මුලතිව්, කුරුන්දි විහාර භූමිය ගැන තීරණයක් ගැනීමේදී බෙදුම්වාදීන්ගේ හඬට පමණක් කන් නොදී පුළුල් විමර්ශනයක් කර සාධාරණ
තීන්දුවක් ගන්නැයි ජනාධිපතිවරයාගෙන් ඉල්ලා සිටින බව එම විහාරාධිපති ගල්ගමුවේ සන්තබෝධි උතුරු පළාත් ප්රධාන සංඝනායක හිමියෝ පවසති.
හෙක්ටයාර් හයදහස් අටසිය ගණනක් සහිතව 1932දී ගැසට් කළ නාගචෝල රක්ෂිතය පිහිටි මෙම භූමියෙහි පාරම්පරික කුඹුරු පිහිටා නැතැයි ද 2018න් පසුව සිදු වූ නීති විරෝධී වන සංහාරයක් නිසා එළිපෙහෙළි කළ ඉඩම්වලට අයිතිය කියාපෑම ඉතිහාසය වැරදි ලෙස කියවීමක් යැයි ද උන්වහන්සේ සමාජ මාධ්ය වෙත වීඩියෝ පටයක් මුදා හරිමින් පවසා තිබේ.
ඒ අනුව, මෙම සිදුවීමේදී පුරාවිද්යා දෙපාර්තමේන්තුව අහිංසක දෙමළ ජනතාවගේ ඉඩම් අත්පත් කරගැනීමක් කිසිසේත් සිදුව නැතැයි අවධාරණය කරන උන්වහන්සේ රටේ උරුමයන් රැක ගැනීම ජනාධිපතිවරයාගේ වගකීමක් යැයි පවසති.
ගල්ගමුවේ සන්තබෝධි උතුරු පළාත් ප්රධාන සංඝනායක හිමියෝ එහිදී මෙසේ ද පවසති.
“මුලතිව් කුරුන්දි විහාරයට අයත් පුරාවස්තු භූමිය මුලින් ම මැනීම ආරම්භ වෙන්නේ 1933 මැයි 18 වන දා අතිවිශේෂ ගැසට් නිවේදනයක් මගින්. ඒ කියන්නේ සුදු ජාතික පාලකයන් යටතේ. එහිදී අක්කර 78ක් ගැසට් වෙනවා. පසුකාලීන ගවේෂණවලින් පැහැදිලි වන්නේ මීටත් වඩා විශාල භූමියක මෙහි නටබුන් විසිරිලා තියෙනවා. ඒ නිසා අලුතින් අක්කර 229ක් ගැසට් කරන්න නියම කරනවා.
මෙය ඔවුන්ට උරුමයෙන් ලැබුණු ඉඩමක් නම් කිසියම් හෝ ලියවිල්ලක් තිබිය යුතු යි. මෙතැන පුරාවිද්යා දෙපාර්තමේන්තුව අහිංසක දෙමළ ජනතාවගේ ඉඩම් අත්පත් කරගෙන නෑ. දැනගත යුතු විශේෂ ම කරුණක් වන්නේ නාගචෝල රක්ෂිතයට 1932දී හෙක්ටයාර් හයදහස් අටසිය ගණනක් තිබුණත් අද තිබෙන්නේ පන්දාස් පන්සීයකටත් අඩු ප්රමාණයක්. මොකද පසුගිය කාලයේ හෙක්ටයාර් දහසකට වඩා වන සංහාරයකට ලක්වෙලා.
එනිසා අප ජනාධිපතිවරයාගෙන් ඉල්ලා සිටින්නේ බෙදුම්වාදීන්ගේ හඬට පමණක් කන් නොදී නිලධාරීන් යොදා පුළුල් විමර්ශනයක් කර සාධාරණ තීන්දුවක් දෙන ලෙසයි. එහිදී මේ රටේ උරුමයන් රැකගැනීම ජනාධිපතිවරයාගේ වගකීමක් බව අපි මෙත් සිතින් සිහිපත් කරන්න කැමතියි.”
(mawbima.lk)