ශ්රී ලංකාවේ ප්රථම ජාතික ගුවන් සේවය ලෙස සැලකෙන එයාර් සිලෝන් (Air Ceylon) පිළිබඳ අතීත මතකයන් ආවර්ජනය කරන
විශේෂාංග වීඩියෝවක් I Love Ceylon විසින් එළිදක්වා තිබේ.
එහි දැක්වෙන පරිදි, 1947 සැප්තැම්බර් මාසයේදී රත්මලාන ගුවන් තොටුපළ කේන්ද්ර කරගනිමින් "සිලෝන් එයාර්වේස්" (Ceylon Airways) ලෙස ආරම්භ වූ මෙම ගුවන් සේවය, ශ්රී ලංකාව නිදහස ලබාගැනීමටත් පෙර ස්ථාපිත කර තිබිණි. Douglas DC-3 Dakota වර්ගයේ ගුවන් යානා තුනක් සමඟ මෙහෙයුම් ආරම්භ කළ මෙම සේවය, දේශීය ගුවන් ගමන්වලට අමතරව 1947 දෙසැම්බර් 10 වැනිදා මදුරාසිය වෙත සිය පළමු ජාත්යන්තර ගුවන් ගමන සිදු කළේය.
1949 වසරේදී ඕස්ට්රේලියානු ජාතික ගුවන් සේවය සමඟ එක්ව සිංගප්පූරුව හරහා සිඩ්නි දක්වා ගුවන් මාර්ගය දීර්ඝ කළ අතර, 1955 දී "එයාර් සිලෝන්" ලෙස නාමය වෙනස් කිරීමෙන් අනතුරුව ලන්දේසි KLM ගුවන් සේවය සමඟ එක්ව යුරෝපීය ගමනාන්ත වෙත සේවා ව්යාප්ත කළේය. පසුව බ්රිතාන්ය BOAC සමඟ ලන්ඩනය දක්වාත්, ප්රංශ UTA ගුවන් සේවය සමඟ පැරිස් දක්වාත් ජෙට් යානා සේවා ආරම්භ කිරීමට එය සමත් විය.
1967 දී කටුනායක ජාත්යන්තර ගුවන් තොටුපළ විවෘත වීමත් සමඟ ශ්රී ලංකාවේ සංචාරක කර්මාන්තයේ වර්ධනයට එයාර් සිලෝන් සැලකිය යුතු දායකත්වයක් ලබාදුන් බවද එම වීඩියෝවේ සඳහන් වේ. යුරෝපීය සංචාරකයන් ශ්රී ලංකාවට සහ මාලදිවයිනට ගෙන ඒමේදී මෙම ගුවන් සේවය වැදගත් කාර්යභාරයක් ඉටු කළේය.
කෙසේ වෙතත්, දේශපාලන මැදිහත්වීම්, මූල්ය අර්බුද, ඉන්ධන මිල ඉහළ යාම සහ අධික පිරිවැය හේතුවෙන් එයාර් සිලෝන් දැඩි අර්බුදයකට මුහුණ දුන් අතර, 1979 අගෝස්තු මාසයේදී එහි මෙහෙයුම් නතර කෙරිණි. අනතුරුව එහි වත්කම් අලුතින් ආරම්භ කළ එයාර් ලංකා ආයතනයට (වර්තමානයේ ශ්රී ලංකන් ගුවන් සේවය) පවරා දෙන ලදී.
වසර 30කට ආසන්න කාලයක් තුළ මගීන් මිලියන දෙකකට අධික පිරිසක් ප්රවාහනය කළ එයාර් සිලෝන්, ශ්රී ලංකාව ජාත්යන්තර ගුවන් සිතියමට ගෙන යාමටත්, සංචාරක කර්මාන්තයේ මුල් පියවර තැබීමටත් දායක වූ ජාතික ආයතනයක් ලෙස සැලකේ.
මීට අමතරව, එයාර් සිලෝන් සමඟ සම්බන්ධ වූ දුර්ලභ ප්රචාරක පෝස්ටර් සහ ඓතිහාසික නිර්මාණ එකතුවක් I Love Ceylon වෙතින් ලබාගත හැක.
