවත් පනතක්. නීති විශේෂඥයන් පවසන පරිදි මෙම පනතට "දේශසීමා ඉක්මවා ගිය බලයක්" තිබෙනවා. ඒ කියන්නේ අල්ලසක් ලබා දීම හෝ ලබා ගැනීම ලෝකයේ කොහේ සිදුවුණත්, එම ගනුදෙනුවට බ්රිතාන්ය සමාගමක් සම්බන්ධ නම් හෝ බ්රිතාන්ය භූමියට යම් හෝ සම්බන්ධයක් තිබේ නම්, ඒ ගැන පරීක්ෂණ පවත්වන්න බ්රිතාන්ය බලධාරීන්ට අයිතියක් තිබෙනවා.
ස්කයිවින්ග්ස් කියන්නේ බ්රිතාන්යයේ ලියාපදිංචි වුණු සමාගමක්. ප්රශ්නයට තුඩු දී ඇති මුදල් ගෙවීම සිදු කර තිබෙන්නේ බ්රිතාන්ය ආයතනයකටයි. ඒ වගේම මුළු ගනුදෙනුවම සිදු වී තිබෙන්නේ බ්රිතාන්ය අධිකරණ බල සීමාව ඇතුළතයි. ඉතින් මේ අල්ලස් පනත යටතේ, ශ්රී ලංකාවේ අධිකරණවලටත් වඩා එහා ගිය බරපතළ නීතිමය ක්රියාමාර්ගයකට මෙහිදී ඉඩකඩ විවෘත වෙනවා.
මෙම පනත යටතේ ගැනෙන වැරදි අතරින් එකක් මෙතැනට ඉතාම වැදගත්. ඒ තමයි "තම ආයතනය වෙනුවෙන් සිදුවන අල්ලස් දීම් වැළැක්වීමට වාණිජ ආයතනයක් අපොහොසත් වීම". යම් බ්රිතාන්ය සමාගමක සේවකයෙක් හෝ නියෝජිතයෙක් අල්ලස් දීමක නිරත වුණොත්, එය වැළැක්වීමට නිසි පියවර ගෙන තිබුණේ නැතිනම් එම සමාගම ඍජුවම වගකීමට බැඳී සිටිනවා.
ලන්ඩනයේ වෙසෙන ශ්රී ලාංකික ප්රජාව අතර රහසක් නොවන කරුණක් තමයි ස්කයිවින්ග්ස් ආයතනය සහ ශ්රී ලංකා මහ කොමසාරිස් කාර්යාලයේ ප්රධාන නිලධාරීන් අතර තිබුණු අතිශය සමීප සබඳතාව. නිල සංචාරයන් සඳහා මෙම ආයතනය නිරන්තරයෙන් තෝරාගැනුණු අතර ජාතික උත්සව සඳහා ඔවුන් දිගින් දිගටම අනුග්රහය ලබා දුන්නා.
දැන් මේ කතාවේ වඩාත්ම උනන්දුව දනවන කොටස එළියට එනවා. ස්කයිවින්ග්ස් ආයතනය මේ වැඩේට තෝරාගත්තේ කොහොමද, ඒ ගෙවීමට සාධාරණ හේතු තිබුණාද, නැතිනම් යම් යම් වරප්රසාද වෙනුවෙන් මේ අවස්ථාව ඔවුන්ට ලබා දුන්නාද කියන ප්රශ්න මතු වුණොත්, බ්රිතාන්යයේ "දැවැන්ත වංචා විමර්ශන කාර්යාලයේ" (Serious Fraud Office) අවධානය ඒ වෙත යොමු වෙන්න පුළුවන්.
බ්රිතාන්ය බලධාරීන් තම රටේ සමාගම් සහ රාජ්ය නිලධාරීන් සම්බන්ධ වන අල්ලස් ගැන සොයා බලන්නේ ඉතාම දැඩිවයි.
ආරංචි මාර්ග පවසන්නේ වික්රමසිංහ ගේ කණ්ඩායම මෙම ප්රශ්න පිළිබඳව ඍජුවම බ්රිතාන්ය බලධාරීන්ට කරුණු ඉදිරිපත් කිරීමට සලකා බලමින් සිටින බවයි. එය ලංකාවේ නඩුවට කරන විත්තියේ වාදයක් නෙවෙයි, බ්රිතාන්ය නීතිය යටතේ එරට තුළ පරීක්ෂණයක් ඉල්ලා සිටින වෙනමම කටයුත්තක්.
විදේශීය රාජ්ය නිලධාරීන්ට අල්ලස් දීම සහ ව්යාපාරික වාසි තකා නිලධාරීන්ට බලපෑම් කිරීම මෙම පනත යටතේ දැඩි දඬුවම් ලැබිය හැකි වැරදි. ඉතින් මහ කොමසාරිස් කාර්යාලයේ නිලධාරීන් යම් වරප්රසාද ලබාගෙන ස්කයිවින්ග්ස් වෙත මේ ව්යාපාරික අවස්ථාව ලබා දුන්නා නම්, එය හරියටම බ්රිතාන්ය නීතියට හසුවන තැනක්.
මේ අනුව දැන් පෙනී යන්නේ මෙය හුදෙක් ලංකාවේ දේශීය දේශපාලන ප්රශ්නයක් පමණක් නොවන බවයි.
දැන් මෙතැනට ජාත්යන්තර දූෂණ විරෝධී නීතියත්, බ්රිතාන්යයේ සමාගම් වගකීමත්, දේශසීමා ඉක්මවා යන පරීක්ෂණත් සම්බන්ධ වෙලා තිබෙනවා.
දැන් සටන් බිම කලින්ට වඩා ගොඩක් විශාලයි. ඒ වගේම ගොඩක් සංකීර්ණයි.
