යුද්ධයෙන් මළවුන් අනුස්මරණය සඳහා ඉදිකර තිබූ ස්මාරකයක් රජය විසින් විනාශ කර දැමීම හෙලා දකිමින් දෙමළ ජනතාව විසින් උතුරු නැගෙනහිර දියත් කර ඇති හර්තාලයට මුස්ලිම්වරුන්ගේද සහාය පලවී තිබේ.
යාපනය සරසවි බිමේ පිහිටි මළවුන්ගේ ස්මාරකය යන්ත්‍රෝපකරණ යොදාගනිමින් සන්නද්ධ හමුදා සහායෙන් ජනවාරි 8 සිකුරාදා රාත්‍රියාමයේ කඩා බිඳ දැමීමට එරෙහිව දෙස් විදෙස් විරෝධය ගලා එද්දී ප්‍රධාන මුස්ලිම් දේශපාලන පක්ෂ සිය අනුගාමිකයන්ගෙන් ඉල්ලා ඇත්තේ අද දින පැවැත්වෙන සාමකාමී විරෝධයට එක්වන ලෙසයි.
“ස්මරණය සහ මළවුන්ට ගරු කිරීම සම්බන්ධයෙන් දක්වන අසංවේදී භාවයට එරෙහිව උතුරු නැගෙනහිර කැඳවා ඇති හර්තාලයට සහෝදර දෙමළ ජනතාව සමග අත්වැල් බැඳගෙන පූර්ණ සහාය දක්වන මෙන්ද, මළවුන් වෙනුවෙන් යාපනය විශ්ව විද්‍යාලයේ ඉදිකර තිබූ අනුස්මරණ ස්මාරකය විනාශ කිරීම සහ මුස්ලිම් ජනයා (කෝවිඩ් 19 ආසාදිත) බලහත්කාරයෙන් ආදාහනය කිරීම හෙලා දකින මෙන්ද ශ්‍රී ලංකා මුස්ලිම් කොන්ග්‍රසය මුස්ලිම්වරුන්ගෙන්ද, තම ආධාරකරුවන්ගෙන්ද ඉල්ලා සිටී,” යනුවෙන් මුස්ලිම් කොන්ග්‍රස් මහ ලේකම් නිසාම් කාරියප්පර් පවසා සිටී.
“යාපනය විශ්ව විද්‍යාලයේ ස්මාරක බිඳහෙලීමේ අශික්ෂිත ක්‍රියාව සමස්ත ලංකා මක්කල් කොන්ග්‍රසයේ සාමාජිකයන් සමග මමද දැඩි ලෙස හෙලා දකිමි. ඕනෑම ආගමකට අයත් පුද්ගලයන්ගේ අයිතිවාසිකම් සහ හැඟීම් වලට ගෞරව කළ යුතුය!!!” යි මක්කල් කොන්ග්‍රස් නායක රිෂාඩ් බදියුදීන් ට්විටර් පණිවිඩයකින් දන්වා තිබුණි.
අන්ධකාරයට මුවාවී සමරුව බිඳ හෙලීමේ ලජ්ජා සහගත අවක්‍රියාව හෙලා දකිමින් ශ්‍රී ලාංකික දෙමළ, සිංහල, මුස්ලිම් පිරිස් සිය බලවත් ශෝකයත්, කෝපයත් පලකොට තිබෙනු සමාජ මාධ්‍ය ජාලා වල දැක ගන්නට ලැබුණි.
වීඩියෝ සහ ඡායාරූප වලින් පෙන්නුම් කෙරුනේ ස්මාරකය ආරක්ෂා කර ගැනීම සඳහා ඇදී ආ ජනතාව බියවද්දන ආකාරයෙන් සන්නද්ධ හමුදා, පොලිස් හා විශේෂ කාර්ය සාධක බලකා (STF) සෙබළුන් ආයුධ සන්නද්ධව සිටින ආකාරයයි.
සරසවි සිසුන් බියෙන්
විනාශයෙන් පසු උපවාසයක් දියත් කර ඇති යාපනය සරසවි සිසුන් විසින් තම අරගලයට සහාය දක්වන ලෙස ඉල්ලා ලොව පුරා විශ්ව විද්‍යාල හා ශාස්ත්‍ර ලාභීන් අමතා ලියා ඇති ලිපියකින් තම ජීවිතයට අනතුරක් ඇති බවට බිය පල කර ඇත.
“විශ්ව විද්‍යාල පරිශ්‍රය තුල පිහිටි අනුස්මරණ ස්මාරක ඉවත් කිරීමට ශ්‍රී ලංකා ආණ්ඩුව සැලසුම් කරමින් සිටියේ අවුරුදු ගණනාවක් තිස්සේය,” යි යාපනය විශ්ව විද්‍යාල ශිෂ්‍ය සංගමය තම ලිපියෙන් පවසයි.
“දැනට අපේ විශ්ව විද්‍යාල භූමියට දැඩි ලෙස සන්නද්ධ මුරකාවල් යොදා ඇති අතර අපේ විශ්ව විද්‍යාලයට ඇතුල්වීමෙන් අප වලක්වා තිබේ. අපේ ජීවිතාරක්ෂාව සම්බන්ධයෙන් බියෙන් සිටින අප ඔබෙන් කාරුණිකව ඉල්ලා සිටින්නේ මෙම තත්වය වලක්වා ලීමට උදව් දෙන ලෙසයි.”
බලධාරීන් ගේ පරස්පර කතා:
සමරුව බිඳ හෙලීමේ වගකීම සම්බන්ධයෙන් විශ්ව විද්‍යාල බලධාරීන් කියා ඇත්තේ එකිනෙකට පරස්පර කතාය.
යාපනය විශ්ව විද්‍යාලයේ උපකුලපතිවරයා පවසන පරිදි ස්මාරකය ඉදිකළ 2019 සිටම එය ඉවත් කරන ලෙස ආණ්ඩුවේ හා සන්නද්ධ අංශවලින් ඔහුට බලපෑම් එල්ලවී තිබේ.
“උතුරු දකුණු සමගියට බාධාවක්” ලෙස ස්මාරකය හඳුන්වන විශ්ව විද්‍යාල ප්‍රතිපාදන කොමිසන් සභාවේ සභාපති මහාචාර්ය සම්පත් අමරතුංග පවසන්නේ “ඒ ස්මාරකය අද දවසට, හෙට දවසට නොගැලපෙන නිසා එය යාපනය විශ්ව විද්‍යාලයෙන් ඉවත් කිරීමට,” උප කුලපතිවරයා තීරණය කළ බවයි.
මහාචාර්ය අමරතුංග පවරන වගකීම භාර ගන්නට උප කුලපති සූදානම් නැත.
“පරිපාලන වගකීමක් දරන සිවිල් වැසියකු වන මට උපදෙස් ලැබුනේ ඉහල බලධාරීන්ගෙන්. ඒ ඉහල බලධාරීන් තමයි ශ්‍රී ලංකාවේ ආරක්ෂක අංශ, බුද්ධි අංශ, අධ්‍යාපන අමාත්‍යාංශය හැමෝම,” යයි උප කුලපති මහාචාර්ය එස් ශ්‍රීසද්ගුණරාජා මාධ්‍යවේදීන්ට පවසා තිබුණි.
අන්තරේ විරෝධය:
යුද්ධයෙන් මියගිය හමුදා සෙබළුන් සමරන ස්මාරක.
යුද්ධයෙන් මියගිය පුද්ගලයන් සිහිපත් කිරීම අයිතියක් බව අවධාරණය කරන අන්තර් විශ්ව විද්‍යාලීය ශිෂ්‍ය බල මණ්ඩලය (අවිශිබම) යුද්ධයෙන් මියගිය හමුදා සෙබළුන් සමරන ස්මාරක මෙන්ම ජනතා විමුක්ති පෙරමුණ රජයට විරුද්ධව කැරළි ගැසූ 1971 සහ 80 දශකය අගභාගයේ මරා දමන ලද මිනිසුන් සිහිපත් කිරීම සඳහා දකුණේ සැමරුම් උත්සව සංවිධානය කරනු ලබන බවද පෙන්වා දෙයි.
“නිදහස් අධ්‍යාපනය වෙනුවෙන් සිදුකරන අරගලයේදී රජය විසින් ඝාතනය කෙරුණු සිසුන් සිහි කෙරෙන විරුසිසු ස්මාරක විශ්ව විද්‍යාල වල සිසුන් විසින් ඉදිකර තිබේ,” යි අවිශිබම කැඳවුම්කාර රත්කරව්වේ ජිනරතන හිමියන්ගේ අත්සනින් නිකුත් කළ නිවේදනයකින් සිහිපත් කර දී තිබේ.
යාපන සරසවියේ ස්මාරකය බිඳහෙලීම සැලසුම් සහගත ක්‍රියාවක් ලෙසින් අවිශිබම විසින් හෙලා දැක තිබේ.
“මෙය ජනවාරි 08 දින සිදුවූ හුදෙකලා සිදුවීමක් නොවේ. මින් පෙර රජය විසින් උතුරේ මියගියවුන් සිහිකෙරෙන සැමරුම් උත්සව තහනම් කරන ලදී. සන්නද්ධ මැදිහත්වීම් වලින් ඒවා වලක්වන ලදී. දැන් මියගියවුන් වෙනුවෙන් ඉදිකළ ස්මාරක කඩා බිඳ දමමින් තිබේ. මෙය විශ්ව විද්‍යාල පාලනාධිකාරිය විසින් සිදු කළ ක්‍රියාවක් බව කියමින් විශ්ව විද්‍යාල ප්‍රතිපාදන කොමිසන් සභාවත් ආණ්ඩුවත් අත පිස දමා ගැනීමට සැරසෙයි. නමුත් මෙය ආණ්ඩුව සැලසුම් සහගතව සිදුකළ ක්‍රියාවක් බව පැහැදිලිව පෙනෙන්නට තිබෙයි.”
ස්මාරක විනාශය තමිල්නාඩු මහ ඇමැති එඩප්පඩි පලනිසාමි විසින් දැඩි ලෙස හෙලා දැක තිබුනේ “ශ්‍රී ලංකා රජයේ කුරිරු ක්‍රියාවක්” ලෙසිනි.ද්‍රාවිඩ මුන්නේත්‍ර කළහම් නායක එම් කේ ස්ටාලින් ඉන්දීය අගමැතිවරයාගෙන් ඉල්ලා තිබුනේ ශ්‍රී ලංකාවේ රජයට දැඩි විරෝධය පල කරන ලෙසයි.පොදුරාජ්‍ය මණ්ඩලය සහ දකුණු ආසියාව භාර බ්‍රිතාන්‍ය අමාත්‍ය තරික් අහ්මඩ් සාමිවරයා සමරුව කඩා බිඳ දැමීම ගැන සිය කනගාටුව පල කර තිබුණි.
සබැඳි පුවත් :
###################
අද මෙතන - හෙට අතන - හිමි රතන - ආණ්ඩුවට!
