ජනපති ඩොනල්ඩ් ට්රම්ප් විසින් ඉදිරිපත් කළ ගාසා සාම යෝජනාවලියට ඊශ්රායල අග්රාමාත්ය බෙන්ජමින් නෙතන්යාහු සහාය පල කරයි.
දෙරට නායකයින් අතර විශේෂ හමුවක් ඊයේ (29) ධවල මන්දිරයේදී පැවැත්විණි.
කෙසේ වෙතත්, කරුණු 20කින් යුත් එම යෝජනාවලියට හමාස් සංවිධානය එකඟ වේදැයි මෙතෙක් අනාවරණය වී නැත.
ඊශ්රායල අග්රාමාත්යවරයා සමග පැවති සාකච්ඡාවෙන් අනතුරුව මාධ්ය වෙත අදහස් දැක්වූ ජනපති ට්රම්ප්, ගාසා තීරයේ දෙවසරක යුද්ධය අවසන් කිරීමේ සාම මායිමට "අසීමිතව" ලංවී ඇතැයි සඳහන් කළේය. එහෙත්, සන්නද්ධ සටන්කාමීන් එම යෝජනාවලිය පිළිනොගතහොත්, ඕනෑම ඉදිරි ක්රියා මාර්ගයක් වෙනුවෙන් ඊශ්රායලයට එක්සත් ජනපදයේ පූර්ණ සහාය ලබා දෙන බව ද ඔහු අවධාරණය කළේය.
වහා සටන් විරාමයකට එළැඹෙන ලෙස එම යෝජනාවලිය මගින් දන්වා තිබේ. දෙපාර්ශ්වය භාරයේ සිටින ප්රාණ ඇපකරුවන් නිදහස් කිරීම, අදියර කිහිපයක් යටතේ ඊශ්රායල හමුදා ගාසා තීරයෙන් ඉවත් වීම, හමාස් සංවිධානය සියලු අවි බිම තැබීමට ඉදිරිපත් වීම සහ ජාත්යන්තර කමිටුවක් යටතේ ගාසා තීරයේ අන්තර්වාර රජයක් බිහි කිරීම වැනි කරුණු රැසක් ද ඊට ඇතුළත් ය.
දෙරට නායක හමුවේදී එක්සත් ජනපද සාම යෝජනාවලිය පිලිබඳ ඊශ්රායල පාර්ශ්වයෙන් පැවති ගැටලුකාරී තත්ත්වයන් පිළිබඳවද සාකච්ඡා කෙරිණි. එම කරුණු සම්බන්ධයෙන් දෙපාර්ශ්වය පූර්ණ එකඟතාවයකට එළැඹී දැයි මෙතෙක් අනාවරණය වී නොමැත.
අනාගත පලස්තීන රාජ්යයක් සම්බන්ධයෙන් එහි වූ කරුණු ඊශ්රායල අග්රාමාත්යවරයා විසින් එකහෙලා ප්රතික්ෂේප කර තිබේ. යුද්ධයෙන් පසු ගාසා තීරයේ පාලනය ට පලස්තීන අධිකාරියේ සහාය ලබා ගැනීමේ යෝජනාවද ඔහු විසින් තරයේ ප්රතික්ෂේප කර ඇතැයි වාර්තා වේ.
එක්සත් ජනපද යෝජනාවලියට එකඟතාව පල කිරීම සම්බන්ධයෙන් ඊශ්රායල අග්රාමාත්යවරයාට ස්තුතිය පුද කළ ජනපති ට්රම්ප්, දෙපාර්ශ්වයම එකා වන් ව කටයුතු කළහොත්, වසර, දශක සහ සියවස් ගණනක් තිස්සේ ලේ වැගිරුණු විනාෂකාරී ගැටුම්වලට "තිත" තැබිය හැකි බව ප්රකාශ කළේය.
(සටහන | Reuters ඇසුරින්; හර්ෂ උදයකාන්ත පීරිස්)
(
9/30/2025
මුලාශ්රය :
Trump secures Netanyahu's agreement to Gaza deal but Hamas support in question
