ඇෆ්ඝනිස්ථාන අත්අඩංගුවේ සිටි බ්‍රිතාන්‍ය යුවළකට නිදහස

ඇෆ්ඝනිස්ථානයේ තලිබාන් අත්අඩංගුවේ පසු වූ බ්‍රිතාන්‍ය ජාතික යුවළක් මුදා හැරේ.

ඉකුත් පෙබරවාරි මස අත්අඩංගුවට පත් වූ ඔවුන් මුදා ගැනීම වෙනුවෙන් කටාර් රාජ්‍යය සිදු කළ මැදිහත්වීම සාර්ථක විය. නිදහස ලැබූ බ්‍රිතාන්‍ය යුවළ අද දෝහා බලා පිටත් කර හැරි  බව වාර්තා වේ.

බාර්බී (Barbie) සහ පීටර් රෙනොල්ඩ්ස්  (Peter Reynolds) නම් එම යුවළ  අත්අඩංගුවට ගැනීම සහ ඔවුන්ගේ සෞඛ්‍ය තත්ත්වය  පිලිබඳ එම  පවුල් සාමාජිකයෝ දිගින් දිගටම ජාත්‍යන්තරය හමුවේ හඬ නැගූහ. තලිබාන් අභ්‍යන්තර කටයුතු අමාත්‍යංශය මගින් ඉකුත් පෙබරවාරි 01 දින ඔවුන් අත්අඩංගුවට ගැනිණි.

කටාර් රාජ්‍යය, එම සිද්ධිය සම්බන්ධයෙන්, බ්‍රිතාන්‍ය රජය සහ එම යුවළගේ පවුල් සාමාජිකයින් සම්බධීකරණය කරමින්, තලිබාන් රජය හා දිගින් දිගටම සාකච්ඡාවේ නිරත විය.

අත්අඩංගුවට පත් බ්‍රිතාන්‍ය යුවළ වෙන් වශයෙන් රඳවා තැබුණු අතර, කාබුල් (Kabul ) අගනුවර කටාර් තානාපති කාර්යාලය ඔවුන් වෛද්‍ය පහසුකම් සහ ප්‍රතිකාර වෙත යොමු කිරීම මෙන්ම, පවුල් සාමාජිකයින් අතර සම්බන්ධීකරණය වැනි අත්‍යවශ්‍ය කටයුතු සම්පාදනය කිරීමට වෙහෙසකර කාර්යයක නිරත විය.

නිසි තොරතුරු අනාවරණය නොකර සිටීම හේතුවෙන්  එම යුවළ  ඇෆ්ඝනිස්ථාන නීතිය උල්ලංඝනය කළ බව ඇෆ්ඝන් විදේශ අමාත්‍යංශය පැවසීය.

එම බ්‍රිතාන්‍ය ජාතිකයින් දෙදෙනා සමග චීන-ඇමෙරිකානු සම්භවයක් සහිත පුද්ගලයකු සහ භාෂා පරිවර්තකයකු ඇතුළු සිව් දෙනකු පසුගිය දා ඇෆ්ඝනිස්ථාන බලධාරීන් විසින් අත්අඩංගුවට ගැනිණි. බ්‍රිතාන්‍ය යුවළ, මධ්‍යම ඇෆ්ඝනිස්ථානයේ බාමියාන් (Bamiyan) පළාතේ රාජ්‍ය නොවන සංවිධානයක සේවකයින් බව බී.බී.සී. (BBC)  පුවත් සේවය උපුටා දක්වන රොයිටර්ස් (Reuters) පුවත් සඳහන් කරයි. දේශීය බලධරයාගේ නිසි අවසරයකින් තොරව ගුවන්යානයක් භාවිතා කිරීම හේතුවෙන් ඔවුන් අත්අඩංගුවට ගත්  බව, එම මාධ්‍ය වාර්තා පවසයි.

2021 ඇෆ්ඝනිස්ථානයේ තලිබාන් රජය බලයට පත්වීමෙන් අනතුරුව, එරට  අත්අඩංගුවට  පත් විදෙස් පුරවැසියන් මුදා ගැනීම සම්බන්ධයෙන් කටාර් රාජ්‍යය මැදිහත් කරුවකු වශයෙන් කටයුතු කරයි. එම රාජ්‍ය තාන්ත්‍රික මැදිහත්වීම් ඔස්සේ,  මේ වන විට, ඇමෙරිකානු පුරවැසියන් තිදෙනකු ද අත්අඩංගුවෙන් මුදා ගැනීමට ඔවුහු සමත් වී සිටිති.  

තලිබාන් රජය බලයට පත්වීමත් සමග, බ්‍රිතාන්‍යය සහ එක්සත් ජනපදය ඇතුළු බටහිර රටවල් ඇෆ්ඝනිස්ථානයේ  සිය තානාපති කාර්යාල වසා දැමීමට පියවර ගත්හ.

බ්‍රිතාන්‍ය ජාතිකයින්ට ඇෆ්ඝනිස්ථානයේ සංචාරය කිරීම සම්බන්ධයෙන් අනතුරු අඟවා තිබේ.  

(සටහන | Reuters ඇසුරින්; හර්ෂ උදයකාන්ත පීරිස්)
(This email address is being protected from spambots. You need JavaScript enabled to view it.)
9/19/2025

මුලාශ්‍රය :

UK couple freed by Taliban after Qatari mediation, official says