හිටපු හමුදා නිලධාරියකු පාර්ලිමේන්තු වරප්‍රසාද වලට මුවාවී දෙවැනි වරටත් අධිකරණයට සිදු කළ අපහාසය හෙළා දකිමින් උතුරු පළාතේ නීතිඥයන් විරෝධතා දියත් කර තිබේ.


මුලතිව් දිසා සහ මහේස්ත්‍රාත් අධිකරණය, චාවකච්චේරි අධිකරණ සංකීර්ණය හා මන්නාරම දිසා සහ මහේස්ත්‍රාත් අධිකරණය ඉදිරිපිටදී අගෝස්තු 25 වැනිදා පෙරවරුවේ නීතිඥයන් වැඩ වර්ජනය කරමින් විරෝධතා දැක්වු බවයි පළාත් බද වාර්තාකරුවන් පවසන්නේ.

අධිකරණයට දේශපාලන තර්ජන එපා, විනිසුරුවරුන්ගේ රාජකාරියට අත නොතබනු, නීතියේ ස්වාධීනත්වය තහවුරු කරණු, පාර්ලිමේන්තු වරප්‍රසාද අවභාවිත නොකරනු, ආදී සටන් පාඨ පෙරටුකරගනිමින් නීතිඥයන් විරෝධතා දක්වා තිබුවේ අගෝස්තු 22 වැනිදා පාර්ලිමේන්තුවේදී සරත් වීරසේකර මන්ත්‍රීවරයා මුලතිව් මහේස්ත්‍රාත් වරයා සම්බන්ධයෙන් කළ ප්‍රකාශයක් හෙළා දකිමිනි.

Mannar 1


බෞද්ධයන් මෙන්ම හින්දුන් ද අයිතිය කියා පාන කුරුන්තුර්මලේ පුරාවිද්‍යා භුමියේ අධිකරණ සහ පුරා විද්‍යා දෙපාර්තමේන්තුවේ අවසරය මත හින්දු බැතිමතුන් අගෝස්තු 18 වැනිදා පොංගල් උත්සවය සමරා තිබුනේ පුරා විද්‍යා දෙපාර්තමේන්තුව පනවා තිබු කොන්දේසි යටතේය.

හින්දුන්ට පොංගල් සැමරීමට මහේස්ත්‍රාත් වරයා දුන් අවසරය සරත් වීරසේකර මන්ත්‍රීවරයා පාර්ලිමේන්තුවේදී හෙදා දැක තිබුනේ "මෙවරත් මුලතිව් මහේස්ත්‍රාත්වරයා කුරුන්දියේ බෞද්ධ විහාර සංකීර්ණයේ පොංගල් උත්සවයක් තියන්නට අවසර දුන්නා. ඒක හරියට ගල්කිස්සේ මහේස්ත්‍රාත් වරයා වැල්ලවත්තේ ශිව කෝවිලේ පිරිත් කියන්න අවසර දුන්නා වගේ දෙයක් තමයි එතන වෙලා තියෙන්නේ. යනුවෙන් පවසමිනි."

 අනතුරුව වීරසේකර මන්ත්‍රීවරයා මුලතිව් මහේස්ත්‍රාත් වරයා මානසික ආබාධයකින් පෙළෙන බව තහවුරු කිරීමට පාර්ලිමේන්තුවේ මහත් උත්සාහයක් ගෙන තිබුනේ පහත අයුරිනි.

Mannar 3


"මේ අදාල මහේස්ත්‍රාත් වරයා සම්බන්ධයෙන් ප්‍රකාශයක් කරලා තියනවා ඔහු මානසික ආබාධයකින් පෙළෙනවා කියලා. කවුද ඒ ප්‍රකාශය කරලා තියෙන්නේ. ඒ ප්‍රකාශය කරලා තියෙන්නේ ඔහුගේම බිරිද. ඒ මහේස්ත්‍රාත්වරයා මුලතිව් පොලීසියට පැමිණිල්ලක් කරනවා එයාගේ නිවසේ සොරකමක් උනා කියලා. ඒ නඩුව තමයි බී 62/22 . මුලතිව් උසාවියේ තමයි ඒ නඩුව විභාග කරන්නේ. ඒ නඩුවේ විමර්ශනයේ දී ඒ මහේස්ත්‍රාත් වරයාගේ බිරිද පොලීසියට ප්‍රකාශයක් කරනවා මොහු මානසික ආබාධයකින් පෙළෙනවා ඒ නිසා මම මගේ ස්වාමි පුරුෂයාව මානසික වෛද්‍යවරයකු ලගට ගෙනියනවා කියලා. "

සරත් වීරසේකර මන්ත්‍රීවරයා පාර්ලිමේන්තුවේදී බලධාරීන්ගෙන් වැඩි දුරටත් ඉල්ලා තිබුනේ මුලතිව් මහේස්ත්‍රාත් වරයා මාරු කිරීමට පියවර ගන්නා ලෙසයි.

" ඇත්ත වශයෙන්ම ඒක නිසා අපි අධිකරණ ඇමැතිට, ඒ වගේම අධිකරණ සේවා කොමිෂන් සභාවට කියනවා වහාම මොහුව එතනින් මාරු කරලා වෙන කෙනෙක්ව දාන්න. නීතිඥ සංගමයටත් අපි කියනවා මේකට, මේ ප්‍රශ්නයට මැදිහත් වෙලා මේ මහේස්ත්‍රාත්වරයා මාරු කරලා තවත්  හොද මහේස්ත්‍රාත්වරයෙක් දාන්න. "

 ජාතික ආරක්ෂාව පිළිබඳ ආංශික අධීක්ෂණ කාරක සභාවේ සභාපති ද වන රියර් අද්මිරාල් සරත් වීරසේකර මීට ඉහතදී ජුලි 7 වැනි සිකුරාදා පාර්ලිමේන්තුවේදී සඳහන් කර තිබුනේ මෙය බෞද්ධ රටක් බවට මහේස්ත්‍රාත්වරයාට මතක් කර දිය යුතු බවයි.

පාර්ලිමේන්තු මන්ත්‍රී  රියර් අද්මිරාල් වීරසේකරගේ එම ප්‍රකාශය හෙලා දකින යෝජනාවක් ඒකමතිකව සම්මත කළ මුලතිව් නීතිඥ සංගමය ජුලි 11 අඟහරුවාදා මුලතිව් උසාවිය අබියස විරෝධතාවක් පැවැත් වු අතර එම විරෝධතාවයට යාපනය, වව්නියාව, මන්නාරම, කිලිනොච්චි, මඩකලපුව, ත්‍රිකුණාමලය දිස්ත්‍රික්කයන්හි නීතිඥයන්ද එක්ව තිබුනි.

 

JW

Follow Us

Image
Image
Image
Image
Image
Image

නවතම පුවත්