බටහිර ඉවුරේ ඊශ්රායල පදිංචිකරුවෝ, පලස්තීන ගොවීන් ඉලක්ක කර ඊයේ (11) යළි පහර දීම් සිදු කළහ.
වෙස් ලා ගත් ඊශ්රායල ප්රහාරකයෝ, පලස්තීනුවන් වෙත ගල් මුල් දමා ගසමින් පැමිණ, ගොවීන් සතු කිරි බවුසර, ගොවි බිම් සහ වාසස්ථාන ද ගිනි ලෑහ. පහරදීම් හේතුවෙන් පලස්තීනුවන් සිව් දෙනෙක් තුවාළ ලදහ. ඊශ්රායලය, බටහිර ඉවුර බලෙන් අත්පත් කර සිටින බවට, පලස්තීනුවෝ චෝදනා කරති.
මුහුණු ආවරණ පැළඳි ඊශ්රායල පදිංචිකරුවන් රැසක් පලස්තීනුවන්ට පහරදී දේපළ ද ගිනි බත් කළ බවට දැනුවත් වූ සැණින්, බටහිර ඉවුරේ බෙයිට් ලිඩ් (Beit Lid) සහ දෙර් ෂරාෆ් ( Deir Sharaf) පෙදෙස් වෙත හමුදා පිටත්කර හැරි බව, ඊශ්රායලය පැවසීය. තුවාළ ලත් පලස්තීනුවන් සිව් දෙනකුට ප්රතිකාර කළ බව ද, ඔවුහු කියා සිටියහ. ඊශ්රායල හමුදා, ගැටුම්කාරී පිරිස් පලවා හැරීමට කටයුතු කළහ.
පොලු මුගුරු පහරින් තුවාළ ලත් තිදෙනකුට ප්රතිකාර කළ බව, පලස්තීන රතු අඩසඳ ව්යාපාරය පැවසීය.
පහරදීම් සම්බන්ධයෙන් ඊශ්රායල ජාතිකයින් සිව් දෙනකු අත්අඩංගුවට ගත් බව, ඊශ්රායල පොලිසිය කියයි. සිද්ධිය පිලිබඳ ඔවුන්ගෙන් ප්රශ්න කෙරෙමින් පවතී.
ඉකුත් ඔක්තෝබරයේ පමණක් බටහිර ඉවුරේ ඊශ්රායල පදිංචිකරුවන් විසින් එහි වෙසෙන පලස්තීන ජනයා ඉලක්ක කර සිදු කළ එවැනි පහරදීම් 264ක් වාර්තා වන බව, මානුෂීය කටයුතු සම්බන්ධීකරණය පිලිබඳ එක්සත් ජාතීන්ගේ කාර්යාලය පසුගිය දා පැවසීය.
(සටහන | Reuters ඇසුරින්; හර්ෂ උදයකාන්ත පීරිස්)
(
11/12/2025
මුලාශ්රය :
Masked Israeli settlers torch property, injure four Palestinians, army says
