නැගෙනහිර පළාතේ බෞද්ධයන් නොමැති ප්‍රදේශයක ප්‍රාදේශිය සභා අනුමැතියකින් තොරව
අලුතින් බෞද්ධ විහාරයක් ඉදි කිරීමට එරෙහිව දෙමළ ජනතා නියෝජිතයන් ඇතුළු පිරිසක් දියත් කිරීමට සැලසුම් කර තිබු උද්ඝෝෂණයක් අධිකරණ නියෝගයක් මගින් තහනම් කර තිබේ.
මුලතිව් මහේස්ත්‍රාත්වරයා ඔක්තෝබර් 01 වැනිදා නියෝග කර ඇත්තේ නිලාවේලි පොලිස් ස්ථානාධිපති ප්‍රදීප් නිශාන්ත කුමාර කළ පැමිණිල්ල සලකා බලා බොරළුකන්ද විහාරස්ථානය සමීපයේ විරෝධතා පැවැත්වීම තහනම් කරන බවයි.
"නිලාවේලි පොලිස් වසමේ 06 කනුව ඉලුප්පුකුලම් බොරළුකන්ද විහාරස්ථාන භුමිය ඉදිරිපිට මාර්ගයේ හා ඒ අවට ප්‍රදේශයේ හා මෙම පොලිස් වසම තුළ 2023.10.01 වන දින හෝ ඊට ආසන්න දිනයකදී එක්රැස්වීමෙන් වළකින ලෙසත් විරෝධතා හා උද්ඝෝෂණ නොපවත්වන ලෙසත් ඔබලා වෙත මෙයින් ආඥා කරනු ලැබේ."
ත්‍රිකුණාමලය මහේස්ත්‍රාත් නිකුත් කළ එම නියෝගයේ නම් දැක්වෙන 8 දෙනා අතරින් තමිල් පේරවෙයි සංවිධානයේ නියෝජිතයන් දෙදෙනකුද වේ. අධිකරණය නියෝගයේ එම සංවිධානය හදුන්වා ඇත්තේ 'මූලධර්මවාදී සිවිල් සංවිධානයක්' ලෙසිනි. සැප්තැම්බර් 2 වැනිදා දර්ශණී අන්නදුරෙයි අතිරේක මහේස්ත්‍රාත්වරිය විසින් නිකුත් කළ නියෝගයක ද තමිල් පේරවෙයි සංවිධානය 'මූලධර්මවාදී සිවිල් සංවිධානයක්' ලෙසින් හදුන්වා තිබුනි.
ජනතා විරෝධය නිසා ත්‍රිකුණාමලය බොරළුකන්ද විහාරස්ථානයේ ඉදිකිරීම් කටයුතු තාවකාලිකව නැවැත්වීමට පියවර ගත් නැගෙනහිර පළාතේ ආණ්ඩුකාරවරයාට එරෙහිව අගෝස්තු 28 වැනි සඳුදා පෙරවරුවේ ත්‍රිකුණාමලය දිස්ත්‍රික් ලේකම් කාර්යාලය ඉදිරිපිටදී ත්‍රිකුණාමලය ශාසනාරක්ෂක බල මණ්ලය හා ගෝකන්න පුර සුරැකීමේ සංවිධානයේ සංවිධානත්වයෙන් විරෝධතාවයක් දියත් කර තිබු අතර එහිදී පොල්හේන්ගොඩ උපරතන නාහිමියන් ඇතුළු තවත් හිමි නමක් ත්‍රිකුණාමල දිස්ත්‍රික් සංවර්ධන කමිටු (DDC) රැස්වීමට කඩාවැදී ආණ්ඩුකාරවරයාට තර්ජනය කර තිබුනි.
එහිදී ඇති වු තත්වය පැහැදිලි කරමින් ආණ්ඩුකාර සෙන්දිල් තොන්ඩමාන් මාධ්‍ය වෙත පවසා තිබුනේ ප්‍රාදේශීය සභාවේ අනුමැතිය නොමැතිව ඉදිකිරීම් සදහා අවසර ලබා දිය නොහැකි බවයි.
“ගරු ස්වාමීන්වහන්සේට මම පැහැදිලි කරලා තියෙනවා, ප්‍රාදේශීය සභාවේ අනුමැතිය නැතිව මේ කන්ස්ට්‍රක්ෂන් එක දෙන්න බෑ කියලා”
ඊට පසුව මාධ්‍ය හමුවක් පවත්වමින් තිඹිරිවැව රජමහා විහාරාධිපති උතුරු නැගෙනහිර තමන්කඩු දෙපළාතේ ප්‍රධාන අධිකරණ සංඝනායක පොල්හේන්ගොඩ උපරතන නායක හිමියන් සදහන් කර තිබුනේ බොරළුකන්ද රජමහා විහාරස්ථානයේ ඉදිකිරීම් කටයුතු වෙනුවෙන් ප්‍රාදේශීය සභාවේ අනුමැතිය අවශ්‍ය නොවන බවයි.
"ඔබතුමා ප්‍රකාශයක් කරා ඇතුල් වෙන්න අවසර දුන්නා. ඉදිකිරීම් කරන්න අවසර දුන්නේ නෑ කියලා. ඔබගෙන් ඉදිකිරීම් වලට අවසර අවශ්‍ය නෑ ආණ්ඩුකාර තුමනි. ප්‍රාදේශිය සභා පනතේ පන්සලක් හදන්න ප්‍රදේශිය සභාවෙන් අනුමැතිය ගන්න කියලා සටහන් වෙලා නෑ. ඔබතුමා හොදට පනත කියවලා බලන්න. මේ පුජනිය ස්ථාන සියල්ලම බද්දෙන් නිදහස් කරලා තියනවා. ආගමික ස්ථාන බද්දෙන් නිදහස් කරලා තියනවා. බද්දෙන් නිදහස් කරාට පස්සේ ඒ ආගමික ස්ථාන ගොඩ නගන්නට තියෙන්නේ අපිට ඕනේ විදිහට. කෝවිල හදන්නේ පුජකයට ඕනේ විදිහට. පන්සල හදන්නේ හාමුදුරුවන්ට ඕනේ විදිහට. මේ දෙකම හදන්න ආණ්ඩුකාරතුමාගෙන් ගිහිල්ලා අවසර ගන්න අවශ්‍යතාවයක් නැ. අවසර ගන්න එන්නෙත් නැ. අපිට අවසර ඕනෙත් නැ. අපේ පන්සල අපි ගොඩනගනවා."
සබැඳි පුවත් :
බොරළුකන්ද විහාරයට එරෙහි උද්ඝෝෂණයට වාරණයක්
විරෝධතා පවත්වන නැගෙනහිර සංවිධානයක් 'මුලධර්මවාදී' යයි උසාවිය කියයි
ත්‍රිකුණාමලයේ ආණ්ඩුකාරයාට එරෙහිව සංඝයා වහන්සේ පෙළපාලි
මර්වින් සිල්වාගේ 'ඔලුවත් අරං කැළණි එන' මැර තර්ජනයට විරෝධය
