දෙරටේ සුළුතර ප්රජාවන්ගේ අධ්යාපනික හා සමාජ සුබසාධනය ගැන දීර්ඝ අවධානයක්
කලාපීය සහයෝගීතාව හා සංස්කෘතික බැඳීම් ශක්තිමත් කරගැනීමට එකඟතාව
මේ දිනවල ශ්රී ලංකාවේ සංචාරයක නිරතව සිටින තමිල්නාඩු ප්රාන්ත රජයේ සුළුතර ප්රජා සුබසාධන හා වක්ෆ් මණ්ඩල විෂයභාර අමාත්ය (Minister for Minorities Welfare and Non-Resident Tamils Welfare / Wakf Board) ඒ. එම්. ෂාජහාන් (A. M. Shahjahan) ඇතුළු විශේෂ නියෝජිත පිරිසක් ශ්රී ලංකා මුස්ලිම් කොංග්රසයේ අම්පාර දිස්ත්රික් ප්රධාන කාර්යාලය වෙත ද ගොස් තිබිණ.
එහිදී පක්ෂ නායක, පාර්ලිමේන්තු මන්ත්රී රවුෆ් හකීම් ගේ ප්රධානත්වයෙන් තමිල්නාඩු අමාත්යවරයා ඇතුළු දූත පිරිස උණුසුම් අයුරින් පිළිගැනීමට පියවර ගෙන ඇත.
සමාජ හා අධ්යාපනික සබඳතා ගැන විශේෂ අවධානයක්
පිළිගැනීමේ උත්සවයෙන් අනතුරුව පැවති ද්විපාර්ශ්වික සාකච්ඡාවේදී ශ්රී ලංකාවේ මෙන්ම තමිල්නාඩුවේ වෙසෙන සුළුතර ප්රජාවන්ගේ වත්මන් සමාජ තත්ත්වය, අධ්යාපන ක්ෂේත්රයේ ප්රගතිය සහ සුබසාධන වැඩසටහන් සම්බන්ධයෙන් කරුණු හුවමාරු කරගෙන ඇත. විශේෂයෙන් දෙරටේ ප්රජාවන් අතර පවතින ඓතිහාසික සහ සංස්කෘතික බැඳීම් වඩාත් ප්රායෝගික මට්ටමකින් ඉදිරියට ගෙන යාම කෙරෙහි දෙපාර්ශ්වයේම අවධානය යොමුව තිබේ.
කලාපීය සහයෝගීතාව තුළින් ජනතා මට්ටමේ සබඳතා වර්ධනය කරගැනීමත්, තරුණ පරපුරේ අධ්යාපනික අවස්ථා පුළුල් කරගැනීම සඳහා ගත හැකි ක්රියාමාර්ග පිළිබඳවත් මෙහිදී අදහස් පළ වී තිබේ.
ජ්යෙෂ්ඨ නියෝජිතයන් පිරිසක් සාකච්ඡාවට එක්වෙයි
මෙම අවස්ථාව සඳහා ශ්රී ලංකා මුස්ලිම් කොංග්රසයේ මහලේකම් පාර්ලිමේන්තු මන්ත්රී නිසාම් කාරියප්පර්, පක්ෂ භාණ්ඩාගාරික රහ්මත් මන්සූර්, නියෝජ්ය ලේකම් මන්සූර් ඒ. කාදර්, විදේශ කටයුතු අධ්යක්ෂ සිරාෂ් මීරාසාහිබ්, අම්පාර දිස්ත්රික් ලේකම් ඒ.සී. සමාල්දීන් ඇතුළු පක්ෂයේ උත්තරීතර මණ්ඩල නියෝජිතයෝ එක්ව සිටියහ.
තමිල්නාඩු අමාත්යවරයා සමඟ පැමිණි විශේෂ නියෝජිත පිරිසද මෙම හමුවට එක්ව සිටි අතර, සාකච්ඡාව ඉතා මිත්රශීලී හා සාධනීය වාතාවරණයක පැවති බව වාර්තා වේ.
පුවත් වාර්තාකරණය: ෆාරුක් සිහාන්
Journalist-මාධ්යවේදී
FAROOK SIHAN(SSHASSAN)
B. F .A (Hons)Diploma-in-journalism(University of Jaffna )
උපුටා ගැනීම : puthiyakural.lk
