නිදහස සමරු පෙබරවාරි 4 ‘දෙමළ නිජ බිමේ කළු දිනයක්’

“අභියෝග ජය ගත් ඉසුරුමත් හෙට දිනක්- සෞභාග්‍යයමත් මව්බිමක්' යන්න තේමා කරගනිමින් ජනාධිපතිවරයා ආරක්ෂක අංශ ප්‍රධානීන් පිරිවරා කොළඹ දී 74 වැනි ජාතික නිදහස් දින සැමරුම උත්සවාකාරයෙන්

පවත්වද්දී, උතුරු නැගෙනහිර මව්වරුන් පෙබරවාරි 4 කළු දිනයක් ලෙස හඳුන්වමින් විදියේ විරෝධතා පවත්වා තිබේ.

දොළොස් වසරකට ඉහතදී යුද්ධයෙන් මියගිය දසදහස් සංඛ්‍යාත නෑසියන් සැමරීම වෙනුවෙන් මුල්ලිවයික්කාල්හි ඉදිකරතිබෙන ස්මාරකයේ පන්දම් දල්වා "ශ්‍රී ලංකාවේ නිදහස් දිනය යනු දෙමළ නිජ බිමේ කළු දිනයයි" යනුවෙන් සඳහන් බැනර පෙරටු කරගනිමින් උදෑසන එකොළහට ආරම්භ කළ විරෝධතා පා ගමන මුලතිව් සෙල්වපුරම් දක්වා පැමිණ අවසන් කරන විට පස්වරු දෙක පසුවු බවයි පළාත් බද මාධ්‍යවේදීන් පවසන්නේ.

උතුරු නැගෙනහිර පළාත් දෙකේ දිස්ත්‍රික් අටම නියෝජනය වන පරිදි අතුරුදහන් වුවන්ගේ පවුල්වල ඥාතීන්ගේ සහභාගිත්වයෙන් පැවැති දැවැන්ත විරෝධතා පා ගමන සදහා ආගමික නායකයන්, දේශපාලනඥයන්ගේ මෙන්ම සිවිල් සංවිධාන නියෝජිතයන්ගේද සහාය හිමි වී තිබේ.

විරෝධතාකරුවන්ගෙන් බහුතරය කළු පැහැති ඇදුමින් සැරසි, කළු පැහැති කොඩියක් අත දරා විරෝධතා පෙළපාලියට එක්ව ඇත.

වට්ටුවාහල් ගෝඨාභය නාවික හමුදා කඳවුර පසුකරමින් විරෝධතා පා ගමනින් ඉදිරියට පැමිණි අතුරුදහන් වුවන්ගේ පවුල් වල ඥාතීන් වට්ටුවාහල් පාලම උඩදී පන්දම් දල්වා ප්‍රශ්න කර ඇත්තේ 2009 වසරේ යුද්ධය අවසන් මොහොතේදි වට්ටුවාහල් පාලම උඩදී රජයේ ආරක්ෂක අංශ වෙත සියතින්ම බාර දුන් සමීපතමයන්ට අත් වු ඉරණම කුමක්ද යන්නයි.

මාර්තු මාසයේ ජිනිවා නුවරදී පැවැත්වෙන එක්සත් ජාතීන්ගේ මානව හිමිකම් සමුළුවේදී අතුරුදහන් වුවන් වෙනුවෙන් අනිවාර්යෙන්ම යුක්තිය ඉටු කළ යුතු බව ඔවුන් එහිදී අවධාරණය කර තිබේ.

විරෝධතා පෙළ පාලියට රජයේ ආරක්ෂක අංශ වෙතින් වෙනදා මෙන් බාධා එල්ල නොවු බව පළාත් බද මාධ්‍යවේදීහු වැඩි දුරටත් පවසති.

පෙබරවාරි 4 කළු දිනයක් යන්න තේමා කරගනිමින් ඊයේ පෙරවරුවේ යාපනය මධ්‍යම බස් නැවතුම්පොළ ඉදිරිපිටදීත් විරෝධතාවයක් පවත්වන්නට අතුරුදන්වූවන්ගේ ඥාතීන් කටයුතු කර තිබුනි.

බලහත්කාරයෙන් අතුරුදහන් කළ අයට යුක්තිය ඉටු කරනු !,

වර්ග සංහාරය සම්බන්ධයෙන් ජාත්‍යන්තර පරීක්ෂණයක් පවත්වනු !,

ත්‍රස්තවාදය වැලැක්විමේ පනත ඉවත් කරනු !,

දේශපාලන සිරකරුවන් කොන්දේසි විරහිතව නිදහස් කරනු !,

ආදී ඉල්ලීම් මුලික කරගනිමින් විරෝධතා දැක්වු එම පිරිස සටන් පාඨ කියමින් යාපනය මුනියප්පර් කෝවිල දක්වා පා ගමනින් ගොස් එහිදීත් විරෝධතාවය දියත් කර තිබුනි.

කොළඹ නිදහස් චතුරස්‍රයේ පැවති 74 වැනි ජාතික නිදහස් දින සැමරුම් උළෙලේ දී ජාතිය අමතමින් ජනාධිපති ගෝඨාභය රාජපක්ෂ සදහන් කලේ ශ්‍රී ලංකාව නීතියේ ආධිපත්‍ය සුරකින, ජාත්‍යන්තර සම්මුතීන්ට ගරු කරන රටක් බවයි.

''පටු අරමුණු මුල් කරගෙන ලංකාවට විවිධ චෝදනා එල්ල කරන්නට යම් පාර්ශ්ව උත්සාහ කළත් කිසිදු ආකාරයක මානව හිමිකම් කඩ කිරීමකට රජය අනුබල දී නැති අතර, ඉදිරියේදීත් එවැනි සිදුවීම්වලට ඉඩ තබන්නේ නැහැ.'' ඔහු වැඩි දුරටත් සදහන් කර තිබුනි.