*තුන් හැවිරිදි සරණාගත දැරියකගේ සිට යුරෝපීය කැබිනට් මණ්ඩලය දක්වා ගිය අභියෝගාත්මක ගමන
*නෝර්වේහි මහාමාර්ග, දුම්රිය, ගුවන් සහ නාවික ප්රවාහන ජාලයේ පූර්ණ වගකීම ඇයට
උතුරු යුද බිමේ සිට නෝර්වේ කැබිනට් මණ්ඩලයට
ශ්රී ලංකාවේ උපත ලබා විදෙස් රටක ඉහළම විධායක තනතුරකට පත් වූ තවත් සුවිශේෂී චරිතයක් පිළිබඳව ජාත්යන්තර දේශපාලන කරළියෙන් වාර්තා වේ. යාපනයේ උපන් දෙමළ සම්භවයක් සහිත කම්සි ගුණරත්නම් (Kamzy Gunaratnam) නෝර්වේ රාජ්යයේ නව ප්රවාහන අමාත්යවරිය ලෙස නිල වශයෙන් පත් කර තිබේ.
නෝර්වේ අග්රාමාත්ය ජෝනාස් ගාර් ස්ටෙරේගේ ප්රධානත්වයෙන් පැවති කැබිනට් සංශෝධනයේදී මෙම පත්වීම සිදු කෙරුණු අතර, ඒ අනුව ඇය මෙතෙක් එම ධුරය හෙබවූ ජොන්-ඉවාර් නිගාර්ඩ් වෙනුවට වගකීම් භාර ගත්තාය. නෝර්වේ ප්රවාහන අමාත්යාංශය යටතට එරට මහාමාර්ග, දුම්රිය, ගුවන් ගමන්, නාවික ප්රවාහන පද්ධතිය මෙන්ම තැපැල් සේවාව ආදී සමස්ත ප්රවාහන යටිතල පහසුකම් කළමනාකරණය කිරීමේ පූර්ණ බලතල හිමිවේ.
ළමා වියේ දුෂ්කරතා සහ දේශපාලන ප්රවිෂ්ටය
1988 මාර්තු 27 වැනිදා යාපනයේදී ‘ඛම්ෂජිනී ගුණරත්නම්’ නමින් උපන් ඇය, උතුරේ පැවති ගැටුම්කාරී වාතාවරණය හේතුවෙන් 1991 වසරේදී සිය දෙමව්පියන් සමඟ තුන් හැවිරිදි වියේදී සරණාගතභාවය පතා නෝර්වේ බලා පිටත්ව ගියාය. නෝර්වේහි උතුරු කෙළවරේ පිහිටි හැමර්ෆෙස්ට් නගරයේ පදිංචි වූ ඇගේ පවුලේ සාමාජිකයන් ධීවර ක්ෂේත්රයේ රැකියාවල නිරත වෙමින් ජීවිතය ආරම්භ කර ඇති අතර, පසුව දරුවන්ගේ අධ්යාපන අවශ්යතා වෙනුවෙන් ඔස්ලෝ අගනුවර වෙත සංක්රමණය විය.
ඔස්ලෝ විශ්වවිද්යාලයෙන් සමාජ භූගෝල විද්යාව පිළිබඳ උසස් අධ්යාපනය හැදෑරූ ඇය, කුඩා කල සිටම සමාජ සාධාරණත්වය සහ මානව අයිතිවාසිකම් වෙනුවෙන් ක්රියාකාරී වූවාය. නෝර්වේ කම්කරු පක්ෂයේ (Labour Party) තරුණ සංවිධානය හරහා දේශපාලනයට පිවිසි කම්සි, 2007 වසරේදී වයස අවුරුදු 19 ක් වන විට ඔස්ලෝ නගර සභාවට තේරී පත්වූවාය. අනතුරුව 2015 සිට 2021 දක්වා වසර හයක කාලයක් ඔස්ලෝහි නියෝජ්ය නගරාධිපතිනිය ලෙස කටයුතු කරමින් නාගරික පරිපාලනය පිළිබඳ පුළුල් අත්දැකීම් සම්භාරයක් ලබා ගැනීමට ඇය සමත් විය.
උටෝයා ඛේදවාචකයෙන් දිවි ගලවා ගැනීම
ඇගේ ජීවිතයේ අතිශය තීරණාත්මක සිදුවීමක් වන්නේ 2011 වසරේ නෝර්වේහි උටෝයා දූපතේ පැවති තරුණ කඳවුරට එල්ල වූ ත්රස්ත ප්රහාරයයි. තරුණ නියෝජිතයන් 69 දෙනෙකු ඝාතනයට ලක්වූ එම බිහිසුණු අවස්ථාවේදී, විල හරහා මීටර් 500කට අධික දුරක් පිහිනා යමින් දිවි බේරා ගැනීමට 23 හැවිරිදි වියේ පසුවූ ඇයට හැකි විය. එම ඛේදවාචකයෙන් පසුව ඇය සමාජ ඒකාග්රතාව සහ ප්රජාතන්ත්රවාදී වටිනාකම් වෙනුවෙන් තවදුරටත් කැපවී කටයුතු කළාය.
පාර්ලිමේන්තු නියෝජනය සහ නව වගකීම
2021 මහ මැතිවරණයේදී ඔස්ලෝ දිස්ත්රික්කය නියෝජනය කරමින් නෝර්වේ පාර්ලිමේන්තුවට (Storting) තේරී පත්වූ ඇය, මෑතකදී අවසන් වූ මහ මැතිවරණයෙන්ද නැවත පාර්ලිමේන්තුවට තේරී පත්වූවාය. ප්රවාහන අමාත්ය ධුරයට පත්වීමට පෙර ඇය පාර්ලිමේන්තුවේ ප්රවාහන හා සන්නිවේදන ස්ථාවර කාරක සභාවේ පළමු උප සභාපතිනිය ලෙසද ක්රියා කළාය.
කැබිනට් පත්වීමෙන් පසු අදහස් දැක්වූ නෝර්වේ අග්රාමාත්ය ජෝනාස් ගාර් ස්ටෙරේ සඳහන් කළේ, කම්සි ගුණරත්නම් මෙතෙක් තමන් දැරූ සියලු දේශපාලන වගකීම් ඉහළ දක්ෂතාවයකින් සහ පරිණතභාවයකින් ඉටු කර ඇති බවයි. ඇය උතුරු මෙන්ම දකුණු නෝර්වේ යන ප්රදේශ දෙකෙහිම හැදී වැඩුණු බැවින්, මුළු රටම එකට යා කරන ප්රවාහන ක්ෂේත්රය කාර්යක්ෂමව මෙහෙයවීමට ඇයට හැකියාව පවතින බවද අග්රාමාත්යවරයා පෙන්වා දුන්නේය.
ශ්රී ලංකාව පිළිබඳ දැක්ම
විදෙස් දේශපාලන ධාරාවේ ඉහළට ගමන් කළද, තමා උපන් මව්බිම වන ශ්රී ලංකාවේ සිදුවීම් පිළිබඳවද ඇය නිරන්තර අවධානයකින් පසුවූවාය. 2026 වසරේ මුල් භාගයේදී නෝර්වේ පාර්ලිමේන්තුවේ පැවති විවාදයකදී ඇය සඳහන් කර තිබුණේ, තමා ගැටුම් සහිත පරිසරයක උපන් අයෙකු බවත්, යුද සමයේ අතුරුදන් වූවන් සම්බන්ධ ගැටලු සහ සංහිඳියාව ගොඩනැගීමේ ක්රියාවලිය ශ්රී ලංකාවේ ඉදිරි ගමනට අතිශය වැදගත් වන බවත්ය.
වැඩිදුර කියවීම සඳහා මූලාශ්ර සබැඳි
Tamil Guardian: From Tamil refugee to Norway's transport minister
Wikipedia: Kamzy Gunaratnam Profile & Political Career
