ජාත්‍යන්තර ගිවිසුමකට එළැඹෙනවාද, නැති නම් රටේ නීතියට අනුව කටයුතු කරනවාද කියා සමාජ මාධ්‍ය ඇතුළු සියලු මාධ්‍ය කථිකාවක් ඇති කර ගත යුතු බව ජනපති වික්‍රමසිංහ අවධාරණය කර සිටියි.
ජනාධිපතිවරයා එබව කියා සිටියේ, එඩ්මන්ඩ් රණසිංහ උපහාර උත්සවයේ දිය.
මෙරට කෘතහස්ත පුවත්පත් කතුවර ‘දිවයින’ පුවත්පතේ සමාරම්භක කර්තෘ හා කර්තෘ මණ්ඩල අධ්යක්ෂ එඩ්මන්ඩ් රණසිංහ සූරීන්ට උපහාර පිදීමේ උත්සවය ජනාධිපති වික්‍රමසිංහ ගේ ප්‍රධානත්වයෙන් ඊයේ (03දා) පස්වරුවේ ජනාධිපති ලේකම් කාර්යාලයේදී පැවැත්විණි.
මාධ්‍ය විශිෂ්ටයින් ඇගැයීමේ ජාතික යුතුකම ඉටු කරන බුහුමන් පෙළහරක සමාරම්භක සම්භාවනාව යන තේමාවෙන් උත්සවය පැවැත්විණි.
මේ වනවිට සිය දිවි ගමනේ 93 වැනි වියේ පසුවන රණසිංහ ගේ දශක හතක මාධ්‍ය මෙහෙවර අගයමින් සම්පාදිත ' එඩ්මන්ඩ්ගේ පත්තර විප්ලවය ' කෘතිය ද මෙහිදී ජනගත කෙරුණු අතර ජනාධිපති වික්‍රමසිංහ එම කෘතිය එඩ්මන්ඩ් රණසිංහ ට පිළිගැන්වීය.
මෙම කෘතිය ජනාධිපති ජ්‍යෙෂ්ඨ උපදේශක මහාචාර්ය සුනන්ද මද්දුම බණ්ඩාර, ජනාධිපති මාධ්‍ය අධ්යක්ෂ ඩබ්ලිව්. එම්. කේ. විජේබණ්ඩාර, නියෝජ්‍ය මාධ්‍ය අධ්යක්ෂ දීප්ති අධිකාරි විසින් සංස්කරණය කර ඇත.
''පුවත්පත් කලාවේ පරිවර්තනීය වෙනසක් සිදු කළ නියමුවෙක් '' - ජනාධිපති 
මෙරට පුවත්පත් කලාවේ පරිවර්තනීය වෙනසක් සිදු කළ නියමුවෙකු ලෙස ප්‍රවීණ මාධ්‍යවේදී එඩ්මන් රණසිංහ හැඳින්විය හැකි බව ජනාධිපති වික්‍රමසිංහ උත්සව සභාව අමතමින් ප්‍රකාශ කළේය.
දශක හතක මාධ්‍ය මෙහෙවරක නිරත වූ එඩ්මන් රණසිංහ ගේ මාධ්‍ය කලාව ශ්‍රී ලාංකේය සමාජ, ආර්ථික සහ දේශපාලනය උන්නතිය සඳහා ඉවහල් වූ බව ද ජනාධිපතිවරයා පෙන්වා දුන්නේ ය.
මාධ්‍ය කලාව ඉදිරියට ගෙන ඒමට කෘතිම බුද්ධිය දායක කර ගත හැකි අන්දම පිළිබඳ සොයා බැලීමෙන් ඵලදායි මාධ්‍ය කලාවක් නිර්මාණය කරගත හැකි බව ද ජනාධිපති රනිල් වික්‍රමසිංහ වැඩිදුරටත් පෙන්වා දුන්නේය.
එහිදී තවදුරටත් අදහස් දැක්වූ ජනාධිපති වික්‍රමසිංහ මෙසේ ද පැවසීය.
''1977 මා මුලින්ම බියගම ආසනයෙන් මැතිවරණය සඳහා ඉදිරිපත් වන අවස්ථාවේදී, ඒ සඳහා අවශ්‍ය ලිපියක් සකස් කර ගැනීමට හොඳ මාධ්‍යවේදියෙක් පිළිබඳ විමසූ විට මගේ පියා එක්වරම කියා සිටියේ එඩ්මන් රණසිංහයන් පිළිබඳවයි. ඒ අනුව එතුමන් විසින් මගේ දේශපාලනයේ පළමු ලිපිය ලියා තැබුවා. එය පසුගිය වසර වන තෙක්ම මා සතුව තිබුණා. නමුත් එය දැන් මා ළඟ නැහැ.
මගේ පියා ලේක්හවුස් ආයතනයේ සභාපතිවරයා ලෙස කටයුතු කළ සමයේ එඩ්මන් රණසිංහ මහතා සිළුමිණ, දිනමිණ වැනි පුවත්පත්වල කර්තෘවරයා ලෙස විශාල සේවාවක් ඉටු කළා.
එතුමාගේ පුවත්පත් කලාවට පියසේන නිශ්ශංක, එම්.ඒ. සිල්වා, මාර්ටින් වික්‍රමසිංහ වැනි ජ්‍යෙෂ්ඨතම මාධ්‍යවේදීන්ගේ හා ලේඛකයන්ගෙන් පන්නරය ලැබුණා. එම නිසා නිදහසට පෙර තිබුණු මාධ්‍ය කලාව මෙන්ම ඉන් පසුව බිහිවුණු මාධ්‍ය කලාවෙහිද මනා පරිචයක් රණසිංහ මහතා සතුව තිබෙනවා.
1953 වසරේ සහල් මිල වැඩි වූ විට ඩඩ්ලි සේනානායක මහතාට අගමැති ධූරයෙන් ඉවත්වීමට සිදු වුණා. ඊට වසර හැට නවයකට පසු තෙල් නැතිව ගෝඨාභය රාජපක්ෂ මහතාට ධූරය අතහැර යාමට සිදු වුණා. මෙම වසර 69 තුළ රණසිංහ මහතාට විශාල අත්දැකීමක් තිබෙනවා. ඒ සම්බන්ධයෙන් නැවත පොතක් ලිවීමට වුවත් එතුමාට හැකියාව තිබෙනවා.
1964 පුවත්පත් අරගලය රණසිංහ මහතා විසින් ප්‍රායෝගිකව සිදු කළා. එතුමාගේ පළපුරුද්ද මෙරට මාධ්‍ය සංස්කෘතියට යම් බලපෑමක් සිදු කිරීමට සමත් වූ බව කිව යුතුයි. නමුත් මුද්‍රිත මාධ්‍ය කලාව මේ වන විට යම් බලපෑමකට ලක් වෙමින් තිබෙනවා.
එදා ඊයම් අකුරු අමුණා සිදුකළ පත්තර කලාව අද වන විට i pad එක දක්වා දියුණු වී තිබෙනවා. ලේක්හවුස් ආයතනය වැනි මහා මන්දිරයක තිබෙන දැනුම google මාධ්‍ය තුළ ඉක්මනින් සොයා ගැනීමේ හැකියාව මේ වන විට නිර්මාණය වී අවසන්. එම නිසා පත්තර කලාව සමාජගත කිරීමට තාක්ෂණය හොඳ මෙවලමක් බවට පත්ව තිබෙනවා.
නමුත් ඕනෑම රටක පවතින මාධ්‍ය රටේ නීතියට යටත්ව ක්‍රියාත්මක වුණා. නමුත් සමාජ මාධ්‍ය බිහි වීමත් සමඟ තමන්ගේ හිතුමතය අනුව තමන්ට අවශ්‍ය දේ පළ කිරීමට කටයුතු කරමින් සිටිනවා.
මෙම සියලූ සමාජ මාධ්‍ය සහ අනෙකුත් මාධ්‍ය ජාත්‍යන්තර ගිවිසුමකට එළැඹෙනවා ද නැති නම් රටේ නීතියට අනුව කටයුතු කරනවාද කියා සාකච්ඡාවක් ඇති කළ යුතුයි. බොහෝ විට යුරෝපයේ තිබෙනන නීතියට සියලු දෙනා එකඟතාවය පළ කරාවි . දැන් ලෝකයේ තිබෙන පත්තර සහ journal එහි හිමිකරුවන් විසින් විකුණමින් හෝ එය නැවත ආයෝජන කරුවන්ට භාරදීමට සූදානම් වෙමින් තිබෙනවා. මාධ්‍ය කලාවේ ඉදිරි ක්‍රියාදාමය එළැඹෙන වසර දෙක තුන තුළ අපට දැකගන්නට පුළුවන්. එහි ප්‍රවීණයන් නිව්යෝර්ක්වලින් පමණක් නොව ශ්‍රී ලංකාවෙන් ද බිහිවිය හැකියි.''
මෙම අවස්ථාවට ජ්‍යෙෂ්ඨ පුවත්පත් කතුවර උපාලි තෙන්නකෝන්, අමාත්‍ය බන්දුල ගුණවර්ධන, මහාචාර්ය සුනන්ද මද්දුමබණ්ඩාර එක්ව සිටියහ.
මෙම උපහාර උළෙලෙහි මුඛ්‍ය දේශනය සිදු කළ ඇමෙරිකාවේ වෙසෙන දිවයින හා රිවිර පුවත්පත්වල හිටපු ප්‍රධාන කර්තෘ උපාලි තෙන්නකෝන්, එඩ්මන් රණසිංහ ගේ දශක හතක මාධ්‍ය ජීවිතය වෙනුවෙන් පවත්වන උපහාර පිදීමේ උත්සවයේ ප්‍රධාන දේශනය සිදු කිරීමට ආරාධනා කිරීම පිළිබඳ සතුටු වන බව කියා සිටියේය.
'' එතුමා සම්මාන උපහාර බලාපොරොත්තුවෙන් සිටින කෙනෙක් නොවෙයි. එතුමා හැමදාම කිව්වේ මම කළේ සේවයක් කියා පමණයි. ඒ නිසා සම්මාන උපහාර වැඩක් නැහැ කියන මතයේ එතුමා සිටියා. නමුත් රනිල් වික්‍රමසිංහ මහතාගේ සංකල්පයකට අනුව මේ සිදුකරන උපහාරය ඉතාම වැදගත් වෙනවා. මක්නිසාද යත් පුවත් පත් කලාවේ දැනට සිටින ප්‍රවීණතම මාධ්‍යවේදියා එඩ්මන්ඩ් රණසිංහයන් නිසා.
1952 වසරේදී ලේක්හවුස් ආයතනයේ ‘ඩේලිනිව්ස් ‘ පුවත්පතේ මාධ්‍යවේදියකු ලෙස සිය මාධ්‍ය ජීවිතය ඇරඹූ එඩ්මන්ඩ් රණසිංහ මහතා දිනමිණ නියෝජ්‍ය කර්තෘ පදවියද දරමින් ප්‍රවෘත්ති කර්තෘවරයාව සිටියදී 1973දී ලේක්හවුස් ආයතනය රජයට පවරා ගැනීමට එරෙහිව සේවයෙන් ඉල්ලා අස් වුණා.
1977දී යළිත් ලේක්හවුස් ආයතනයේම ඇරැයුමින් ‘දිනමිණ’ කර්තෘ පදවියට පත්වූ රණසිංහ මහතා පසුව සිළුමිණ කර්තෘවරයා ලෙස ද පත් වුණා.
1981වසරේදී ‘දිවයින’ පුවත් පතේ සමාරම්භක කර්තෘවරයා ලෙස පත් වූ රණසිංහ මහතා කෙටි කලකින්ම මෙරට පුවත්පත් කලාව නව මගකට ගෙන එමින් එය ඉහළම ජනප්‍රියත්වය කරා ගෙන ගියා. පසුව එහි මුල්ම කර්තෘ මණ්ඩල අධ්‍යක්ෂවරයාද වූ රණසිංහ මහතා 86 වියැතිව සිටියදී 2016 වසරේදී නැවතත් ‘ සිළුමිණ’ කර්තෘ පදවියට පත් වුණා.
එතුමා නිකරුනේ පිටු පුරවා පාඨකයා මහන්සි කරවීමට කැමැත්තක් දැක්වූයේ නැහැ. බුද්ධිමත් පාඨක ප්‍රජාවක් ඇති කිරිමට එතුමා කැමැත්තක් දැක්වුවා. එතුමාගේ වෘත්තීය දිවියේ අරමුණු දෙකක් තිබුණා. ඉන් එකක් වන්නේ පාඨකයාගේ රසඥතාව වැඩිකරීම හා බුද්ධිමත් පාඨක ප්‍රජාවක් ඇති කිරීමයි. එතුමාගේ මාධ්‍ය සංකල්පය අදත් අමෙරිකාවේ ක්‍රියාත්මක කරනවා.
වර්ල්ඩ් ස්ට්‍රීට් ජර්නල් අළෙවි කර ගැනීම සඳහා පාඨය ලෙස භාවිතා කරන්නේ ‘ඔබේ දරුවා පංතිකාමරයේ වීරයෙක් කරන්න’ පුවත්පත මිලදී ගන්න කියායි. එවැනි පාඨ මීට දශක තුනකට පෙර එඩ්මන් රණසිංහයන් මෙරට පුවත්පත් කලාවට එකතු කළ ඒවායි. දිවයින පුවත්පත ජනතාව අතරට ගෙනයාම සඳහා විශේෂ වැඩ කොටසක් රණසිංහයන් විසින් සිදු කළ බව මෙහිදී සඳහන් කරන්න කැමතියි. අද මේ මාධ්‍ය ක්ෂේත්‍රය තුළ සිටින දැවැන්තයන් බොහොමයක් එතුමන්ගේ සෙවණේ වැඩුණු අය වීම විශේෂත්වයක් බව කිව යුතුයි.
ජනාධිපති රනිල් වික්‍රමසිංහ මහතා නිදහස් පුවත්පත් කලාව වෙනුවෙන් විශාල වැඩකොටසක් ඉටු කර තිබෙනවා. සාපරාධි අපරාධ නීතිය ඉවත් කළා. නමුත් අද වන විට පත්තර කලාව අසීරු තත්ත්වයකයි තිබෙන්නේ. මේ සඳහා යම් කිසි සහනයක් සැලසිය හැකි නම් එය වටිනවා.''
''මෙහෙමත් පත්තර හිමිකරුවන් හිටිය''
මුඛ්‍ය දේශනය පැවැත්වූ උපාලි තෙන්නකෝන් , එඩ්මන්ඩ් රණසිංහ, ආර්. ප්‍රේමදාස, සිරිසේන කුරේ හා ලක්මිණි විජේවර්ධන අරභයා අපූරු සඳහනක් ද කළේය.
''එය ප්‍රේමදාස පාලනය හා දිවයින පුවත්පත අතර දැඩි මතභේද තිබූ යුගයකි.
ප්‍රේමදාස මහතා තම හිතේෂිවන්තයා වූ සිරිසේන කුරේ අත ලක්මිණි විජේවර්ධන මහත්මියට පණිවිඩයක් යැව්වේය.
එයින් කියැවුණේ එඩ්මන්ඩ් රණසිංහව දිවයින පුවත්පතෙන් අස් කරනවා නම් උපාලි සමාගම විසින් රාජ්‍ය බැංකුවලට ගෙවීමට ඇති සියලු ණය කපා දැමීමට හැකි බවයි.
" මට ණයවලට වඩා මිස්ටර් රණසිංහව වටිනවා"
ලක්මිණි විජේවර්ධන ගෙන් සිරිසේන කුරේට ලැබුනු පිළිතුර වී ඇත්තේ එයයි.
ශ්‍රී ලංකා පදනම් ආයතනයේ සභාපති ජ්‍යෙෂ්ඨ මාධ්‍යවේදී සමන් අතාවුදහෙට්ටි විසින් මෙම වැඩසටහන මෙහෙයවූ අතර එම අවස්ථාවට අග්‍රාමාත්‍ය දිනේෂ් ගුණවර්ධන, ජනමාධ්‍ය අමාත්‍ය ආචාර්ය බන්දුල ගුණවර්ධන, ජනමාධ්‍ය රාජ්‍ය අමාත්‍ය ශාන්ත බණ්ඩාර, පාර්ලිමේන්තු මන්ත්‍රී නීතිඥ ප්‍රේමනාත්. සී. දොළවත්ත, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන, ජනමාධ්‍ය අමාත්‍යාංශයේ ලේකම් අනූෂ පැල්පිට, රජයේ ප්‍රවෘත්ති අධ්යක්ෂ ජනරාල් දිනිත් චින්තක කරුණාරත්න සහ මාධ්‍ය ආයතන ප්‍රධානීන්, පුවත්පත් කර්තෘවරුන් ඇතුළු ජ්‍යෙෂ්ඨ මාධ්‍යවේදීන් රැසක් මෙම අවස්ථාවට එක්ව සිටියහ .
සබැඳි පුවත් :
මම ඔහුගේ හිතුවක්කාර පුත්‍රයා වෙමි!
එඩ්මන්ඩ් රණසිංහ උපහාර උළෙල 03දා
රණසිංහ මහත්තයා - ඇටමැස්සා (99)
