‘ඒ හඳ මෙතැන’ කාව්ය සංග්රහය එළිදැක්වීම බදාදා ජයවර්ධනපුර සරසවියේදී
කවි ලෝකයේ නව හැරවුමක්: අනුරුද්ධ ප්රදීප්ගේ අලුත්ම කාව්ය කෘතිය ජනගත කෙරේ
දේශපාලන හා සාමාජික විචාරකයකු මෙන්ම ශ්රී ජයවර්ධනපුර විශ්වවිද්යාලයේ දේශපාලන විද්යා අධ්යයනාංශයේ ජ්යෙෂ්ඨ කථිකාචාර්යවරයෙකු වන අනුරුද්ධ ප්රදීප් කර්ණසූරියගේ නවතම කාව්ය එකතුව වන ‘ඒ හඳ මෙතැන’ කාව්ය සංග්රහය එළිදැක්වීමේ උළෙල එළඹෙන සැප්තැම්බර් 09 වැනි බදාදා පස්වරු 2.30 ට ශ්රී ජයවර්ධනපුර විශ්වවිද්යාලයීය ශ්රී සුමංගල සභා සදයේදී (ශ්රී සුමංගල ශාලාව) පැවැත්වීමට නියමිතය.
සරසවි ප්රකාශනයක් ලෙස පාඨක දෑත් අතරට පත්වන මෙම කෘතිය, සමකාලීන සමාජ-දේශපාලන යථාර්ථය සහ මානවීය ආත්මීය හැඟීම් කාව්යමය රූපක ඔස්සේ විනිවිද දකින සුවිශේෂී කෘතියක් ලෙස මේවනවිටත් කතාබහට ලක්වෙමින් තිබේ.
විද්වත් කතිකාව සහ සහභාගිත්වය
ශ්රී ජයවර්ධනපුර විශ්වවිද්යාලයේ උපකුලපතිතුමන් සහ මානවශාස්ත්ර හා සමාජීයවිද්යා පීඨයේ පීඨාධිපතිතුමන්ගේ ප්රධානත්වයෙන් උත්සව කටයුතු ආරම්භ වීමට නියමිතය.
කෘතිය පිළිබඳ විශේෂ විද්වත් දේශන දෙකක් මෙහිදී පැවැත්වෙන අතර, ප්රවීණ සාහිත්ය විචාරක මහාචාර්ය ලියනගේ අමරකීර්ති සහ දේශපාලන හා මාධ්ය විශ්ලේෂක රසික ජයකොඩි විසින් එම දේශන පවත්වනු ඇත. කාව්ය සංග්රහයේ සාහිත්යමය අගය මෙන්ම එහි අන්තර්ගත දේශපාලනික හා සමාජීය මානයන් පිළිබඳ පුළුල් සංවාදයක් එමඟින් ගොඩනැගීමට නියමිත බව සංවිධායක මණ්ඩලය පවසයි.
විවෘත ආරාධනයක්
විශ්වවිද්යාල ශාස්ත්රාලීය ප්රජාවට පමණක් සීමා නොවී, කාව්ය කලාවට, සාහිත්යයට සහ සමාජ කතිකාවන්ට ලැදි බාහිර පාඨක ප්රජාවට, ලේඛකයන්ට මෙන්ම සාමාන්ය ජනතාවට ද මෙම අවස්ථාවට සහභාගි විය හැකි බවත්, ඒ සඳහා සියලු දෙනාට විවෘතව ආරාධනා කරන බවත් සංවිධායක කමිටුව වැඩිදුරටත් සඳහන් කරයි.
