ශ්‍රී ලංකා ආර්ථිකයේ වේගය බාල වෙයි: ප්‍රාග්ධන ආයෝජන අඩුවීම බලපෑ හැටි

දෙවන කාර්තුවේ වර්ධනය සියයට 4.2ට: කර්මාන්ත ඉදිරියට ආවත් කෘෂිකර්මය හා සේවා පසුබසී

යටිතල පහසුකම් වියදම් සීමා වීම ආර්ථිකයේ දිගුකාලීන ගමනට අභියෝගයක්



සංවර්ධනයේ මාවතේ අභියෝග: ශ්‍රී ලංකාවේ ආර්ථික වර්ධනය මන්දගාමී වීමට හේතු මොනවාද?

ශ්‍රී ලංකාවේ ආර්ථිකය අඛණ්ඩව වර්ධනය වුවද, එහි වේගය මන්දගාමී වීම සම්බන්ධයෙන් මේ වන විට ආර්ථික විද්‍යාඥයින්ගේ දැඩි අවධානය යොමුව තිබේ. ජනලේඛන හා සංඛ්‍යාලේඛන දෙපාර්තමේන්තුවේ නවතම ජාතික ගිණුම් ඇස්තමේන්තු වලට අනුව, 2026 වසරේ දෙවන කාර්තුවේ සැබෑ ආර්ථික වර්ධන වේගය සියයට 4.2 දක්වා පහත වැටී ඇත. ආර්ථිකයක් තුළ මුදල් සංසරණය ඉහළ යෑම නිසා ලැබෙන නාමික වර්ධනයට වඩා, සැබෑ භාණ්ඩ හා සේවා නිෂ්පාදනය මනින සැබෑ ආර්ථික වර්ධනයේ මෙම මන්දගාමී වීම ගැඹුරින් සලකා බැලිය යුත්තකි.

කර්මාන්ත ඉදිරියට යද්දී, සේවා සහ කෘෂිකාර්මික අංශ පසුපසට

රටේ සමස්ත ආර්ථිකයෙන් සියයට 52.7ක් නියෝජනය කරන සේවා අංශයේ වර්ධනය සියයට 2.7ක් දක්වා පහත වැටී ඇත. මීට අමතරව, ආර්ථිකයට සියයට 8.4ක දායකත්වයක් ලබා දෙන කෘෂිකාර්මික අංශය සියයට 2.3කින් සංකෝචනය වී (පසුබෑමකට ලක්වී) තිබේ. මිරිදිය සහ මුහුදු මසුන් ඇල්ලීම මෙන්ම වී වගාව ඇතුළු ක්ෂේත්‍ර කිහිපයක් මෙලෙස දැඩි පසුබෑමකට ලක්වීම ග්‍රාමීය ආර්ථිකයට සහ ජනතාවගේ දෛනික ආදායම් මාර්ගවලට සෘජුවම බලපා ඇත.

කෙසේ වෙතත්, සමස්ත ආර්ථිකය තවදුරටත් ඉහළ මට්ටමක රඳවා ගැනීමට සමත්ව ඇත්තේ සියයට 25.9ක දායකත්වයක් සපයන කාර්මික අංශයයි. එහිදී ඉදිකිරීම් අංශය සියයට 13.9කින් සහ පතල් කැණීම් අංශය සියයට 17.4කින් වර්ධනය වී ඇති බව වාර්තා වේ. එහෙත්, මෙම කාර්මික වර්ධනය සියලු ක්ෂේත්‍ර ආවරණය කරන්නක් නොවේ. රබර්, ප්ලාස්ටික්, පිරිපහදු කළ පෙට්‍රෝලියම් නිෂ්පාදන සහ ඇඟලුම් කර්මාන්තය වැනි ප්‍රධාන අපනයන නැඹුරු ක්ෂේත්‍ර කිහිපයක්ම සුළු පසුබෑමක් පෙන්නුම් කර තිබීම විශේෂත්වයකි.

ප්‍රාග්ධන වියදම් කප්පාදුවේ නොපෙනෙන අවදානම

ආර්ථික විචාරකයින් පෙන්වා දෙන පරිදි, වත්මන් ආර්ථික මන්දගාමී වීමට ප්‍රධානම හේතුවක් වී ඇත්තේ රජයේ ප්‍රාග්ධන වියදම් (Capital Expenditure) සීමා වීමයි. මාර්ග, බලශක්ති පද්ධති, වරායන්, ජල සම්පාදන සහ ඩිජිටල් යටිතල පහසුකම් වැනි සංවර්ධන ව්‍යාපෘති සඳහා රජය විසින් සිදුකරන ආයෝජන මගින් අනාගතයට අවශ්‍ය නිෂ්පාදන ධාරිතාව නිර්මාණය කරයි.

මූල්‍ය හිඟය පාලනය කරගැනීම සඳහා ප්‍රාග්ධන වියදම් කප්පාදු කිරීම කෙටිකාලීනව රජයට පහසු වුවද, දිගුකාලීනව එයින් රටේ යටිතල පහසුකම් සංවර්ධනය අඩාල වේ. විශ්වාසදායක පොදු යටිතල පහසුකම් නොමැති විට පෞද්ගලික අංශයේ ආයෝජකයින් ද නව ව්‍යාපෘති ආරම්භ කිරීමට මැලි වන අතර, එය සමස්ත ආර්ථිකයේ නිෂ්පාදන ඵලදායිතාව ඉහළ නැංවීමට බාධාවකි.

අනාගත අභියෝග සහ ජාත්‍යන්තර බලපෑම්

මැදපෙරදිග දේශපාලන උණුසුම්කාරී තත්ත්වයන් සහ බොරතෙල් සැපයුමේ අස්ථාවරභාවය වැනි බාහිර සාධක ද මෙහිදී ආර්ථිකයට බලපා ඇත. ජාත්‍යන්තර මූල්‍ය අරමුදලේ (IMF) සහයෝගය යටතේ ආර්ථිකය ස්ථාවර කරගැනීමට උත්සාහ කරන අවධියක, දේශීය ආයෝජන සහ ප්‍රාග්ධන සංවර්ධනය දුර්වල වීම අනාගත ආර්ථික ප්‍රකෘතියට අභියෝගයක් වනු ඇත.

කෙටිකාලීන මූල්‍ය හිඟ පාලනයන් මෙන්ම දිගුකාලීන ආර්ථික වර්ධනය පවත්වාගෙන යාම සඳහා අවශ්‍ය යටිතල පහසුකම් සංවර්ධනය අතර නිසි සමතුලිතතාවයක් පවත්වා ගැනීම ඉදිරි ආර්ථික ගමනට අත්‍යවශ්‍ය සාධකයක් වනු ඇත.


වැඩිදුර කියවීම සඳහා මුලාශ්‍ර ලිපිය :

Capital Spending Cuts Threaten Sri Lanka’s Recovery and Growth