*තිර 5කින් සහ VIP ශාලා දෙකකින් සමන්විත අතිනවීන සිනමා සංකීර්ණය 2026 අවසන් වීමට පෙර The Shoppes හි 10 වන මහලේ විවෘත වෙයි
*සාප්පු සවාරි, භෝජන සහ විනෝදාස්වාදය එකම වහලක් යටට ගෙන එමින් කොළඹ නාගරික ආර්ථිකයට නව පණක්
සිනමා ක්ෂේත්රයේ සුවිශේෂී කඩඉමක් සහ නාගරික විනෝදාස්වාදයේ වෙනස
කොළඹ 'City of Dreams Sri Lanka' හි පිහිටි 'The Shoppes' නාගරික සංකීර්ණයේ සිය නවතම සිනමා සංකීර්ණය (Multiplex) ස්ථාපිත කිරීමට Scope Cinemas සමාගම ගත් තීරණය, හුදෙක් තවත් එක් සිනමා ශාලාවක් එකතු වීමකට එහා ගිය සුවිශේෂී ආර්ථික හා ජීවන රටා පෙරළියකි. සාප්පු සවාරි, උසස් පෙළේ භෝජන, නිදහස් විවේකය සහ අධි-තාක්ෂණික සිනමා අත්දැකීම් එකම වහලක් යටට ගෙන ඒම මගින් කොළඹ විනෝදාස්වාද ආර්ථිකයේ ස්වභාවය වෙනස් කිරීම මෙහි මූලික අරමුණයි.
2026 වසර අවසන් වීමට පෙර The Shoppes හි 10 වන මහලේ විවෘත කිරීමට නියමිත මෙම තිර පහකින් (5-screen) සමන්විත සිනමා සංකීර්ණයට, විශේෂිත VIP සිනමා ශාලා දෙකක්, ප්රභූ විවේකාගාර සහ ඉහළ පෙළේ භෝජන අත්දැකීම් ඇතුළත් වේ. උසස් තාක්ෂණයෙන් යුත් සිනමා අත්දැකීම් සීමිත මට්ටමක පවතින ශ්රී ලංකා සිනමා කර්මාන්තය තුළ මෙය ප්රේක්ෂක බලාපොරොත්තු සම්පූර්ණයෙන්ම වෙනස් කරනු ඇතැයි ක්ෂේත්රයේ විචාරකයෝ පෙන්වා දෙති.
විලාසිතා සංකීර්ණවල ප්රධාන ආකර්ෂණය සහ ඉදිරි ව්යාප්තිය
වර්තමාන ලෝක ප්රවණතාවන්ට අනුව, සිනමා සංකීර්ණ හුදෙක් වෙන්වූ ව්යාපාර ලෙස ක්රියාත්මක වනවාට වඩා දැවැන්ත වෙළෙඳ සංකීර්ණ සජීවීව පවත්වාගෙන යන ප්රධාන ආකර්ෂණීය බලවේගය (Anchor attraction) ලෙස ක්රියා කරයි. මෙමගින් පැමිණෙන පාරිභෝගිකයන් සංකීර්ණය තුළ ගතකරන කාලය දීර්ඝ වන අතර, එය ආපනශාලා, සිල්ලර වෙළෙඳසැල් සහ සසු විනෝදාස්වාද අංශයන්හි ආදායම් වර්ධනයට සෘජුවම දායක වේ.
2025 අගෝස්තු මාසයේදී අදියර කිහිපයකින් ආරම්භ වූ The Shoppes සංකීර්ණයේ 7 සහ 8 වන මහල් මේ වන විට ක්රියාත්මක වන අතර, ඉදිරි මාස කිහිපය තුළ දියබට මහල (Waterfront ground level), නව ආහාර සංකීර්ණය (Food court) සහ රාත්රී විනෝදාස්වාද අංශ ඇතුළත් 9 සහ 10 වන මහල් විවෘත වීමට නියමිතය.
සිනමන් ලයිෆ් නගර සංකීර්ණයේ (Cinnamon Life at City of Dreams Sri Lanka) සාමාන්යාධිකාරී සහ කොළඹ හෝටල් අංශයේ ජ්යෙෂ්ඨ උප සභාපති කමල් මුණසිංහ සඳහන් කළේ, The Shoppes යනු හුදෙක් සාප්පු සවාරි යන ස්ථානයකට වඩා වැඩි දෙයක් ලෙස සැලසුම් කළ එකක් බවත්, Scope Cinemas සමඟ හවුල්කාරීත්වය හරහා පාරිභෝගිකයන් නැවත නැවතත් ආකර්ෂණය කරගැනීමේ පරිසරයක් ගොඩනැගෙන බවත්ය.
ජාත්යන්තර ප්රමිතිය සහ වෙළෙඳපොළ තරගකාරීත්වය
Scope Cinemas හි සභාපති සහ ප්රධාන විධායක නිලධාරී නාවීඩ් කාඩර් පෙන්වා දෙන්නේ, ජාත්යන්තර මට්ටමේ සිනමා අත්දැකීමක් අතිනවීන තාක්ෂණය සහ ඉහළ ආගන්තුක සත්කාර අත්දැකීම් සමඟ එකතු කර මෙරට ප්රේක්ෂකයන්ට තිළිණ කිරීමට මෙමගින් අවස්ථාව ලැබෙන බවයි.
මෙම තීරණය මගින් පාරිභෝගික වියදම් ආකර්ෂණය කරගැනීම සඳහා කොළඹ නගරයේ පවතින ප්රමුඛ පෙළේ ජීවන රටා සංකීර්ණ (Lifestyle developments) අතර පවතින තරගකාරීත්වයද මනාව පැහැදිලි වේ. හුදෙක් භාණ්ඩ අලෙවිය මත පමණක් නොරැඳී, දවස පුරා සහ රාත්රී කාලයේදීද ජනතාව ආකර්ෂණය කරගත හැකි විනෝදාස්වාද අංග කෙරෙහි සංවර්ධකයන් වැඩි අවධානයක් යොමු කරමින් සිටිති.
The Shoppes සංකීර්ණයේ පළමු සංවත්සරයට ආසන්නව මෙම නිවේදනය නිකුත් වීම ද විශේෂත්වයකි. එමෙන්ම, මෑතකදී පැවැති 'Spider-Man: Brand New Day' චිත්රපටයේ ශ්රී ලාංකීය මංගල දර්ශනයට සමගාමීව ශ්රී ලංකාවේ ප්රථම ඩ්රෝන සංදර්ශනය (Drone show) ඉදිරිපත් කිරීමට ද පියවර ගන්නා ලදී. මෙම අනාගත ආයෝජනය ශ්රී ලංකාවේ ප්රභූ සිනමා ක්ෂේත්රයේ සිදුවූ දැවැන්තම පෞද්ගලික ආයෝජනයක් ලෙස සලකනු ලබන අතර, ඉදිරි නාගරික සංවර්ධන ව්යාපෘති සඳහාද මෙය අලුත් මාදිලියක් සපයනු ඇත.
(සටහන | සම්පත් ධීරසේකර )
මුලාශ්රය :
Scope Cinemas Arrival Signals Major Shift in Colombo Entertainment Landscape
