පෙරු හිටපු අගමැතිනි බෙට්සිට රටින් පිටවීම තහනම්

පෙරු දේශයේ හිටපු අග්‍රාමාත්‍යවරිය, බෙට්සි චාවේස් (Betssy Chavez) හට රටින් පලා යාමට ඉඩ නොදෙන බව රජය ඊයේ (07) නිවේදනය කළේය.

ඇයට මෙක්සිකෝවේ දේශපාලන රැකවරණ හිමිව  තිබේ.

2022 වසරේ, පෙරු  හිටපු ජනපති, පෙද්‍රෝ කැස්ටිලෝ (Pedro Castillo) හට එරට කොන්ග්‍රසය විසුරුවා හැරීමට සහාය දැක්වීම සම්බන්ධයෙන්, බෙට්සි අපරාධ චෝදනාවන්ට ලක්ව සිටින්නීය.

ධුරයෙන් නෙරපා හැරුණු කැස්ටිලෝ, තවමත් අත්අඩංගුවේ පසුවේ.  2023 වසරේ සිට සිරදඬුවමට ලක්වූ බෙට්සි, විනිසුරුවකු විසින් ඉකුත් සැප්තැම්බරයේ ඇප පිට නිදහස් කෙරිණි.

පෙද්‍රෝ කැස්ටිලෝ

අනතුරුව ඇය දේශපාලන රැකවරණ පතා එරට මෙක්සිකෝ තානාපති කාර්යාලය වෙත පලා ගියාය.

ඊයේ මේ පිලිබඳ විශේෂ නිවේදනයක් නිකුත් කළ පෙරු විදේශ අමාත්‍යංශය බෙට්සි හට දේශපාලන රැකවරණ පිරිනැමීම සම්බන්ධයෙන් මෙක්සිකෝව දැඩි විවේචනයට ලක් කළේය. මෙක්සිකෝව, අපරාධකරුවන්ට දේශපාලන රැකවරණ පිරිනැමීමට ගත් තීරණය, ජාත්‍යන්තර දේශපාලන රැකවරණ පැතීමේ සැබෑ අරුත විකෘති කිරීමකැයි, එහි සඳහන්ය.

ඉදිරියේ, එවන් අනර්ථයන් සිදු නොවන තැනට ඒ සම්බන්ධ ප්‍රඥප්තීන් වෙනස් කිරීමට  ඇමෙරිකානු රාජ්‍ය පිලිබඳ සංවිධානයට ( Organization of American States) බල කරන බව  පෙරු විදේශ අමාත්‍යංශ නිවේදනයේ දැක්වේ.

පෙරු දේශයේ කියුබානු තානාපති,  කර්ලොස් සැමෝරා (Carlos Zamora) ද සිය ධුරයේ කටයුතු අවසන් කොට රටින් පිටව ගොස් තිබේ.

(සටහන | Reuters ඇසුරින්; හර්ෂ උදයකාන්ත පීරිස්)
(This email address is being protected from spambots. You need JavaScript enabled to view it.)
11/08/2025


මුලාශ්‍රය :

Peru denies ex-PM seeking asylum safe passage to Mexico