තෙල් පිරිපහදු ඉලක්ක කර එල්ල වූ ඩ්රෝන සහ මිසයිල ප්රහාර හමුවේ 73කට තුවාල.
හොර්මුස් සමුද්ර සන්ධියේ ආතතිය ඉහළට; බොරතෙල් මිල ඩොලර් සියයේ සීමාව ආසන්නයට.
මැදපෙරදිග කලාපයේ පවතින ගැටුම්කාරී වතාවරණය තවදුරටත් තිවුර කරමින්, යේමනයේ ක්රියාත්මක හවුති සන්නද්ධ අංශ සවුදි අරාබියේ දකුණුදිග නගර හතරක් ඉලක්ක කර දැවැන්ත ඩ්රෝන සහ මිසයිල ප්රහාර මාලාවක් එල්ල කර තිබේ. ප්රහාර හේතුවෙන් පුද්ගලයින් 73 දෙනෙකු තුවාල ලබා ඇති අතර ප්රධාන බලශක්ති සහ තෙල් පිරිපහදු ස්ථාන කිහිපයක ගිනිගැනීම් හටගෙන ඇති බව නිල ආරංචි මාර්ග තහවුරු කරයි.
ඉලක්ක වූ ප්රදේශ සහ මූලෝපායික හානිය
හවුති පාර්ශ්වය සඳහන් කරන්නේ සවුදි අරාබියේ ඛාමිස් මුෂයිත්හි පිහිටි ගුවන් හමුදා කඳවුරක් මෙන්ම, අබ්හා, නජ්රාන් සහ ප්රධාන වරාය නගරයක් වන ජසාන්හි පිහිටි රාජ්ය තෙල් සමාගමට අයත් පිරිපහදු සංකීර්ණ සහ බලාගාර ඉලක්ක කර මෙම මෙහෙයුම් දියත් කළ බවයි. ජසාන් පිරිපහදුව ආශ්රිතව සහ අබ්හා තෙල් බෙදාහැරීමේ මධ්යස්ථානයෙන් දැඩි දුමාරයක් පිටවන අයුරු චන්ද්රිකා ඡායාරූප මඟින් ද තහවුරු වී ඇත. තුවාල ලැබූවන් අතර කාන්තාවන් සහ ළමුන් ද සිටින බව සවුදි බලධාරීහු ප්රකාශ කරති.
මෙම ප්රහාරයට ප්රතිචාර වශයෙන් සවුදි ප්රමුඛ සන්ධාන හමුදා විසින් යේමනයේ සනා අගනුවරට නැගෙනහිරින් පිහිටි ජුබා ප්රදේශයට සහ නිරිතදිග තායිස් පළාතට ගුවන් ප්රහාර එල්ල කර ඇති බව හවුති පාලන මාධ්ය වාර්තා කර තිබේ.
බලශක්ති සැපයුමට එල්ල වන පීඩනය සහ ගෝලීය වෙළඳපොළ
පසුගිය අගෝස්තු මාසයේ පැවති යම් තාවකාලික සන්සුන් භාවයකින් අනතුරුව කලාපීය ගැටුම් යළි සක්රීය වීම ගෝලීය බලශක්ති වෙළඳපොළට සෘජු බලපෑමක් එල්ල කර ඇත. ප්රහාර වාර්තා වීමත් සමඟ බ්රෙන්ට් බොරතෙල් බැරලයක මිල ඩොලර් 99.46 දක්වා ඉහළ ගිය අතර, එය පසුගිය ජූලි අග භාගයෙන් පසු වාර්තා වූ ඉහළම අගයයි. හොර්මුස් සමුද්ර සන්ධිය ආශ්රිත නාවික අවහිරතාවලට අමතරව ගොඩබිම් බලශක්ති මධ්යස්ථාන ද මෙලෙස ප්රහාරයන්ට ලක්වීම ගෝලීය සැපයුම් ජාලය තවදුරටත් අවදානමකට ලක්කරයි.
මේ අතර, ඇමෙරිකා එක්සත් ජනපදයේ දේශීය වෙළඳපොළ තුළ ඩීසල් මිල ගැලුමකට ඩොලර් 5.90 ඉක්මවා වාර්තාගත ලෙස ඉහළ ගොස් ඇත. වොෂින්ටනයේ යුද උපායමාර්ගික ජයග්රහණයෙන් පසු ඉන්ධන මිල ශීඝ්රයෙන් පහත වැටෙනු ඇති බවට හිටපු ජනාධිපති ඩොනල්ඩ් ට්රම්ප් සිය සමාජ මාධ්ය ඔස්සේ සඳහන් කර තිබේ.
පාර්ශ්වයන්ගේ දැඩි ස්ථාවරයන් සහ නාවික සීමා කිරීම්
සවුදි සන්ධාන ප්රකාශක කර්නල් තුර්කි අල්-මල්කි ප්රකාශ කළේ, තම රාජ්යයේ සහ පුරවැසියන්ගේ ආරක්ෂාව තහවුරු කිරීම සඳහා අවශ්ය සියලු යුදමය පියවර ගන්නා බවයි. ඊට ප්රතිචාර දක්වමින් හවුති ප්රකාශක යාහියා සාරි සඳහන් කර ඇත්තේ සවුදි ගුවන් ප්රහාර හමුවේ තම මෙහෙයුම් ද දිගටම ක්රියාත්මක කරන බවයි.
අනෙක් අතට, ඉරාන උත්තරීතර ජාතික ආරක්ෂක කවුන්සිලයේ ලේකම් මොහ්සෙන් රෙසායි ප්රකාශ කර ඇත්තේ, පර්සියානු ගල්ෆ් කලාපය හරහා නව "විශේෂිත නාවික කලාපයක්" (Maritime Exclusion Zone) ක්රියාත්මක කිරීමට පියවර ගන්නා බවයි. ඇමෙරිකානු යුද නෞකා සහ කඳවුරු ඉලක්ක කර නව බැලස්ටික් මිසයිල (Ballistic Missile) හැකියාවන් යොදාගැනීමට තම පාර්ශ්වය සූදානම් බව ද ඔහු අනතුරු අඟවා තිබේ.
ගැටුම් උත්සන්න වීම හේතුවෙන් යේමනයේ බටහිර වෙරළ තීරයේ සාමාන්ය වැසියන් 18,500කට අධික පිරිසක් පසුගිය දින කිහිපය තුළ අවතැන්ව ඇති බව ජාත්යන්තර සංක්රමණිකයන් පිළිබඳ සංවිධානය (IOM) වාර්තා කරයි. රාජ්යතාන්ත්රික මට්ටමින් විසඳුම් සෙවීම තවමත් මන්දගාමී තත්ත්වයක පවතින පසුබිමක, මැදපෙරදිග අර්බුදය තවදුරටත් කලාපීය දේශපාලන හා ආර්ථික ස්ථාවරත්වයට දැඩි බලපෑම් එල්ල කරමින් පවතී.
වැඩිදුර කියවීම සඳහා මූලාශ්ර
Reuters මුල් වාර්තාව: Iran-backed Houthis attack four Saudi cities in expansion of Middle East war
