ඩග්ලස් බෝට්ටු වෙන්දේසියට ගොස් ස්ටාලින් අවුස්සා ගනී

 

“ඉන්දීය රජයේ අප්‍රසාදය හැකි ඉහලම අයුරින් දැඩි ලෙස ප්‍රකාශයට පත් කරමින් ශ්‍රී ලංකාවේ ආණ්ඩුවට කිසිදු නීතිමය අයිතියක් නැති තමිල්නාඩු බෝට්ටු වෙන්දේසි කිරීම සඳහා පලකොට ඇති දැන්වීම් අවලංගු කරන ලෙස සුදුසු ආකාරයකින් දැනුම් දෙන මෙන් මම ඉන්දීය රජයට බල කර සිටිමි,” යි මහ ඇමැති එම් කේ ස්ටාලින් විසින් ජනවාරි 24 දා අගමැති නරේන්ද්‍ර මෝඩිට යවා ඇති ලිපියක දැක්වේ.


ධීවර කටයුතු පිළිබඳ ඉන්දු-ලංකා ඒකාබද්ධ ක්‍රියාකාරී කමිටුව රැස්වීමට තිබියදී ගන්නා ලද මෙම වෙන්දේසි තීන්දුව අවාසනාවන්ත සිද්ධියක් ලෙස මහ ඇමැති වරයා විසින් හඳුන්වා දී ඇත.

“දීර්ඝ කාලයක් තිස්සේ පවතින මෙම ගැටලුව සම්බන්ධයෙන් සුහද විසඳුමකට ඒම සඳහා අනුග්‍රහශීලී මානසිකත්වයකින් පෙරට පැමිණි තමිල්නාඩු ධීවරයන් අතර මෙම ක්‍රියාව තිගැස්මක් සහ සැකයක් ජනිත කර තිබේ,” යි  මහ ඇමැති ස්ටාලින් පවසයි.

ශ්‍රී ලංකාවේ අත් අඩංගුවේ දී අබලන් වී තිබෙන 2018 ට පෙර අල්ලා ගන්නා ලද ඉන්දීය බෝට්ටු 125ක් සම්බන්ධයෙන් දෙරටේ නිලධාරීන් අතර සාකච්ඡා කිරීමටද කටයුතු යොදා තිබෙන අවස්ථාවක ශ්‍රී ලංකා රජය මෙම පියවර ගෙන ඇති බව පෙන්වා දෙන එම් කේ ස්ටාලින් එම යාත්‍රා මෙන්ම 2018න් පසු අත් අඩංගුවට ගෙන රඳවාගෙන සිටින තවත් බෝට්ටු 75ක් ඇතුළු ආම්පන්න මුදා ගැනීමට ද කටයුතු කරන ලෙස අගමැති මෝඩි ගෙන් ඉල්ලා සිටී.