යුක්රේනයේ බලශක්ති සහ තවත් යටිතල පහසුකම් මධ්යස්ථාන රැසක් ඉලක්ක කර රුසියානු හමුදා දැවැන්ත බෝම්බ ප්රහාරයක් එල්ල කළහ.
එරට, චර්නිහිව් (Chernihiv) කලාපයට එම ප්රහාරය එල්ල වී තිබේ.
ප්රහාරයත් සමග විදුලිය සහ ජල සැපයුම් මුළුමනින්ම බිඳ වැටීමෙන් සිය දහස් සංඛ්යාත යුක්රේන වැසියෝ, දුෂ්කරතාවයට පත්ව සිටිති. එම කලාපයට අමතරව, උතුරු යුක්රේනයේ තවත් ප්රදේශ රැසක් ද අද (21), රුසියානු ඩ්රෝන ප්රහාරයන්ට ලක් විය.
පූර්ව ගැටුම් සංගණනයන්ට අනුව, චර්නිහිව් කලාපය මිලියනයකට අධික ජනගහනයෙන් යුක්ත වූවකි. අඛණ්ඩ රුසියානු ඩ්රෝන ප්රහාර හේතුවෙන්, විදුලි බල සැපයුම කඩිනමින් යථා තත්ත්වයට පත් කිරීමේ කටයුතුවලට බාධා එල්ල වී තිබේ.
විනාශයට පත් යටිතල පහසුකම් ප්රතිසංස්කරණයට ඉඩක් නොතබාම, රුසියානු හමුදා ඒ වටා ඉහළ අහසේ ද, නිරන්තර ඩ්රෝන 'සංදර්ශන' පවත්වන බව යුක්රේන හමුදා චෝදනා කරති.
ළඟ එන ශීත සෘතුව අභිමුව, විදුලිය අඛණ්ඩව විසන්ධි වීමෙන්, යුක්රේනයේ ප්රදේශ රැසක මානුෂීය අර්බුදයක් ද හටගෙන ඇතැයි වාර්තා වේ. එමගින්, රුසියානු රජය, යුක්රේන වැසියන් ශීතයට නිරාවරණය කොට ඝාතනය කිරීමේ නිහීන ත්රස්ත ක්රියාවක නිරත වන බවට චෝදනා කෙරේ.
(සටහන | Reuters ඇසුරින්; හර්ෂ උදයකාන්ත පීරිස්)
(
10/21/2025
මුලාශ්රය :
Russian bombardment plunges hundreds of thousands of Ukrainians into blackout
