උතුරු හා නැගෙනහිර ජීවත් වන ජනතාවගේ මානව හිමිකම් පිළිබඳව
රටේ සෙසු ජන කොටස් දැනුවත් කිරීම වෙනුවෙන් පොතුවිල් සිට පොලිකන්ඩි දක්වා දියත් කර ඇති පාදයාත්‍රාවට එක්වීමට සුදානම් වී යාපනයේ විපක්ෂ දෙමළ දේශපාලනඥයන් කිහිප දෙනකු හට උසාවියෙන් තහංචි පනවා තිබේ.
හිටපු උතුරු පළාත් සභා මන්ත්‍රී එම්.කේ සිවාජිලිංගම් මාධ්‍යවේදීන් හා පවසා ඇත්තේ තමන් ඇතුළු දේශපාලනඥයන් කිහිපදෙනකු වෙත පෙබරවාරි 3 බදාදා යාපනයේ මහේස්ත්‍රාත් අධිකරණය විසින් තහනම් නියෝගය නිකුත් කර ඇති බවයි.
අම්පාර දිස්ත්‍රික්කයේ පොතුවිල් නගරයෙන් පෙබරවාරි 3 බදාදා දියත් කරන ලද සාම පාද යාත්‍රාව සිව් දිනකට පසු යාපනය දිස්ත්‍රික්කයේ පොලිකන්ඩියෙන් නිම වීමට නියමිතව ඇත්තේ ජනවාරි 6 දා ය.
එම්.කේ සිවාජිලිංගම් හිටපු මන්ත්‍රීවරයා පවසන පරිදි යාපනයේ මහේස්ත්‍රාත් අධිකරණය නිකුත් කළ තහනම් නියෝගයට අනුව පෙබරවාරි 3 සිට 6 දක්වා කාලය තුලදී යාපනය අධිකරණ බල ප්‍රදේශය තුළ විරෝධතා , විරෝධතා පා ගමන් කණ්ඩායම් වශයෙන් හෝ තනිව සිදු කිරීම තහනම් කර තිබේ.
මේ වනවිට නැගෙනහිර පළාතේ පොතුවිල්, කොක්කඩිචෝලේ සහ මඩකලපුව උසාවි වලට අමතරව උතුරේ යාපනය, මන්නාරම හා වවුනියාව මහේස්ත්‍රාත් අධිකරණ වලින්ද දෙමළ විරෝධතා වලට එරෙහිව නියෝග ලබා ගැනීමට පොලිසිය පියවර ගෙන ඇත.
ඉලංගෙයි තමිල් අරසු පක්ෂයේ නායක මාවෙයි සේනාධිරාජා, යාපනය නගරාධිපති විශ්වලිංගම් මනිවන්නන්, නීතිඥ කනගරත්නම් සුගාෂ්, දෙමළ ජාතික සංධානයේ හිටපු පාර්ලිමේන්තු මන්ත්‍රී ඊ සරවනභවන්, හිටපු උතුරු පළාත් සභාපති සී.වී.කේ සිවඥානම් ට මෙන්ම යාපනයේ විශ්ව විද්‍යාල ශිෂ්‍ය සංවිධානයේ සාමාජිකයන් වෙතත් තහනම් නියෝග නිකුත් කර තිබෙන බව පළාත් බද මාධ්‍යවේදීහු වැඩි දුරටත් සඳහන් කරති.
කෙසේ වෙතත්, උසාවි නියෝග නොතකා වවුනියාවේ දෙමළ මව්වරුන් කළු වතින් සැරසී රාජ්‍ය නිදහස් දිනය කළු දිනයක් ලෙස නම් කරමින් සංකේතාත්මක උපවාසයක් පැවැත්වුහ.
ඊට නායකත්වය දී තිබුනේ බලහත්කාරයේ අතුරුදහන් කරනු ලැබුවන්ගේ ඥාතීන් විසිනි.
අධිකරණය විසින් තහනම් නියෝගයක් නිකුත් කර ඇති හෙයින් පාද යාත්‍රාවට සහාය දැක්වීම සදහා ගන්නා ක්‍රියාමාර්ගය කුමක්දැයි මාධ්‍යවේදීන් සිදු කළ විමසීමකදී හිටපු උතුරු පළාත් සභා මන්ත්‍රී එම්.කේ සිවාජිලිංගම් පවසා ඇත්තේ සිදු වන්නේ කුමක්දැයි දැක ගැනීමේ වගකීම මුළු රටම සතු වන බවයි.
සුළු ජාතීන්ගේ මානව හිමිකම් දිගින් දිගටම උල්ලංඝනය වෙමින් පැවතීමට විරෝධය දක්වා දෙමළ ජනයා නැගෙනහිර සිට උතුර දක්වා ආරම්භ කළ සාම පාද යාත්‍රාවේ පළමු දිනය හැත්තෑ තුන්වැනි නිදහස් දිනයට පෙරදා අම්පාර දිස්ත්‍රික්කයේ පොතුවිල් නගරයෙන් ආරම්භ කර එදින පස්වරුවේ මඩකලපුවෙන් අවසන් කරන ලදී.
අධිකරණ නියෝග කිහිපයක්ම ලබා ගනිමින් එය වළකාලීමට අවස්ථා කිහිපයකදීම පොලීසිය ගත් උත්සාහය සාර්ථක වූයේ නැත.
පාද යාත්‍රාවේ දෙවැනි දිනය ජාතික නිදහස් දිනය යෙදී තිබෙන පෙවරවාරි 4 බ්‍රහස්පතින්දා පෙරවරුවේ මඩකලපුවෙන් ආරම්භ වු අතර එය පස්වරුවේ ත්‍රිකුණාමලයෙන් නිමා වීය.
දෙමළ ජනතාවගේ ඉඩම් අහිමිකිරීම, වතුකරයේ ජනතාවගේ දෛනික වැටුප රුපියල් දහස දක්වා වැඩි නොකිරීම, කොරෝනාබාධිතව මිය යන ඉස්ලාම් භක්තිකයන්ගේ මළ සිරුරු පුළුස්සා දැමීම හා පාස්කු ප්‍රහාරයෙන් පසු “බොරුවට අත්අඩංගුවට ගෙන සිටින” තරුණ තරුණියන් නිදහස් කරන ලෙස බල කිරීමත් විරෝධයේ අරමුණු බව දෙමළ ජාතික සන්ධානයේ ඊයේ අවධාරණය කර තිබුනි.
අතුරුදහන් කරනු ලැබුවන්ගේ ඥාතීන් , කතෝලික රදගුරුවරුන්, ක්‍රිස්තියානි පුජකවරුන්, අතුරුදහන් වුවන්ගේ ඥාතීන්ගේ සංගම් නායිකාවන්, දෙමළ විපක්ෂ මන්ත්‍රීවරුන්, බහුජන ක්‍රියාධරයන්, මුස්ලිම් ප්‍රජා නායකයන්, වෘත්තීය සමිති හා වෙළෙඳ සංගම් නායකයන් ට අමතරව සාමාන්‍ය වැසියන්ද දහස් ගණනින් විරෝධතාවයට එක්ව සිටිති.
සබැඳි පුවත් :
නිදහසට 73යි - ලංකාවට මියෙන්මාරයෙන් පාඩමක්
රෝයල් ප්‍රින්සිපල් එලවන්න ආනන්ද හිමියන්ට ගතු කියපු පොහොට්ටු ලේකම්ට වෙච්ච දේ!
