වියට්නාමයට එන වසරේ සිට එක්සත් ජනපදයෙන් මත්ස්‍ය තහනමක්  

වියට්නාමයට පැනවූ මත්ස්‍ය තහනම පිලිබඳ යළි සලකා බලන ලෙස එක්සත් ජනපදයෙන් ඉල්ලා සිටින බව එරට කර්මාන්ත හා වෙළඳ අමාත්‍ය නොයෙන් හොං ඩයන් (Nguyen Hong Dien) ඊයේ (15) පැවසීය.

වියට්නාමයේ  තෝරාගත් මත්ස්‍ය සම්පත්  කිහිපයක් එන වසරේ සිට එක්සත් ජනපදය වෙත අපනයනය තහනම් කර තිබේ.

ජනපති ට්‍රම්ප්ගේ නව බදු ප්‍රතිපත්තියෙන් පීඩිතව සිටින වියට්නාමය, මෙම තහනමත් සමග තවදුරටත් ආර්ථික අර්බුදයක පැටලෙන බව අමාත්‍යවරයා කියා සිටියේය.

තහනම පිලිබඳ යළි සලකා බලන්නැයි, එක්සත් ජනපද වාණිජ අමාත්‍ය හොවාර්ඩ් ලුට්නික් (Howard Lutnick) ගෙන් ලිඛිත ඉල්ලීමක් සිදු කර ඇතැයි ද, වියට්නාම කර්මාන්ත හා වෙළඳ අමාත්‍යවරයා පැවසීය.

ධීවර කර්මාන්තයේදී වියට්නාමය විසින් අනුගමනය කෙරෙන ඇතැම් පන්න ක්‍රම, සමුද්‍ර  ජීවීන්ට තර්ජන එල්ල කරන බව ඉකුත් මස, එක්සත් ජනපද ජාතික සාගර හා වායුගෝලීය පරිපාලනය නිවේදනය කළේය.

එක්සත් ජනපදය, වියට්නාමයේ සුවිසල්  මත්ස්‍ය වෙළඳපොල ප්‍රධාන ගැනුම් කරුවෙකි. පසුගිය වසරට සාපේක්ෂව ඉකුත් ජනවාරි සිට අගෝස්තු මස දක්වා වියට්නාමයෙන් එක්සත් ජනපදයට අපනයනය කෙරෙන මත්ස්‍ය නිෂ්පාදන 6.9%කින් ඉහළ ගොස් තිබේ. එහි දළ වටිනාකම ඇමෙරිකානු ඩොලර් බිලියන 1.24ක් වේ. එය වියට්නාමයේ සමස්ත මත්ස්‍ය නිෂ්පාදන අපනයන ප්‍රතිශතයෙන් 17.35%ක් බව එරට රෙගු වාර්තා පෙන්වා දෙයි.

වියට්නාම කෘෂිකර්ම අමාත්‍යංශය විසින් සමුද්‍ර ක්ෂීරපායී ආරක්ෂණ පනත යටතේ, එරට ධීවර පන්න ක්‍රම 12ක් පිලිබඳ සංසන්දනාත්මක විශ්ලේෂණ ඉදිරිපත් කිරීම ප්‍රතික්ෂේප කිරීම, මත්ස්‍ය තහනමට ආසන්නතම හේතුව බව වාර්තා වේ. එම විශ්ලේෂණ ඉදිරිපත් කිරීමට අපොහොසත්වන රටවලට 2026 ජනවාරි 01 දින සිට එක්සත් ජනපදය වෙත මත්ස්‍ය සම්පත් අපනයනය තහනම් කෙරේ.

වියට්නාමයේ  ටූනා, සප්පරා, කොස්සා, මැකරල්, මලට්, කකුළුවන් සහ දැල්ලන් වැනි ප්‍රධාන පෙළ මත්ස්‍ය සම්පත් රැසකට මෙම  අපනයන තහනම බලපා තිබේ.

ඒ පිලිබඳ එක්සත් ජනපදයේ යළි සලකා බැලීම, වියට්නාමයේ ධීවර කර්මාන්තයේ නියැළි සිය දහස් ගණනක ධීවර සහ ආශ්‍රිත  ශ්‍රමික ප්‍රජාවේ ජීවනෝපාය ආරක්ෂා කිරීම වෙනුවෙන් ගන්නා මාහැඟි පියවරක් වනු ඇතැයි, එරට කර්මාන්ත හා වෙළඳ අමාත්‍යවරයා විසින් සිය ලිපියෙන් එක්සත් ජනපදය වෙත වැඩි දුරටත් දන්වා  තිබේ.

වියට්නාමයේ විශාලතම අපනයන වෙළඳපොළ එක්සත් ජනපදය වේ.

ට්‍රම්ප් පරිපාලනය නව බදු ප්‍රතිපත්තිය යටතේ, මෙම වසරේ අගෝස්තු 01 වන දා සිට, වියට්නාමයෙන් එක්සත් ජනපදය වෙත සිදු කෙරෙන සියලු භාණ්ඩ අපනයන සඳහා 20% ක තීරු බදු  පනවා ඇත. වෙනත් රටවලින් වියට්නාමය හරහා එක්සත් ජනපදය වෙත සිදු කෙරෙන ප්‍රතිඅපනයන බද්ද 40% තෙක් ඉහළ නංවා තිබේ.

(සටහන | Reuters ඇසුරින්; හර්ෂ උදයකාන්ත පීරිස්)
(This email address is being protected from spambots. You need JavaScript enabled to view it.)
9/16/2025

මුලාශ්‍රය :

Vietnam asks United States to reconsider seafood export ban